2 “Wero chi, tïlo ne ket pö sapipu ket walaka ompö wuw?
Ketor makany kuyin, akïmi sapipun kïtopïkonöy akïwirï orösyon nyo anyïn. Ngeta nyu chamanenyu, nyonö rïpkante.
Nömwecha chepkonöw, chepkonöw cho mïnkech cho nyoröy sapipunecha otini katapïkan sapipunecha.”
Oröytan atang para akwa cho lata arol atotopön ket cho katapïkan ompö mpöghogh atasïwa lö kikïtapïkan keti sapipun akïtapïkan tïkwïl keti makomanka.
Kanya kewastena wölnö le pareni sapipun tökesïwena ato kikïngany tapïk keti makomanka. Oporuneninyi atoni chomnyenyu.
Otumö yïmwöy ompö ngörekyö! Otumö tïkwïl wölnö le ngwen! Otumö kutïngkotï nko ket löwïr cho mi wuw! Ompöwölo kösörï ECHOTYON Yakopo akïnyorchini nyinte ororyö koro Israel.
Wölo nyu kyakatkatinyi le sapipu nyo kyokïlchan kegh, sapipïyon nyo pö kösïghyon nyo karam. Kwompö ne nyu tewaghakenanyi inyara, ailïkwï sapipïyonto wuw?
Kungwïnchanïn ngölyonto ECHOTYON nyo lentöy,
Muko ketoni ketor akepöghisyeghö kegha kïgh? Anta cheng pich akwigh sökömöt nyo kiwusyini tïkwïn?
Wölo kingagh sapipunay ompö nörekyö akewirchï ngwïny. Kïkut yomo kongasis kïyam, kïmïrisyö morinkachi, akepela ma kuwonyö.
Kilenye Israel sapipu nyo pïchigh nyoman nyo yinöy akwechi kuten. Le otini kiyï sapipun kïlïkwï, kïtösöy tagh kïtekyini kegh wölay kïpelo amörostin. Le wölini kitas tagh korengwa kïlïkwï, kïminöy chane tïkwïl wölo sogho.
Kïlenyona kïngoröy Sayon le par akwompö akwa lïku Yerusalem kïratyan nyo kirul kutïkumö, akïpita wuw nyo wow Kö pö Tororöt.
Akwa saypras, olokyenö asönön! Ompöwölo kikerul keti tarakit! Kikenyar ketichay pö tösunöt nyo wow! Akwa keti apeta cho omi koro Pasyan, oriryenö! Ompöwölo kiketör ket kuwonyö ompö wuw nyo kidïrö.
