17 Atolapay kïtorchï pïchay löwïr chela osis sömök.
Kïkïl wowïn pö askarin Yosep kïpöghisyechï chane akïtïpï chane osis cho te wölini le chela.
Kïlenyona kïtep pïchay rötote kimi chela nko nyinte ompö koto echotyontenyi lö, “Ompö ne totïngetenökwa kisusut asisete?”
Kimi asistanka ato kinörekyaninyi nko chichay wowö pich cho ripöy omisyewut aikörchechanyi chela, ketïpicha kö pö chichay wowö askarin cho le ripï.
Keghchinyi mötworintengu nyo karam, we ECHOTYON, kïrïp kegh nko ngölyontengu.
Tuyot Tororöt chane löwïr ompö pïrïm le mampustin. Körchini chane chela ntökwitïta asistangwa nyo pö kichopat.
Kikïrötyï nyinte chela ntökïtenö kuporu ECHOTYON machatenyi wölo kidoy.
Kïlenyona, kenam pïchay aketorchï chane chela ntökïyech, ompöwölo kökikwimön.
Kïnam kiyoktoghichay akïtorchï chela.
Kitönecha papotïnecho sitöt cho kiyiyecha osis cho ngörï kïle wölo kisïweghta chane lö roko. Wölo sitöt Tororöt nyo konecha kïtïng kinyiwut, tökemuka kepara tïlilyenyi.
