30 Itek Eme le ato kyoporunyi ompö kutïng.
Kïlö pöytoghin Daudi, “Mi chï löwïr tötut cho kikir kïrïp kegh nko ngala ECHOTYON cho kikonanïn amwa.”
Iros lö keghanyi le ato kyoporunyi ompö kutïng.
Techa köyï le otini oporunyi wölo töptoy kot nko tïkwïn cho kitöni ori.
Imolonyi pölöwe koltin aighonyi koropetine koltin cho nömöy pïrompurkö cho kïmolo tïkwïl.
Igha ato kïpelo amöros santukï nyo pö ket, lenyini kikiporunyi ompö kutïng.
“Itarang Ema nyo mi ECHOTYON* ompö asispa tagh arawa tagh.
Atolapay kïpa pipö Koat cho kisïtöy tïkwïn cho tïlilöch, kïnya ketek Ema kïtomö kwitïta chane.
Kikigha ket pö kitömöw koltin kïngeta ngwïny ntökwit parak, kïrïp kegh lenyini kiporchï ECHOTYON Musa.
“Kitïng papotïnecho ema söwintön ompö sïrkwen. Kikigh emanoni kïrïp kegh nko wölini kimwochï Tororöt Musa kwigh kïlïkwï, kïrïp kegh nko körkeyïn nyo kökikïsïwa Musa.
Pöghisïyi nyinte le Tïsin nyo Wow ompö Wölo Tïlil Tya,* nyoni kï orito emanoni pö man, kitek Echotyon amelö ptangengmöt.
Lata ighisyononi pö tïsï körkeyïn akïlata rurwö nyo pö tïpö yïm. Karkegh nko wölo kilata Musa ato kimököy kïteköy ema, kïlenchï Tororöt, “Irosïta lasiny aigh kïgh anka tïkwïl kïrïp kegh nko körkeyïnay kisöchinyi kutïng parak.”
Ato kimïchï ketïlilö tïkuchï le körkeyïntino tïpö yïm ompö aranoni, kïmököy nyu tïkuchoni pö yïm amörostin cho karamach tya.
Atolapay kïtuyechï nyoryogh kïmïkul nyo pö pipö Israel Syilo akïparta Ema nyo mi ECHOTYON* otini kikïnam korononi.
