ISAYA 54:7 - PIPÏLIA

⁷ Kyopïstinyi nyo tangogh pat, wölo oyokunyi kaw ompö chomnyogh nyo wow.

ISAYA 54:7 ပူးပေါင်းရင်းမြစ်များ

TUMWÖY 106:47

Sörwecha, we ECHOTYON Tororötïnyo, aighamïtwecha kemïlisyeghenö koroswo punton, atökeyokuchanyi sörö akekwol kaynatengu nyo tïlil!

TUMWÖY 107:3

akïghamïtï kïpkana koros, kïpkana kongasis akïpkana ta akïpkana ewu löt akïpkana ewu tagh.

TUMWÖY 30:5

Töpo nörekyenyi nyo tangogh, wölo pö kokay köromnyenyi. Muköy lok kïtörengu ato le oghö, wölo itu kuti ngörekyö ato le tökwoghö.

TUMWÖY 30:6

Kyononan lö ochan ripote olan, “Möminye kïgh nyo timtimanïn!”

ISAYA 11:11

Pöghisyegho Echotyon ngat owesyenyi kuyokunö pikachi pïnotön ato itï asisoni kïmïlisyö korengwa cho kidong koro Asirya nko Misri ompö koroswo pipö Patros nko Etopya nko Elam nko Papilonia nko Amat nko koros cho mi nanam cho kiwit pögh.

ISAYA 11:12

Atolapay kïsyol ECHOTYON pentera nyo porchini pipö punton lö kaghamït nyinte pipö Israel nko cho pö Yuda cho kitoytoyö kïngetunö luchtin angwan cho pö ngwïny.

ISAYA 12:1

Itu asis ato otumekwa lö, “Osölinyi, we ECHOTYON ompöwölo kïrkegh kïnörekyaninyi, wölo kesaghsaghaninyi amelö tenörekyinaninyi ngat!

ISAYA 14:1

Tökusyonchini ECHOTYON pikachi Israel akïkïl chane ngat kïlïkwï pikachi kegh. Töni chane korengwa ngat. Pkonöy pikö walaka kïpïnchini koro Israel akïmang nko chane.

ISAYA 26:20

Ape pikachu atanga korikwo, apa akar kukotwekwo. Awïnga kegh kite, ntökïtenö kuwonyö sïngiryo Tororöt.

ISAYA 27:12

Ghömïtöy ECHOTYON aisoni pikachi kwakonga akonga kïle chi nyo seröy pagh nko morïr, kïngetunö Yuparet ntökwit sörömu Misri.

ISAYA 27:8

Kichop kong ECHOTYON pikachi otini kiranga chane korengwa akwigh kïlïkwï pïnot. Kiranga chane yomat nyo ngwan nyo kikutuna kongasis.

ISAYA 40:11

Yokwïyi nyinte kechiryechi le mösöwon, ghömïtöy nyinte wareko kechiryechi akïkasan chane ompö puwayichi, akïrang kamati kïpa mut.

ISAYA 49:13

Otumö yïmwöy! Aitegh ngwïnya ompö ngörekyö! Akanya kuteghyö kutïngkotï ntökïkörerisyö otini tumöy! Soghsoghöy ECHOTYON pikachi, syonchini chane ompö kiwongunötengwa.

ISAYA 49:18

Syolö mö aitopöntö airos kamas nko kamas! Kötuyö piköku akïmi pkonöy wölo imitenyi! Kwam ECHOTYON muma lö, kïle otini söpöy nyinte, ikwolonyi kegh piköku le korka, nyo kwole kegh karichi cho pö koyögh.

ISAYA 49:21

Atolapay atepan kegh nyu lö, ‘Ngo nyo kiyiywanïn monechï? Kemeghenanïn monïngö alïkwan sonö. Kikimïtanïn owö koro pïnotön wölo low, kï ngo nyu nyo kinam monechï? Kyongötwan onkït, kïpkana nyu onö monechï?’ ”

ISAYA 50:1

Mwoghöy ECHOTYON lö, “Olentekwa so kotulön pikachu, le chi nyo tyoköy korkenyi? Akwato ononekwa lenyoni, kunko nyu palaltina kityakat? Olentekwa so kyaltakwa ape koro pïnotön le ato oltoy chi monechi kïpa kïlïkwï sekey? Ewo, kyapekwa alïkwï nanam ompö ngokikwa kegh, kikitulokwa ape wölo low akwompö penyutkökwa.

ISAYA 56:8

Kikuyomisï Echotyon TORORÖT nyo kimïtuna pikachi Israel kïpkana pïnotön, lö tökumïtu nyinte asïyech pikö walaka kïtuyö nko chane.

ISAYA 60:10

Mwochini ECHOTYON Yerusalem lö, “Teköy pich cho menkïtönyinye ngat nïyetweku, akïpöghisyewunyi pöytoghikwa. Kïrkegh kyachopinyi kong ompö nörekyenyan, wölo oporunyi ye nyu chomnyenyan nko kisyonötenyan.

ISAYA 60:4

Topöne kamasungu köny tesïwena kïgh nyo mi kwigho. Kesup kegh piköku tökïpka kaw! Pkono werköku wölo low kïkösönu tipikwa le monïng.

ISAYA 62:4

Melö tökekuroninyi ngat lö, “Nyo kikepïstö,” anta kïkurö korengu, “Korka nyo kikechal.” Kïkuro kaynengu nyo rel, “Nyo ngörökyini Tororöt,” kekurö korengu, “Nyo kiketar.” Ompöwölo ngörökyini ECHOTYON, akeyitöy nyinte le santeto korengu.

ISAYA 63:7

Omwotïtonan köromnyo ECHOTYON, Osölan nyinte ompö tïkwïn cho keghwecha nyinte. Kesoyön nyinte pipö Israel kutö tïkwïn cho chang ompö kisyonötenyi nko chomnyenyi nyo pö kokay.

ISAYA 66:18

Onkïtön kinonutkökwa nko ighisyewutkökwa. Ongwïnan ataghamït pich pipö punton löwïr. Sïwïyi nyu otini kötuyö chane, kïgh nyo muköy owesyenyan kwighöy

YEREMIA 51:5

Wölo mopïstenanye, pipö Israel nko Yuda. Ochan Tororötïngwa, ECHOTYON Kimuktoghin, kïrkegh kinyïghï ghöyityö koro Papilonia cho kegh ompö tawu Tororöt pö Israel nyo Tïlil.

LOK 3:31

Melö pörchinecha patagh Echotyon kokay.

LOK 3:32

Muköy nyinte kwighecha kelokyenö wölo syonchinecha ompö chomnyenyi nyo möngötönye.

ESEKEL 36:24

Opunonekwa wölo mi puntonï aghamïtwekwa ompö koros löwïr apkana korengwo.

MIKA 4:6

Lentöy ECHOTYON, Oghömïtan asisoni chona ngwolsot aghamïtï pïnotön nko chona kyomungön.

MATAYO 23:37

“Heywey Yerusalem, Yerusalem nyo ipöröy werkoy aiwira koghïn pich cho köyonunyi Tororöt! Kyamachan kïnyïl cho chang omukyï aghamïtï piköku wölo omitan le wölo ghömïtyini kokoroch warechi köpepoy, wölo itaghanyi!

2 KORINTO 4:17

Kïnyorunecha kömpölelut ye atö ipkecha ororyö nyo tïlöy kinonutköcha löwïr, ororyö nyo mötïngnye söröm.

EPESO 1:10

Puntoy nyu Tororöt tötutyononi otini ketïta osiswö cho ighöy nyinte tïkwïn löwïr cho kikigh cho mi yïm nko ngwïny kïnam kegh lödak akïlïkwï Kristo pöytoghintengwa.

KINONO KIRURUT 30:3

Syonchinokwa nyu ECHOTYON Tororötïnkwa akuyokunenokwa puntonichoni löwïr kiyonchokwa nyinte akuperurokwa.

YAKOPO 4:6

Wölo wow tya pöropchö nyo konu Tororöt, kïle wölay mwoghöy Kikirut lö, “Reyöy Tororöt pich cho le menot, wölo töni pöropchö pich cho tölose.”

2 PETRO 3:8

Wölo mowutyeghö kïgh akonga tupchenichu! Möminye sisïn ompö tawu Echotyon kwenu asis akonga nko könyis elpu akonga, karkegh choni ompö nyinte.