NGONGUT 17:12 - PIPÏLIA

¹² “Kuyechay le taman kesïwenyi, kï pöytoghï taman cho tomöcha kutor kïpayta, wölo kitöni chane owesyö nyo pöytoy nko tyonyoni ompö sa akonga.

NGONGUT 17:12 ပူးပေါင်းရင်းမြစ်များ

DANIEL 7:20

Akyamachan onkïtï tïkwïl kuyechay le taman kimi mötïnyi nko kuyöghonay kichumï akwigh chay le sömök kïchïntoy. Kitïng konyïn nko kut nyo kingölonöy ngala menotön, ki wow nyoni kïtïl chay walaka löwïr.

DANIEL 7:24

Kuyechay le taman kï pöytoghï taman cho ngetöy kïpöytoy pöyunötononi. Wölo chumu anka nyo sis ompö chay löwïr pö tagh akuchunta nyu pöytoghï sömök.

NGONGUT 10:11

Atolapay kelenchanïn, “Mïchininyi ngat omchinö pich lö ne nyo kitötyï Tororöt pipö koros cho chang cho ngölonöy kutïw cho sisinchö nko pöytoghï lapay.”

NGONGUT 12:3

Atolapay kïrumunö töngönchintö anka yïm: ntara wow akï pïrir nyo kitïng mötöw mut nko odeny nko kuy taman akimi tenta mötöwichoni löwïr.

NGONGUT 13:1

Atolapay asïwan tyony nyo kipusuna nanam nyo kitïng kuy taman nko mötöw mut nko odeny, akitïng kuyöghö anka tïkwïl tentenyi. Kikirchï kaynata kimwoghsyö mötöwechoni.

NGONGUT 17:16

Reyöy cheporestanoni kuyechay le taman nko tyonyoni kisïwenyi. Chengöy chane cheporesnoni sïro nko kïgh anka tïkwïl nyo tïng akïpïstö nyinte kïchïrut atolapay kwam panyechi akïpela ma portanyi lömïs.

NGONGUT 18:10

Ghyongo pöytoghichoni ato low, ompöwölo wöghöy lö nyorwech ana nyarïl pö kanasyantanoni akïlö, “Heywey! Nyarïl nyo tya nya wey ompö kanasyantanï wow pö Papilon! Ompöwölo ketunyi lawel nyarïltangu ompö kirwoko Tororöt!”

NGONGUT 18:17

Anyï ye lawel kangeteninyi mökosyengu lö weng!” Atolapay kughyongö low ipi melin löwïr ato nko rutoghotkökwa nko pich löwïr cho sïngo ighisyö nanam ompö melin atökïnyorï omisyengwa,

NGONGUT 18:19

Kïlösyï mötöwekwa terït akïlokyö akuteghyö kïlentöy, “Heywey! Nyarïl nyo tya nya wey ompö kanasyantanï wow! Kanasyan nyete nyo kinyorchï mökosyengwa pich cho pochï melin ompö mökosyenyi! Anyï ye lawel kapegha tïku lö weng!”