6 rumu nyinte kïtopönöy yïmwöy kurel ngwïny to.
Melö tigho kegh Tororöt ompö pikachi chini tïlilöch amelö tïlilöch yïmwöy ompö konyichi.
Ompöwölo sïwïyi nyinte söremwok pö ngwïny akïsïwïyi kïgh anka tïkwïl nyo mi ngwïnyi yïm.
Melö ghönöy Tororöt ompö chini le mötworichi akïnyorchini lelut ompö chini le malaykenichi.
Mito ECHOTYON Konyi nyo tïlil akïmitoni ngacharunyi nyo pö paytagh wölnö le yïm. Topönöy konyichi pich löwïr akunkït kïgh nyo ighöy chane.
Kïrkegh kemitenyi parak irosenyi cho tölose, wölo itopönchinenyi menot wölo low.
Rosuno nyinte ngacharunyi nyo pö paytagh, sïwïyi ptangengmötin löwïr cho möngöy ngwïny,
“Ochan Tororöt nyo Tïlil nyo omitö parak, nyo ochï satate kokay. Omöngan wölnö tïlil le parak wölo omöngan nko pich tïkwïl cho tölose, cho tötoy ngokikwa, atoyokyan chane nyakanat nko kikönöt.
Kiwit nyinte tyonkïn cho kilata lyopöt. Kitïng anka tïkwïl ompö chane köpepoy mut nko akonga. Kiluma kïgh anka tïkwïl tokochunyi köpepoy odeny, akuluma portanyi köpepokö walaka odeny, atolapay kupilö köpepokö chinö walaka le odeny.
Ani kegh nyo kyagh wölnö le mïröt kïmïkul! Ochan ngarakate ompö pich cho ipöy kegh ngwïny akïkötoy lelutkökwa akuwöghanïn akïterwanïn ngalechu.
