1 Wakorint̯o 16:13 - Pokomo

¹³ Nywinywi wani matso. Faro yenu igijeni muno na namutseewa woga. Wani wantu mwiwo na nguvu.

1 Wakorint̯o 16:13 ပူးပေါင်းရင်းမြစ်များ

Matayo 25:13

Makisa Yesu kamba, “Ndookomu nichokumwambiani ni kwamba, ni muwe matso na saa zonse muwe t̯ayari, koro ntamudzi nsiku wala saa ya kudza kwangu.”

Matayo 26:41

Mirani na kuyomba mutsekudzanjia maḍemoni. Koro hi ruhu inatsaka, ela hu mwii ni mudhaifu.”

Luka 21:36

Mirani na kuyomba muno mupate nguvu za kuyachia na naghea haya haya mambo yonse yadzeyohendeka, ili mudze musumame usoni yangu mimi Mwana jwa Ad̯amu.”

1 Wakorint̯o 14:20

Wandugu zanguni, mat̯aro yenu nayatseewa ya kiḍyana. Dzuu ya mazuka, wani dza wana wasiomanya kintu, ela mat̯aro yenu nayawe mat̯aro ya kiuntu ukuu.

1 Wakorint̯o 15:58

D̯ubva wandugu watsakwa, sumamani kiyume na mutset̯et̯eleka. Dziyavyeni kuihenda kazi ya Ḅwana kut̯wa, mukimanya ya kwamba hweka ḍyenu kwa kazi ya Ḅwana ntaḍiwezi kuhika ḅasi.

2 Wakorint̯o 1:24

Hamu yehu si kudzihendeza wakuu wa kumwambia haya mwiyonamala kuhikiza, koro faro yenu ni ngoru. Hwichonatsaka, ni kuhenda kazi nanywi mupate kuwa na tsekea.

Wagalatia 5:1

*Kirist̯o kahuweka huru hupate kutsaishi dza wahumwa. D̯ubva ni musumame urembo, na mutseishi dza wahumwa kawii.

Waefeso 3:16

Nyakumuyombeani kwamba, kuyawana na winji wa memaye yasiyo chima, amumpe nguvu za kut̯osa za kumukumiiza hi myojo yenu kuchiiya na kwa Ruhu jwakwe.

Waefeso 6:10

Chuuwo changu cha mwiso ni kwamba, Ḅwana namumpe nguvu kuyawana na uwezowe mukuu.

Wafilipi 1:27

Cha mud̯a t̯u ni kwamba, maisha yenu ni yaingane ḍa na hivi vya hi injili ya Yesu Kirist̯o ivyonatsaka. Ni yawe hivi ili kwamba, ninkiweza kudza kwenu ambu ninkitsaweza kudza, nangaa nisikiye kwamba musumama urembo mukiwa na kusuḍi modza, na mukiwa kuiheheani kwa umodza hi faro yenu mwiyonayo kwa haya Maagu Mema.

Wafilipi 4:1

D̯ubva wandugu zangu watsakwa, gijani kumuserefat̯a Ḅwana dzevyo. Mimi nina kaja ya kumuona muno! Munakaa na kunitsekeza muno na nakaa na kudzihonga nanywi muno!

Wafilipi 4:13

Naweza kuit̯isa kwa hali zonse kuchiiya na kwa Kirist̯o eyenanimpa nguvu.

Wakolosai 1:23

Ela ni had̯i mugije kuyahikiza haya Maagu Mema muyasumwiijweyo, na muyagije gu. Ni had̯i mutseyayekeza haya madzikwat̯yo ya Muungu ayamumpiyeyo kuyawana na haya Maagu Mema. Haya ni yayaḍe maagu mwiyosumwiijwa dzuu ya Kirist̯o, yeyokusumwiijwani lumwengu yuzima. Nami mimi mwenye ni mumodza jwa hawaḍe weokuhumikani kwa dzambo ḍya haya haya Maagu Mema.

Wakolosai 4:12

Epafuro, muhumisi jwa Kirist̯o Yesu, kuyawa mudzini kwenu, nae kamukedhya nto. Kakumuyombeani muno kwamba Muungu amumpe kungora kiruhu, na muwe na uhakika wa hivi vya Muungu evyonatsaka muhende.

Wakolosai 4:2

Gijani kuyomba kut̯wa. Na mukwakuyombani, chimizani na mukae mukimuyaviza ḍuḍa Muungu.

1 Watesalonike 3:8

Na kwa kwamba amaale mugija kumuserefat̯a Ḅwana, nangaa naswi le sasa hunapata sinzizi.

1 Watesalonike 5:6

D̯ubva swiswi, nahutseewa kuyaani dza hivi vya hawa wantu wangine wevyokuyaani, ela nahuwe matso na huwe wantu wa kudzimiza.

2 Watesalonike 2:15

D̯ubva wandugu, yagijeni na nguvu haya mayongweezo humuyongweezeyeyo hwipfokuwa huko kwenu na hayaḍe huyamworeeyo ḅaruwani.

1 Timoteo 6:12

Dza vya muntu jwa mbio evyonamuud̯ama akiwa kud̯aramani, nawe henda mala wiyonaweza uwe Mukirist̯o wiyenahikizika, upate kupata t̯ubvo ḍya maisha ya kuunga na yuungo. Koro ndiyo maisha ya Muungu akuhaniiyeyo, wipfot̯ima faro yako usoni ya mashaahiḍi wenji na wenji.

2 Timoteo 2:1

D̯ubva wewe mwanangu, haya matsako ya Muungu hwiyonayo hariani mwa *Kirist̯o Yesu, nayakungize nguvu.

2 Timoteo 4:5

Ela wewe, zigwaze akilizo kwa kula hali. It̯isa mad̯inani, ugije kusumwiiya haya *Maagu Mema. Henda kula kintu chichonakumala kuhenda dza muhumisi jwa Muungu.

2 Timoteo 4:7

Dza vya muntu jwa mbio, nihenda kula niwezeyecho na hizi mbio nizid̯arama nizisa, na faro yangu sikuiyekeza.

1 Pet̯ero 4:7

Mwiso wa lumwengu umaawa hafufi. Ndookomu ni had̯i muzigwaze akili zenu na muwe wantu wa kudzimiza ili muweze kukaa na kuyomba.

1 Pet̯ero 5:8

Pfyenuyani matso na muchimize! Koro huyu nyabva jwenu, Shaat̯ani, kakuzingani dza nsimba eyekuvumiizani, akilacha muntu jwa kumuḍya.

Upfenuo wa Yohana 16:15

“T̯asikiani! Mimi nakudza dza mwivi, saa musiyokuwa kuniindiani. Kadzawa na tsekea iyodze, huyuḍe adzeewa matso na avwaiye nguoze t̯ayari ili atsekudzatsumpa vivi aajae!”