ISAYA 41:9 - PIPÏLIA

⁹ Kyamïtwakwa apkanena kor wölo low tya, kyokurokwa apkanena söremwok pö ngwïny, alenchokwa, ‘Ochikwa mötworichan.’ Melö kyataghakwa wölo kyakïlakwa.

ISAYA 41:9 ပူးပေါင်းရင်းမြစ်များ

TUMWÖY 135:4

Kikïlchï kegh ECHOTYON Yakopo, kilïkwï pipö Israel mïlatenyi.

TUMWÖY 94:14

Melö pökoktoy ECHOTYON pikachi anta pïstö mïlankachi.

ISAYA 11:11

Pöghisyegho Echotyon ngat owesyenyi kuyokunö pikachi pïnotön ato itï asisoni kïmïlisyö korengwa cho kidong koro Asirya nko Misri ompö koroswo pipö Patros nko Etopya nko Elam nko Papilonia nko Amat nko koros cho mi nanam cho kiwit pögh.

ISAYA 14:1

Tökusyonchini ECHOTYON pikachi Israel akïkïl chane ngat kïlïkwï pikachi kegh. Töni chane korengwa ngat. Pkonöy pikö walaka kïpïnchini koro Israel akïmang nko chane.

ISAYA 41:2

“Ekï ngo nyini kimïtuna chi nyo awes kongasis, akwigh nyinte kïrïnta pungkachi ompö woptin löwïr? Ngo nyini töni nyinte owesyö nyo rïntegho pöytoghï nko pipö punton? Pöro chane chokenyi kïtïryalit le terïtyon. Toyegho chane kotichi le mopö cho kakut yomat.

ISAYA 41:8

“Wölo akwa pipö Israel, cho ochï mötworichan, ochikwa pich cho kyakïlakwa, ochikwa pipö ara Apraam, mötworintenyan.

ISAYA 42:1

Mwoghöy ECHOTYON lö, “Anyï mötworintenyan nyo kotönön owesyö, nyinte nyini kyakïlan, akï nyinte nyo ongörokyinan kanyïghitan nyinte mïkulöwunyu akï nyinte nyo ipchini man pipö punton löwïr.

ISAYA 44:1

Lentöy ECHOTYON, “Atera ngalechan, akwa pipö Yakopo cho ochï mötworichan, atera pipö Israel cho ochï kïlankachan!

ISAYA 45:4

Kyokurinyi ompö kaynengu akokoninyi konyït nyo wow, akwompö mötworintenyan Yakopo, ompö pipö Israel nyo kyakïlan, kïrkegh menkïtanïnyinye.

MALAKI 1:2

“Ochömokwa, wölo otepanïkwa lö, ‘Ichömechanyi ompö or ne?’ Oyokunan ante ECHOTYON, lö, ‘Ayo, melö so ki werpö chi akonga Esau nko Yakopo? Wölo kyachaman Yakopo,

LUKA 13:29

Pkono pich kongasis nko wölnö röytoy asis ta, kïpkana walaka wölno akumpur kwomisyö ompö Pöyunöto Tororöt.

KINONO KIRURUT 14:2

Ochikwa pich cho tïlilöch ompö ECHOTYON Tororötïngwo cho kikïngotokwa nyinte akakïlakwa ECHOTYON alïkuna pikachi kegh ompö kwenu puntoni walaka löwïr ompö ngwïny.

YAKOPO 2:5

Atere ya, tupchenichu! Kimakïlnye so Tororöt mey ompö ngwïnyinï kïlïkwï sïkön ompö kighanat atökïmïl chane pöyunöt nyo kikuyomisï nyinte pich cho chömöy nyinte?

NGONGUT 5:9

Kïtum chane tum nyo rel kïlentöy, “Mïchininyi chenge kitapï atemuta, apït möcheywechoni kikïngostö. Ompöwölo kikïparinyi, aipchinyi Tororöt pich ompö meghengu, pich cho kipkana punton kïmïkul, nko kutïw löwïr nko pich löwïr nko cho pö koros tïkwïl.

1 SAMWEL 12:22

Kikuyomis ECHOTYON lö, möpïstonekwanye, ompöwölo kikïlakwa alïkunakwa pikachi kegh.