Gálatas 3:13 - TÄ̧DO Ä̧CUÄ̧ I̧HUȨNȨ

¹³ Cristomä hueähuä huȩnȩ tä̧bo̧cuä̧ ja̧ji̧ jȩpö̧ icuinä̧u̧jä̧. Chutä Cristo ujuturu rettö pä'ö hueähuä huȩnȩ tä̧bo̧cuä̧ ja̧ji̧ päi'önä 'corupä'i'inö. Huȩyu̧cuä̧ Huȩnȩ päa'a: “O'ca toi'önä daunä pȩ'o̧pö̧ ttu̧ju̧nä̧u̧ 'corujuo'ächätömä suropätö.”

Nuevo Testamento Uwotjüja

¹³ Crito-mä̧ weäwä wȩnȩ ukuotokü, usurä ȩmä̧wa̧jü̧ juei usurä ȩmä̧wi̧nü̧ ujutu jäwänä̧, ja̧'wa̧nü̧ jȩpü̧tä̧ ȩmi̧nä̧u̧jä̧. Wȩyu̧kuä̧ wȩnȩmä̧ pä'a: «Dio-mä̧ suronä̧ pä̧kua̧, ü̧jo̧kä̧ jäi daunä̧ 'korujuo'ächürümä̧.»

Gálatas 3:13 ပူးပေါင်းရင်းမြစ်များ

San Mateo 26:28

Pi̧yȩmä̧ ttö chucuoja ja̧'a̧, jareö huȩnȩ chiya pä'ö ucuturu. Pi̧yȩ chucuojamä eräcua'a recuätö ttö̧jä̧ suronä jȩttö̧ jȩpö̧ icua pä'ö.

San Mateo 27:5

Ja̧u̧nu̧ o'ca'a Judas ja̧u̧ pärätä icuinödo Diosrö ucuocuäcuähuodenä. Ja̧'hua̧nö̧ jȩpö̧, rä'opächö nu̧'ä̧u̧ icuinödo.

Hechos 5:30

Ucutu Jesúsru daunä pȩ'o̧pö̧ ku̧nu̧ cuä'ö icuinätöjä. Ja̧'hua̧nö̧ ja̧'a̧nä̧ ujutu tä̧do̧tö̧ mi̧nä̧ Ttä̧do̧ ä̧cua̧ Dios tto'ädinö Jesúsru.

Romanos 4:25

Dios hue'inö Jesúsru 'corupäi'a pä'ö, ujutu suronä jȩtö̧ imitähua pä'ö. Ja̧'hua̧ta̧nö̧ Dios Jesúsru tto'ädinö, ujuturu jȩa̧ pä'ö chutäcu ji̧nä̧ ji̧yȩtȩ huotö ta pä'ö.

2 Corintios 5:21

Cristomä yoröiso suronä jȩpo̧cö̧ pi̧nö̧. Juhuorö'inä ujuturu repe'ö, ya̧tȩ suronä jȩpö̧rö̧ jȩtta̧'a̧ jä̧'i̧nö̧'a̧nö̧ jȩpi̧nö̧do Dios Cristorö, ujutu tesetiyarö pä'ö. Ja̧'hua̧ta̧nö̧ ja̧u̧ru̧ esetö, Diosrö pä̧huä̧ rö̧jo̧mȩnä̧ adiunä tö̧ja̧cua̧ pä'ö jȩpi̧nö̧do.

Gálatas 3:10

Moisés hueähuä huȩnȩ tta̧'cua̧ huȩnä̧rä̧tö̧mä̧, Diostä ö̧tä̧bo̧tä̧cuo̧tö̧. Huȩyu̧cuä̧ päa'a: “O'ca toi'önä 'cuäopönä hueähuä huȩnȩ huȩyu̧cuä̧'tä̧nä̧ huȩyu̧cuä̧ päö ta'anö jȩpo̧co̧tö̧mä̧, Diostä ö̧tä̧bo̧tä̧cuo̧tö̧.”

Gálatas 4:5

Ja̧u̧ ja̧'hua̧nö̧ ichinö ujutu hueähuä huȩnȩ jȩpä̧tö̧rö̧ jȩpö̧ icua pä'ö, Dios i̧tti̧mö̧ päti'önä ȩma̧tö̧ pä'ö.

Efesios 5:2

Cristo ujuturu repeinö ta'anö, repe'äu ka̧cuä̧tu̧cui̧. Ujuturu repe'ö chutä iyähuinö cuä'ö tticuarö pä'ö, adihuä juäi ameu ta'anö sacrificio päi'önä jȩtta̧rö̧ pä'ö Dios ä'ca jo̧mȩttö̧, Dios esehuarö pä'ö.

Tito 2:14

Ja̧u̧mä̧ 'corupä'i'inö ujutu suronä jȩtö̧ jȩpö̧ icua pä'ö. Ja̧'hua̧ta̧nö̧ chutä i̧tti̧mö̧ päti'a pä'ö töcö icuinä̧u̧jä̧ churutä pä̧huä̧ rö̧jo̧mȩnä̧, adiu jȩti̧ya̧rö̧ pä'ö.

Hebreos 9:12

Chutä Cristo Ji̧nä̧ Isocu Adihuo̧ca̧cu̧ täcö do'ächinödo. Juhua'attö oveja i̧tti̧'i̧nä̧, päcäyä i̧tti̧'i̧nä̧ ttucuoja iyocödo. Ja̧'hua̧ta̧nö̧ chutä amönä ucuojatä iya pä'ö do'ächinödo. Chutä ya'utenätä do'ächinödo, o'ca toi'önä suronä jȩttö̧ jȩpö̧ icu. Ja̧'hua̧nö̧ jȩpö̧, kä̧cuä̧huä̧ i'co ȩmö̧ iyinä̧u̧jä̧.

Hebreos 9:15

Ja̧'hua̧nö̧ ja̧'a̧ttö̧ chutä Jesucristo ja̧u̧ jareö huȩnȩ tta̧huä̧rä̧cuä̧huä̧ i̧sa̧do. Cristo 'corupä'i'inödo, pä'äji huȩnȩ jȩtti̧nö̧ ka̧cui̧nä̧tö̧'i̧nä̧ suronä jȩtti̧nö̧ jȩpö̧ icua pä'ö. Ja̧'hua̧ta̧nö̧ Dios huoinä̧u̧'i̧nä̧ adihuä juäi kä̧cuä̧huä̧ iya päinö ttȩmä̧ pä'ö, 'corupä'i'inödo.

Hebreos 9:26

Ja̧'hua̧nö̧ jȩö̧ttö̧mä̧, pi̧jä̧ aditinö o'ca'a, rö̧ȩnä̧ 'corupä'i'aji. Juhua'acucö̧. Pi̧yȩ pä̧nä̧ 'cuäopa'anä, Cristo ya'utenätä ichö, amönä iyähuinödo sacrificio päi'önä, o'ca toi'önärö suronä jȩttö̧ jȩpö̧ icu.

Hebreos 9:28

Iso päi'önä Cristo ya'utenätä sacrificio jȩpi̧nö̧do recuätö ttö̧ja̧ suronä jȩttö̧ jȩpö̧ icu. Ja̧u̧nu̧ o'ca'a, pä'äji ta'anö i̧chä̧cua̧. Ja̧u̧nu̧ suronä jȩttö̧ jȩpö̧ icua pä'ö ichocö jä̧cua̧. Ja̧u̧ru̧ tta̧'ä̧rä̧tö̧rö̧ ȩmö̧ i̧chä̧cua̧do.

1 Pedro 2:24

Cristo ujutu suronä jȩtö̧ chutä jä̧ttä̧pä̧ya̧nä̧ ȩpi̧nö̧ daunä kä̧nö̧ 'corujuoächomenä. Ja̧'hua̧nö̧ ȩpi̧nö̧ suronä jȩpö̧ 'corupäti'a'acu. Adiunätä tö̧ja̧cua̧ pä'ö ȩpi̧nö̧. Ucuturu aditö icua pä'ö ubara ttu'inö.

1 Pedro 3:18

Iso päi'önä Cristomä ya'utenätä o'ca toi'önärö suronä jȩttö̧ jȩpö̧ icua pä'ö ubara ttu'u 'corupä'i'inö. Chutä yoröiso adihuä i̧sa̧ ja̧'a̧nä̧, ujutu suronä jȩpä̧tö̧mä̧ suronä jȩtö̧ jȩpö̧ icu, ubara ttu'inö Dios ö̧ja̧'a̧cu̧ ti̧'cha̧ pä'ö. Chutä idepämä 'corupäi'äja'anä, a̧'cua̧ru̧hua̧ pä'äji ta'anö tto'ächäji'ca̧ ki̧nö̧.

1 Juan 4:10

Pi̧yȩmä̧ iso päi'önä repeähuämä: Ujutu ä'canä Diosrö repe'ocotö pi̧nä̧tö̧jä̧. Chutä ä'canä ujuturu repeömä rö̧ȩnä̧ repea'attö, I̧tti̧rö̧ hue'inö suronä jȩti̧nö̧ töcö icua pä'ö.

Apocalipsis 1:5

Ja̧'hua̧ta̧nö̧ Jesucristo'inä ucuturu ppädäcua'a̧nö̧. Chutä iso päi'önä huȩnȩ huo̧juȩtö̧ ujuturu. Ja̧'hua̧ta̧nö̧ chutä 'corupäi'äcuähuättö ä'canä tto'ächinödo. Chutä pi̧jä̧ ttö̧ja̧ tturuhuotöttö'inä abonänö ju̧ru̧hua̧ hueähuänä. Chutä Cristo, ujuturu repe'ö. Chutä ucuojanä suronä jȩti̧nö̧ töcö icuinä̧u̧jä̧.

Apocalipsis 13:8

O'ca toi'önä pi̧jä̧nä̧ ka̧cuä̧tö̧mä̧, Cordero 'corupä'i'inö u̧ju̧närä̧'tänä, kä̧cuä̧huä̧ i'co cuyäru'tänä, Dios pi̧jä̧ aditinö mo̧ro̧ i̧huȩyu̧ti̧nö̧'tänä tti̧mi̧ jui'ätömä, ja̧u̧ pä̧i̧cua̧ i̧sa̧rö̧ esehuinätö.

Apocalipsis 5:9

Ja̧'hua̧ta̧nö̧ pi̧yȩ jareö ra̧huä̧huä̧ ra̧'i̧nä̧tö̧: Iso päi'önä ucutä adihuä i̧sa̧jä̧. Ucutä ja̧u̧ cuyäru'tä ȩmö̧, sellos jȩpö̧ cuicu'a̧nö̧ hua̧. Ucurutä sacrificio päi'önä cuä'ö tticuinäcujä. Ucutä cucuojanä Dios i̧tti̧mö̧ päti'a pä'ö ȩmi̧nö̧jä̧ o'ca toi'önä pa̧ja̧cu̧nä̧ ttö̧ja̧ttö̧'i̧nä̧, tti̧huȩnȩ pö̧nä̧ ucuocuätöttö'inä, o'ca juiyönä ötahuiyä ttö̧ja̧ttö̧'i̧nä̧, korotö tti̧rȩjä̧ttö̧'i̧nä̧.