ISAYA 9:12 - PIPÏLIA

¹² Mito pipö Sirya kongasis, kïmi pipö Pilisti to, kingany chane kutïwekwa atökwam Israel. Wölo kïrkegh kighisyö choni löwïr melö kiwany nörekyo ECHOTYON, wölo tökughïtoy ewunyi kïnömöy sitenyi nyo mungoy pikachi.

ISAYA 9:12 ပူးပေါင်းရင်းမြစ်များ

2 PÖYTOGHÏ 16:6

Kïnam Resin pöytoghinto Edom osiswechoni kanasyanta Ela akïyon pipö Yuda cho kimöngöy kanasyantanoni. Kïmang nyu pipö Edom Elat atökïmöngöy nko nyete le ye.

2 OTÖPTINO OSIS 28:18

Kupokyï pipö Pilisti tïkwïl kïpar kanastina Syepela, Nekep* nyo mi koro Yuda, akikïcheng Pet Syemes nko Ayalon nko Kederot nko Soko nko Kestoni, Timna nko Kestoni nko Kimso nko kestoni akwigh wöloni kïlïkwï möngengwa.

TUMWÖY 79:7

Ompöwölo kapar chane piköku akunyar korengwa.

ISAYA 10:4

Kïpörokwa otini osetekwa anta kïrangakwa alïkuna mampustin. Akï kïrkegh keghisyö lenyoni, kïmelö wonyot nörekyo ECHOTYON, wölo tökïghïteghote ewunyi nyo nyete le ye.

ISAYA 11:14

Pokyini chane kwodeny pipö Pilisti ompö okumpö ta, akïnam cho möngöy kongasis. Poryegho pipö Edom nko cho pö Moap akïrïnta, atolapay kïterchï pipö Amon chane.

ISAYA 31:1

Heywey! Wechï kepotyö pich cho petöy koro Misri lö tökengarakech. Mito chane kutwoytoy kegh pipö Misri cho chang cho pö lïk nko karikwa cho pö poryot, cho lata: angoletin nko nkaritin nko askarin. Wölo metwoytocha kegh ECHOTYON, Tororöt pö Israel nyo Tïlil anta tep nyinte kungarak chane.

ISAYA 5:25

Kïnagh nyu nörekyo ECHOTYON ompö pikachi akughïtö ewunyi atö kunyaril kong chane. Potonchot kutïngkotï atökesupchï mïntïruch ortïna kanasyan le samï. Amelö choni opïn, melö wonyot nörekyenyi, wölo tökughïtoy ewunyi kïnömöy sitenyi nyo mungoy pikachi.

ISAYA 9:17

Nka nyoni nyu kïgh nyo ighöy Echotyon möchïwïtyö pikökwa cho le chumwak, amesyonchï pönonkökwa nko mïsïktinekwa, ompöwölo kighachitu pikö tïkwïl, akïngölonöy kutïweko pïchoni löwïr ngala sölwontön. Akï kïrkegh keghisyö lenyoni, kïmelö wonyot nörekyo ECHOTYON, wölo tökughïtoy ewunyi kïnömöy sitenyi nyo mungoy pikachi.

ISAYA 9:21

Poryot pipö Manase nko cho pö Epraim, atolapay kutuyö kegh akïporyeghö Yuda. Akï kïrkegh keghisyö lenyoni, kïmelö wonyot nörekyo ECHOTYON, wölo tökughïtoy ewunyi kïnömöy sitenyi nyo mungoy pikachi.

YEREMIA 10:25

Nya kutang nörekyengu punton cho melö soghinyi nko pich cho melö yonginyi. Ompöwölo kipar kuwany pipö ara Yakopo akuwur korenyi kïlïkwï kïratyan.

YEREMIA 15:7

Kakutïtekwa le morïro pagh, ompö kanastin cho mi koronete. Kotïghön monekwa awangakwa pikachu, ompöwölo mopïstekwanye ortïnekwo cho ghach.

YEREMIA 35:11

Wölo otini kitor pöytoghin Nepukadnesa kïporyeghö korenete, keryöwucha kewïnga kegh Yerusalem ompöwölo kiwöghecha lïko pipö Papilonia nko nyo pö Sirya. Nka nyete ye nyu kïmöngecha kanasyanta Yerusalem.”

YEREMIA 4:8

Kïlenyona, alaka sarankwachtin asönön ariryö, ompöwölo tomönye kïpïstecha nörekyo ECHOTYON nyo ngwan lakat.”

ESEKEL 16:27

“Ye nyu, okonokwa sitöt, achengenekwa kisoyönutköchan atolapay otonokwa mori melö relonekwa kong, ompö Pilisti cho otöptönkwa nyo pö cheporesnan.

ESEKEL 6:14

Omungan chane aghan korengwa kïlïkwï kïratyan kïtïl surkwen, kïngeta surkwen ntökwitïta Ripla tonkïtunö lö ochan ECHOTYON.

OSEA 7:10

Rwokyini pipö Israel menotönengwa kegh, ompöwölo kïrkegh lapay chaye keghisyö, möwöghökisyönye kïpkonchanïn ani ECHOTYON Tororötïngwa.

AMOS 4:10

Kyotyorwokwa sömewut le chay kimi koro Misri kyaparan monekwa ompö chok arangan angoletinekwa kïpa kor anka. Kyaghan oröryo kanasyantenkwa kïlïtokwa sörun, wölo moyokukwanye kegh wölo omitan. Mwoghöy ECHOTYON.

AMOS 4:11

Kyawanyakwa walaka le wölo kiwangta Tororöt Sodoma nko Komora. Kyalatekwa machey nyo kakïchengunö ma, wölo moyokukwanye kegh wölo omitan. Mwoghöy ECHOTYON.

AMOS 4:6

Kyokonokwa kömöy ompö kanastinekwa wölo moyokukwanye kegh wölo omitan. Mwoghöy ECHOTYON.

AMOS 4:8

Kirwata pich cho kiwonyö nko maral. Ngeto kanasyantanï kïpa nyinö kïyöroto pögh wölo mönyorïcha cho ghömöy, wölo moyokukwanye kegh wölo omitan. Mwoghöy ECHOTYON.

AMOS 4:9

Kyawiran parenikwa chepkïrïri nyo pö pekat lïku parenikwa pö sapipun surkwen, omöy talamnya ketikwa pö makany nko arol, wölo moyokukwanye kegh wölo omitan. Mwoghöy ECHOTYON.

SEPANIA 1:6

Onyoran pich cho yodo kegh löt amelö tökïrïpanïn. Onyoran löwïr cho melö pkonöy akïsomanïn ontöghoghchï chane.”

SEPANIA 3:2

Möterönye amöchömönye kiruröto ECHOTYON! Melö twoytoy kegh ECHOTYON, amörikönye Tororötïnyi.

KINONO KIRURUT 31:17

Onörekyinan chane tya asisoni apïstan awïnyan kegh chane atökewany. Nyoru chane nyörilwok cho pö otyogh, akutupï nyarïl kong, ato mi löt kïlö, ‘Ketwecha tïkuchï ghach löwïr, ompöwölo kakïpïstecha ECHOTYON.’