7 Kipel chane Kongu nyo tïlil akusïmnyon ataye kïsogheninyi.
“Kepuntö ye nyu ECHOTYON kiyomisötenyi nyo kimwa. Kotöpan ngacharuto paponyu le pöytoghintö Israel, akyatekan Kö pö Tororöt nyo kïsogho ECHOTYON, Tororöt pö Israel.
Akïpel Kö pö Tororöt nko kö pö pöytoghin nko korïn löwïr cho pö Yerusalem nko kö anka tïkwïl nyo ki wow.
Kïpel Kö pö Tororöt akurultö nïyetwo Yerusalem akïpela ma kori pöytoghin cho pö paytagh akunyar kari löwïr cho pö olyot nyo wow.
Kenyaranyi mumengu nko mötworintengu kepurpurenyi sonkolyenyi terïtyon.
Otekwanïn ompö nyïngwïtyan ato kïpelo amöros aikonï amörostinekwa cho kïpelöy nko cho pö pöghisyö cho pö kechiryekwa nko twakwa. Ompö wop anka tïkwïl wölo kaghan kesaghenanïn ongwïnchinokwa nyu operurokwa.
Kikuwur ma kongu nyo tïlil, wölo kisogho akïsöleninyi papotïnecha. Kikïlïkwï kïratis wölo kikïchömecha löwïr.
Atolapay kïpela ma Kö pö Tororöt nko kö pö pöytoghin nko korïn löwïr ompö Yerusalem. Kimöminye kö nyo wow nyo kingötï makïpel.
Kinyar Echotyon kestoni pipö Yuda lömïs, amelö kisyonchï ompö nyo le akonga, kirultö nïyeti kanasyantengwa cho kigheto kegh pung. Kipchï korononi nko pöytoghichi arasï.
Kiraprap ECHOTYON konyi nyo pö saghat le söpoto par. Kitagha ECHOTYON Sayon kïkonyït ichontin nko Sapato.* Katagh tïkwïl pöytoghin nko tïsin anka tïkwïl ompö nörekyenyi nyo ngwan.
lenchinö pipö Israel, lentöy Echotyon TORORÖT: arosa osïmnyonan Konyan nyo tïlil. Wonyot kiwulata owesyenkwa nko tïkwïn cho okwolokwa kegh nko cho ochömekwa löwïr.
Opunan pipö punton cho ghach nyoman kïpka kïmang korikwa, owonyan owesyengwa nyï kwolo kegh, akesïmnyon korikwa cho tïlilöch.
Onyoran kanastinekwa arultan korikwa pö saghat. Amelö tökïnguchinanïn nyo karam tïkukwa chay onyïn.
Kïnarek pöytoghintö akïyonta askarinechi kïpa kuwany pörichini akïpel kanasyantengwa.
Opetekwa wölo porwokwa ECHOTYON Tororötïngwo ompö ortïnekwa ompöwölo lïku atoni möngenyi, wölo opkonekwa osogho nyinte.
