3 “Mam kïgh anka tïkwïl nyo le sïmnyon.
Ipö tyonkïn cho le mut nko odeny cho kyomöy nyo le kïrkït nko nyo sakate. Ipenyi tïkwïl tyonkïn odeny odeny cho melö kyomöy.
Pich cho petöy oghö kïlïtöy köpönot nko parsïkontin kïngönöy nko oy Pich cho omöy panya loturen akïyupöy suto panya tyonkïn cho le sïmnyon.
Olechan Ewo, “Echotyon TORORÖT, tomönye osïmnyonön kegh kïngeta ochan mïnïng nko ye. Tomönye kïlït kutinyan pempö meghan anta nyo kam tyony anta nyo le sïmnyon.”
“Olenchinö pipö Israel, Achï tyonkïn cho omekwa cho sötote ompö ngwïny.
Mam kïgh anka tïkwïl ompö tyonychï, atömalïkwï sïmnyon.
Kïlenyona nyu opesyenö tyonkïn nko törit cho melö sïmnyon nko cho le sïmnyon. Okïr kegh mam tyonkïn anta törit cho kyoghitön ompö akwa lö sïmnyon. Ato amakwa olïkukwa sïmnyon.
Ompöwölo kyolinyan nko Echotyon Yeso otïngetan man lö, möminye omisyö nyonikïny nyo lïku sïmnyon onkït. Wölo ato nonchï chi kegh lö sïmnyon omisyö anka, kïlïku omisyononi sïmnyon ompö nyinte.
Wölo ato lenchokwa chi, “Kakïropchï omisyonete körkeyïntin,” mam nyu omisyononi akwompö chichoni kikwowokwa lenyoni nko choghïn nyo karam.
Tïlil kïgh anka tïkwïl ompö pich cho tïlilöch, wölo möminye kïgh nyonikïny nyo tïlil ompö pich cho le sïmnyon cho puryö kighanat, ompöwölo kikesïmnyon kinonutkökwa nko pköchintöngwa.
