AMOS 5:20 - PIPÏLIA

²⁰ Ayo, mötuwitunye so asisoni pö ECHOTYON lömïs, asispa kiwuröt, amöminye löpoyïn.

AMOS 5:20 ပူးပေါင်းရင်းမြစ်များ

ISAYA 13:10

Kimisöy kokelyan anka tïkwïl nyo mi yïm, akemis kïgh anka tïkwïl nyo lïwuno wölnö le mïröt, tuwitu asis otini kapusï, akï möminye löpoyïn nyo lïwuno wöloni arawa.

ISAYA 8:22

anta topön ngwïny, wölo mösïwïyicha kïgh, kïpoto kömpölelyö nko tuwïn, tuwïn nyo pö otyogh, wölini kïrorchini chane asïyech.

ESEKEL 34:12

Le wölo yokwïytoy mösöwontö kyakichi, oyokwïyan kechiryechan lenyoni. Osörunenan chane wölini kïtoytöyechï löwïr ompö asispa kïruntï nko turï.

YOEL 2:2

Asispa tuwïn nko wurönöt, asispa kapuret nko tuwïn nyo wow. Lenye ighot nyo kakikörkorchï kutïngkot parak, söpïch pö pich cho köromöch nyoman. Möminye kïgh nyo lenye nyoni nyo kikwigha astanka. Amökwighonye ngat ompö könyis nko pïnwöy löwïr.

OPADIA 1:15

“Kakïrich ato orwokyinan ante ECHOTYON pipö koros löwïr. Kïkany nyi we Edom, kiwunyi lenyini kighchinyi pikö walaka.

NAUM 1:8

Wongöy ECHOTYON pungkachi le puseryon nyo mamïnïng, tyortoy chane kïpa kïmeghö lömïs.

SEPANIA 1:15

Lïku asisoni asispa nörekyö, asispa nyarïl nko ngwonïn asispa kiwurat nko kiwonyogh asispa kuruntï nko tuwïn.

MATAYO 22:13

Kïlenchï pöytoghintö mötworichi, ‘Arata morïn nko kelyön awirchï sany wölo tuw. Lïku nyu rirat nko nyaghata kelat ompö kichïr.’ ”

MATAYO 24:29

“Otini kewonyö kinyarilata osiswechoni, meghöy asis amelïwunye arawa ngat nyonikïny, chïnuno kokel yïm aketimtimöy owesyotïno yïm.

YUDA 1:13

Karkegh chane nko mïrtino pögho nanam, cho mïlu pïchan nyo pö pöghisyewutkökwa cho pö arasï. Karkegh chane nko kokel cho pestotoy akï cho wetöy Tororöt kïkörchini wölo tuw lömïs kokay.

NGONGUT 16:10

Atolapay kïmïlchï malaykayanteto mut tïkwïn cho kimi pakulinyi paraku ngacharu paytaghpa tyonyay. Kuyen tuwïn pöyunöto tyonyay, kïsïr pich ngölyepkekwa ompö ngwonïn.