9 Nya kelokyï tïsiku man, akuteghyö piköku ompö ngörekyö!
Ngeta ye nyu, we ECHOTYON, aiwö wölo imungo, nyi nko Santuku Muma, nyoni kï macheypa owesyengu. Nya kulach tïsiku sörunöt, we ECHOTYON Tororöt, aikany kïngörekyö cho ghöninyi ompö köromnyengu.
Kyalakan man le sïra kyalakan kirwoko man le kalacha nko syolöp.
Sala ECHOTYON, we söpontanyu! Ichinyi wow tya, we ECHOTYON Tororötïnyu! Ilokyinenyi kegh konyït nko ororyö,
Olokyinan tïsichi sörunöt, tumöy pikachi akuteghyö ompö ngörekyö.
Nya kïngörökyï pich cho ghönote ompö rïntaghtangwa akïtumö pöröyunekwa ompö ngörekyö.
Arapacha morikwa löwïr, puntonï! Asala Tororöt ompö kutïw cho echön.
Wölo ngörekyot pikachi akïturönchï nyinte, ngörekyot chane akïtum ompö turönöt.
Nya kïturonchö akïngörekyö pïchoni löwïr mi orinyi. Nya kïmwa chane cho chömöy sörunötengu lö, “Wechï wow Tororöt.”
ECHOTYON kï pöytoghin, kelokyï kegh ororyö nko owesyö. Kegh ECHOTYON ngwïny kïchïchïm amelö timtimo nyonikïny.
Oturönan nyoman ompö ECHOTYON, ngörököy söpontönyan akwompö Tororötïnyan. Ompöwölo kelokwaninyi sïro pö sörunöt, ailumenaninyi sïra kitenat, le chi pö kensyö nyo kimina kegh sïrenyi nyo pïchigh, anta mïraru kensyö nyo kilaka karïn nko kaymoris.
Tumöy chane ompö ngörekyö, wölo orirsokwa ompö nyarïl.
Nyi we Sayon,* tumö! Tumö ompö ngörekyö kelïm! Nyi we Yerusalem, ngaraka aiturön ompö mïkulöwungu kïmïkul!
Akwa pipö Sayon,* ongörekyenö nyoman! Akwa pipö Yerusalem, oteghyenö ompö ngörekyö! Anyona pöytoghintenkwa ketï! Ketï ompö turönöt nko rïntagh! Talase nyinte akï wegho sïkïryö akï sïkïrye nyo le moda!
Wölo nya kïlïkwï Echotyon Yeso Kristo* longa nyo ripekwa, amotö porwöyikwa pöroyïn kwigh lenyini köpïrchï kwigh.
Kïlenyoni tïkwïl ompö akwa chumwak, mïchinokwa oterchinö poyi kanisa. Akïmïchinokwa lapay alïkuna pich cho tölose atopöghisyechinö kegh akwane, ompöwölo lentöy Kikirut, “Töghöy Tororöt menot, wölo töni pöropchö pich cho tölose.”
Kikïchömchï Tororöt mïraranoni kulach sïra katani nyo pïchigh nyo kwerkweröy.” (Sïranoni pö katani pïchigh kuporu ighisyewut cho karamach cho kighöy pö pipö Tororöt.)
Nya kuwonyö punköku, we ECHOTYON! Wölo ikany kulïwï kongotiku le asis otini kapusï ompö owesyenyi. Kïnyorï korononi kalya ompö könyis tömönut angwan.
