3 Mamas meywon ompö kirwok.
“Mamasa man pikökwo cho le mey ompö kirwokengwa.
Melö karam ketököwï mwokïyon, anta kïmas chi pö man ompö kirwok.
Memasa mey tïkukwa lö ompöwölo mey chane, anta iwira ngal chi nyo nyorïlöy ompö ka kirwok,
Heywey! Ochech pich cho chikyini pich kiyomisut cho melö pö man nko kikirï cho kiru ngal cho rïmöy piköchan!
“Merop kamas ompö kirwokutköku. Mesyonchï cho le mey anta iwagh sïkön. Irwokyï pöröryengu ompö man.
Onkïtön lö tya lelutkökwa nko wölo tenö ngokikwa, akwa cho onyörilöy kong pipö man, achengoy chane asoya, atïtïpöy ngala ptankeryan ompö kokwö.
Morïwochï wop anka otini omutöy ngalekwo. Oterchï pich cho mïnkech nko cho echön ompö man. Marey chi nyonikïny, ompöwölo pö Tororöt kirwokö. Kïkany ato mi kirwokö nyo kepölokwa opï wölo omitan, atateran.’
Makany kïmas chane ngala man amakany kïrïwochï wop akonga anta cheng asoya, ompöwölo konyi pich cho ngöghomöch, akuryal ngala man.
Wölo nyo pö tagh, ngöghomnyö nyo ngwïno yïm kï tïlil, tïng kalya. Talase, teröy ngal akïyongöy pich. Tïngeto kisyonöt nyo wow akuyinu akwa cho pö ighisyewut cho karamach. Mötïngnye kïltagh anta lïs.
