30 Kepar Pelsyasar pöytoghinto Papilonia aghononi.
Wölo ighisyot tïkuchoni kwodeny lawel ompö nyi. Kïrkegh kepöghisyeghenyi ponintön nyo wow lö ne, Kïmegheninyi santengu nko moneku.
Kïnaminyi lödak ngöghöp nyo kyorötyan arengu, we Papilon kïrkegh melö kinkïtönyi lö mi ne are wölo kyonyorunyi, atöninyi morichan ompöwölo kinyaghnyaghanyi kegh nko ani nyo ochï ECHOTYON.
Lentöy ECHOTYON, “Owïkunan pöytoghi Mede pkonöy kïpöröy Papilon otökisïyan ompöwölo kinyar Konyan. Alïta kotikwo! Ateka longoy!
Köryöwï kiyoktoghï kïtapanï kegh, ipchini pöytoghinto Papilon lökoy lö, lenchini kikepar kanasyantenyi ompö wop tïkwïl.
Ato sïru mutïnö owetan opöghöy chane opöghonan kumïn kïtömesyö kumes. Ruyot nyu nyo mötïny kïngetyö. Mwoghöy ECHOTYON.
Oghan kïtömesyö yetïntinekwa cho pö lïk nko piko lïk tömesyot tïkwïl pikökwa cho ngöghomöch nko kintöghoghï löwïr. Nyoru rïwön nyo mökïngetyonye kokay. Kamwaghan ante nyo ochï Pöytoghin, ECHOTYON Kimuktoghin kaynenyan.
Kïlenyona lïku ye nyu chane cho tagh kïpa pïnotön akuwonyö ichontino pïchay chïritöy kegh.
