12 Kitïryalit kanasyante, kikeriy kukotichi kunyorisyö.
Oteghenö ariryö akwa kanastina Pilisti! Omïghyenö, atyö akwane lömïs! Ompöwölo anyinö polta terïtyon kengwïna okumpö löt! Pipö lïk chane cho setu, amelö mi chi nyo körtoy.
Ompöwölo kïpökoktoy kö pö pöytoghin akesurö kanasyante kïtuwit. Kiwuröy keston nko nïyet cho kikïripsyegho akegh kïlïkwï möngot pö tyonkïn kokay. Lïku wölo tisonchegho sïkïröyi wuw akïlïkwï acheypa kechir.
(Wölo ropönchini takarïs wölo le wudïn atökengany kanasyante lö tawanka.)
Ani kegh nyo ontöghoghunyi, oporan kutïngkot ompö tawungu kïrumï or. Omïreghan kukotikwa pö taghöy kïlïkwï syawsyaw, atörotörön möröwekwa cho pö karïn kïmïrisyö.
Lentöy ECHOTYON, “Oghan Yerusalem kïlïkwï kïratyan nyo tuw, lïku köpönoti chepkonöw. Oghan tïkwïl kanastina Yuda kïlïkwï surkwen nyo puryö chi nyo möngöy.”
Wechï kalïkwï kïratyan kanasyanta Yerusalem nyo kimangate! Kikonyïtöy nyinte ngwïnya kïmïkul kanasyantanoni, wölo karkegh ye nyu nyinte nko korka nyo le mïsïk. Ki kanasyan Yerusalem nyo konyïtote ompö kanastin löwïr kalïkwï ye sekeyon!
Kisyonï ortïna cho petöy kugheghöy Sayon* puryö chi nyo weröy ortïnechoni osiswo ichontin ompö Kö pö Tororöt.* Möminye chi nyo kïsïwechini kukotichi, mi tïsichi lok ompö kiwongunöt. Kakichutsötö tipichi kwam nyarïl. Mi Sayon ngonïn nyo mamïnïng.
Kirulyö söpöghtino kukoti kanasyan kulum pakostina akerïngarïng keti kuköt kïlïkwï mïnchïran. Kakïrang pöytoghintenyi nko yetïntine kïpa pïnotön kapa koro punton wölo melö mi chi nyo netöy kirurut pö Tororöt wölo melö tökïnyoru werkoyikwa sïwïyagh nyo ngwïno wölo mi ECHOTYON.
Ompöwölo kipegha pich kutïng pö Sayon kuwes kalïkwï wölo pestegho chepkonöw.
Köngöy pipö Marot köromnyo ompö machat nyo wow ompöwölo kengwïna ghöyityö wölo mi ECHOTYON, tökurel kukoti Yerusalem.
Ompöwölo melö tökïlösot moyokachi, akïlekït kïnyorï Yuda ngalechoni, kikwitï kukoti Yerusalem wölo mi piköchan.”
Kïnarek pöytoghintö akïyonta askarinechi kïpa kuwany pörichini akïpel kanasyantengwa.
