17 Itïlil chane ompö man, ngölyontengu nyo le man.
“Ichinyi Tororöt we Echotyon TORORÖT, akï pö man ngaleku akeyomiswaninyi ye kïyï karam.
Onyorunan ngöghomnyö onyorchini kinetutköku, kïlenyona otöghan otöp anka löwïr nyo pö putintön.
Kororchan ngölyontengu mïkulöwunyan, tömawunyi ngokï.
Pö man kirwokutköku kokay, konante pköchin atosöp.
Sïrumpeto ngölyontengu kï man, pö man akï pö kokay kirwokötengu.
Muköy chumwaka kïrip söpenyi kïtïlilit lö ne? Muköy ato rip ngölyontengu.
Kighönöy ngala ECHOTYON, lata chane silpa cho kakïsita mapa kopan aketïlil ompö mayoni kïrelit.
“Anyï kinetutyo körkeyïnoni: kösïghyonte kï ngölyonto Tororöt.
Kïnyïl kösïghechay kichïnchï nyïngwïtyan nyo akwagh kï pich cho lïmöy ngölyonto Tororöt akïkomönchï mïkulögh nyo ghanat, akï nyo karam, akïmïkukön ntökïyï akwa.
Kaketïlilokwa ompö ngalechaye kökomwowokwa.
Kotïlilön kegh ompö chane atokumï chane tïkwïl kutïlil kegh ompö man.
ankïtukwa nyu ngala man, atökwighakwa ngalechoni pö man atalïkuna pich cho tyokote.”
Wölo omökekwa ye otïghanïn otini komwowokwa ngala man cho kyalïman Tororöt akimelö kigh Apraam lenyoni!
Akimatarechanye kesisituna nko chane. Kilöstoghchï chane ngokikwa ompöwölo kighan.
Kïlenyona nyu, kiportocha löwïr cho tomöcha keyenö tokochwecho ororyo Echotyon le ato kïsïwïyegho kiyo, wöghökecha nyu ororyononi ngwïno wölo mi Echotyon (Nyoni kï Mïkulögh) kekara kegh nko nyinte lasiny, ompö ororyö nyo wow tya.
Kyalïmakwa ngalechi nyoman, kïkany otini kyalïkukwa rïpankachi, kenetokwa ngala man cho mi oripö Yeso.
Kigh lenyoni atökïmwat akutïlilchï Tororöt kanisa otini kikikuwany kuwunö pögh nko ngölyontenyi,
Mïchinecha keyokyine Tororöt sörö kïnomnyö ompö akwa, tupchenicho akwa chona kichamak Echotyon, ompöwölo kikïlakwa Tororöt kïngeta towunöt atonyorunö sörunöt ompö owesyo Mïkulögh atökeghakwa alïkuna pikachi cho tïlilöch ompö kighanat nyo pö ngölyonto man.
Kïlenyona nyu, omötenö otöp anka tïkwïl nyo le sïmnyon nko otöptin löwïr cho ghach. Atacha ompö rïngata kegh ngölyontonay kikinetakwa akï nyo muköy kïsöru mïkuliskökwa.
