17 Reyokwa pich akwompö kaynenyan.
Nguyokwa pich tïkwïl akwompö ani. Wölo anka tïkwïl nyo ghyongtoy ntökwit söröm, kesöru.
“Kïnömekwa tökechopekwa kong aketïghokwa. Töghokwa koroswö löwïr ompö ani.
“Ochikwa soyönote ato chïpokwa pich akuchopokwa kong akïngalanenekwa ngal cho ghach ompö putintön, akwompö ani.
Reyokwa pich lapay akwompö kaynenyan, wölo anka tïkwïl nyo kömöghöy ntökwit söröm, kesöru.
Wïchtonokwa chini le ompö yïyikwa nko tupchenikwa nko pich cho pö orenkwa nko kongotïnekwa. Kïtïghokwa walaka.
Wölo ompö choni löwïr, mepotönye putyon nyo le ompö akonga ompö mötöwekwa.
“Ochikwa soyönote chona reyok pich, akeyonchok sany, kechïpok akemïnak akenyarenak kaynötut lö ochï pich cho ghach akwompö paraku Wero Chi!
Ntökochikwa pipö ngwïny, kötochömökwa ngwïnya cho ochï pikachi. Wölo ompöwölo melö ochikwa pipö ngwïny, wölo kyakïlenakwa ngwïny, nka nyoni ghöchinokwa ngwïnyinï.
Wölo ighwokwa chane ngalechoni löwïr, ompöwölo ochikwa piköchan, ompöwölo menkïtcha chane Tororöt nyini kiyokwanïn.
Kyanetan chane ngaleku, kurey ngwïnya chane, ompöwölo möpöcha chane ngwïny, le wölini mopoyanye ngwïny.
Memukönye ngwïnya kïyutonokwa, wölo yutonanïn, ompöwölo omwochinan nyinte kïnomnyö lö ghach ortinechi.
Ompöwölo oporchinan nyinte tïkwïn lapay cho mïchini kïsïkö nyinte nyarïl ompö kaynenyan.”
Kïlenyona, ochömonan kegh nyörkölelut nko chïput nko nyörilwok nko kinyarilata kong nko kiwongunöt ompö Kristo, ompöwölo otini ochan nyarkalal, kï atoni ato ochan awes.
Kïmitecha tapanpa meghat ompöwölo kighönecha Yeso kïnomnyö, atökumï söpontanyi tïkwïl kïrumteghö porwöyicha cho wonyot.
Melö kyomtocha kegh achane, wölo kyomtocha Yeso Kristo nyo le Echotyon, kïchicha achane mötworikwa ompö Yeso.
Ompöwölo kakekonokwa pöropchö nyo opöghisyechini Kristo melö ompö kighanat onkït, wölo ompö kiwongunöt tïkwïl nyo owongunonekwa nyinte.
Ongörekyenö ato mwaghakwa pich ompöwölo ochikwa pipö Kristo. Poru nyoni mi kïtöpo nko akwa Mïkulöwu ororyö akï nyoni kï Mïkulöwu Tororöt.
Onkïtön lö kimïkukönenyi nyoman, aiwongwï ompö ani akïtomönye aghachanyi.
