2 Tesalonicenses 2:9 - TÄ̧DO Ä̧CUÄ̧ I̧HUȨNȨ

⁹ Ja̧u̧ ubo suronä jȩpö̧mä̧ ähuettä ujurunä i̧chä̧cua̧. Rö̧ȩnä̧ ttö̧ja̧ ttieru juäi, yapareu jähuä, jȩä̧cua̧.

Nuevo Testamento Uwotjüja

⁹ Jua̧u̧ ttü̧ja̧sa̧ surojütä jȩä̧kuä̧wä̧ i̧sa̧mä̧ Satanás-tä̧ ppädäkuäwänä̧ i̧chä̧kua̧; rü̧ȩnä̧ ujuruku i̧rȩbȩwä̧kua̧ ja̧'wa̧ta̧nü̧ señales-ku, jȩtto̧kü̧ juei jä̧'i̧jü̧ yaparetü jȩä̧kua̧.

2 Tesalonicenses 2:9 ပူးပေါင်းရင်းမြစ်များ

San Mateo 12:22

Jesús ö̧jo̧mȩ ȩpi̧nä̧tö̧do ya̧tȩ ä̧to̧ca̧rö̧. Ja̧u̧ ä̧to̧ca̧mä̧ i̧huȩnȩ'i̧nä̧ jui'inödo. Ja̧u̧ ubo espíritu su̧ro̧pa̧rö̧ ku̧nä̧ri̧nö̧do. Jesús ja̧u̧ru̧ aditö icuäji o'ca'a adiu topö ucuocuinödo i̧huȩnȩnä̧.

San Mateo 24:24

Recuätömä “Ttötäsä Cristo, ttö'inä Dios i̧huȩnȩ ji'äusä”, yapareu ji'äu ttichäcuotö. Jahuätömä rö̧ȩnä̧ ttö̧ja̧ ttieru juäi jȩttä̧cuo̧tö̧ ttö̧ja̧rö̧ yapareu jȩpö̧. Dios huoinä̧u̧ru̧'i̧nä̧ yapareu jȩttä̧cuo̧tö̧ ttesetatö pä'ö. Dios huoinä̧u̧mä̧ yoröiso esetocotö ttäcuotö.

San Mateo 4:10

Ja̧'hua̧nö̧ ja̧'a̧ttö̧ Jesús ädätinäcudo: —Satanás, täi. Huȩyu̧cuä̧ Huȩnȩ päa'a: “Chu̧ru̧hua̧ Diosrötä cua̧'cua̧ huȩnä̧ri̧. Ja̧'hua̧ta̧nö̧ ja̧u̧tä̧ päömä jȩpi̧,” —ädätinäcudo.

San Marcos 13:22

Recuätömä “Ttötäsä Cristo, ttö'inä Dios i̧huȩnȩ ji'äusä”, yapareu ji'äu ttichäcuotö. Jahuätömä ttö̧ja̧ ttieru juäi jȩttä̧cuo̧tö̧, ttö̧ja̧rö̧ yapareu jȩpö̧. Dios huoinä̧u̧ru̧'i̧nä̧ yapareu jȩttä̧cuo̧tö̧, ttesetatö pä'ö. Dios huoinä̧u̧mä̧ yoröiso esetocotö ttäcuotö.

San Lucas 11:25

Ja̧'hua̧nö̧ ppa̧huä̧cho̧mȩnä̧, ja̧u̧ i̧sa̧rö̧ po̧cui̧pö̧, jareönä juatö ttaditode jä̧'i̧nö̧'a̧nö̧ hua̧rö̧ topö ja̧u̧ ttö̧ja̧ i̧sa̧rö̧.

San Juan 4:48

Ja̧'hua̧ ja̧'a̧ttö̧ Jesús päinäcudo: —Ucutumä ttö̧ja̧ ttieru juäi tocu'ätucu juiyöttömä, esetocotöjä.

San Juan 8:41

Ucutu cuä'otucu jȩö̧'a̧nö̧ jȩpä̧tö̧jä̧. Ja̧'hua̧ ja̧'a̧ Jesúsru pä'inätödo: —Ujutu ka̧ra̧ i̧tti̧mö̧ huocotöjä. Ujutu ya̧tȩtä̧ tä'o ku̧nä̧rä̧tö̧jä̧. Ja̧u̧mä̧ Dios.

San Juan 8:44

Ucutu cuä'otucumä, ähuettä ja̧'a̧. Ja̧u̧ i̧tti̧mö̧jä̧ ucutumä. Ja̧u̧ru̧ pä̧huä̧ rö̧jö̧tä̧ jȩcu̧'ä̧tu̧cua̧ pä'ätöjä. Ähuettä ihueye ttö̧ja̧rö̧ cuä̧'ä̧hua̧ pi̧nö̧do. Iso päi'önä jähuä yoröiso jȩpo̧cö̧ pi̧nö̧do. Ja̧'hua̧ta̧nö̧ iso päi'önä huȩnȩ'i̧nä̧ ucuocuocö pi̧nö̧do. Yapareu jiähuomenä, chutä jö̧ ta'anö ji'äu. Ja̧u̧mä̧ ihueye ya̧pa̧rȩhua̧. Ja̧'hua̧ta̧nö̧ ja̧u̧mä̧ yapareu huȩnȩ kada'cado.

Hechos 13:10

Pä'inödo: —¡Yapareu jȩä̧cuä̧huä̧ i̧sa̧jä̧! Suronä jȩpö̧jä̧. Ähuettä i̧tti̧jä̧. Adiu jȩpä̧tö̧ tta̧bo̧i̧ya̧jä̧. 'Cuäopönä Dios iso päi'önä huȩnȩ pärotö icu, yapareu jicuhuähua pä'öjä.

2 Corintios 11:14

Ja̧'hua̧nö̧ pädomenä, koro koronö cuamöcuädätucuä'. Chutä Satanás'inä, adihuä isotö ángeles, tȩa̧u̧nä̧ cue'ächätö cuettächa'a jä̧'i̧nö̧'a̧nö̧ cue'ächö.

2 Corintios 11:3

Ä̧ca̧mä̧ yapareu jiähuomenä, Eva kesetinö ta'anö, ucutu'inä yapareu cuesetätucuäcuotöjäcö̧ pä'ö yȩ'ȩcua̧sä̧, cuamöcuädätucunä ji̧yȩä̧cuȩtä̧ adihuä huȩnȩ eseunu ucuocuäcuähuä jaropi'ö.

2 Corintios 4:4

Jahuätö ttesetoca'attö, ähuettä, pi̧jä̧nä̧ kö̧, ttä̧to̧cä̧chö̧nä̧ jȩi̧nä̧u̧do, adihuä Cristo i̧huȩnȩ tȩa̧u̧ tottö juiyönä. Ja̧u̧ Cristo, Dios ja̧'a̧nä̧ pi̧jä̧nä̧ uhuäpinödo.

Efesios 2:2

Ja̧'hua̧nö̧ jȩpö̧ cuecuhuächätucuomenä, pi̧jä̧ ttö̧ja̧ jȩttö̧ jȩpi̧nä̧tö̧jä̧. Espíritu pi̧jä̧ isoppanä hue'örö pä̧huä̧ rö̧jo̧mȩnä̧ jȩpi̧nä̧tö̧jä̧. Ja̧u̧ espíritu Diosrö esetocotörö hue'ö, suronä jȩtta̧ pä'ö.

2 Timoteo 3:8

Janescu, Jambrescu Moisésrö ttesetoca'a ji̧nö̧'a̧nö̧, ja̧'hua̧nö̧ jȩpä̧tö̧mä̧, iso päi'önä huȩnȩ esetocotö. Jahuätö ttamöcuädömä suronä amöcuädätö. Jahuätö Dios i̧huȩnȩ esetocotö.

Santiago 3:15

Ja̧u̧ huo̧juä̧huä̧mä̧ Diosttö ichoca'a. Pi̧jä̧ttö̧ huo̧juä̧huä̧mä̧, esetocotö ttamöcuädömä, ähuettättö icha'ado.

Apocalipsis 12:17

Ja̧'hua̧nö̧ 'cuäopomenä, ja̧u̧ ojuo da'ä jä̧'i̧nö̧'a̧nö̧ hua̧ ji̧nä̧ isocu ra̧huä̧ri̧nö̧ jahuäju isajuru. Korotörö, kahuaruhuä o'cotörö, Dios hueö adiu jȩpä̧tö̧rö̧, Jesucristo i̧huȩnȩ päö ta'anö adiu cue'ächätörö, örohuähua pä'ö 'chi̧nö̧.

Apocalipsis 12:9

Ja̧u̧ ojuo da'ä jä̧'i̧nö̧'a̧nö̧ hua̧rö̧, i̧sa̧rö̧, chutä täbocö ä̧ca̧ pi̧nö̧rö̧, ähuettä'inä, Satanás'inä pättäcuru, o'ca toi'önärö yapareu ji'äuru, ya'opö tticuinäcu. Chutäcu umöhuäyotöcu pi̧jä̧ rȩjȩra̧'a̧ do'opö tticuinäcu.

Apocalipsis 18:23

Lámpara'inä tȩa̧huo̧co̧mȩ jä̧cuo̧mȩ. Ttirecuarö ȩmö̧ fiesta jȩtta̧'a̧ yoröiso ä̧ju̧cuä̧cuä̧huo̧co̧mȩ jä̧cuo̧mȩ. Pä'äjitä ucuttu rä'opö, järe ȩmä̧huä̧ ruhuotö pi̧jä̧nä̧ korotöttö'inä abonänö juruhuinätö. Ja̧'hua̧ta̧nö̧ cumäri'änä jȩpö̧, yapareu jȩpi̧nä̧ju̧jä̧ korotö ttö̧ja̧rö̧ o'ca toi'önärö.

Apocalipsis 19:20

Ja̧u̧ pä̧i̧cua̧ i̧sa̧cu̧, ja̧u̧ ä'canä rö̧ȩnä̧ ttö̧ja̧ ttieru juäi yapareu jȩpi̧nö̧cu̧ cärenä rötinätö. Ja̧u̧ juäi ttö̧ja̧ ttieru juäi yapareu jȩo̧mȩnä̧, jitöja ttö̧ja̧, ja̧u̧ pä̧i̧cua̧ i̧sa̧ sello ttö'änä ta'ähuinätörö'inä, ja̧u̧ pä̧i̧cua̧ i̧sa̧ a̧'u̧cuä̧ esehuinätörö'inä yapareu jȩpö̧ ucuocuinö. Ja̧'hua̧ ja̧'a̧ttö̧ ja̧u̧ pä̧i̧cua̧ i̧sa̧rö̧'i̧nä̧, yapareu jȩpö̧ ji'ähuinörö'inä ji̧nä̧ tta̧'cua̧ra̧'a̧nä̧, do'opö tticuinä̧u̧ ocurä rö̧arära̧'a̧, azufrenä cuoarära̧'a̧.

Apocalipsis 20:10

Ja̧u̧tä̧ ähuettämä, jahuätörö yapareu ji'ähuinörö, ocurä rö̧arä azufrenä cuoarära̧'a̧, ja̧u̧ pä̧i̧cua̧ i̧sa̧rö̧'i̧nä̧, ka̧ra̧ yapareu ji'ähuinörö'inä do'opö tticuinarära̧'a̧, do'opö tticuinäcu. Juhua'a 'cuäopönätä, mo̧ro̧'i̧nä̧, yodo'inä ubara ttuttäcuotö.

Apocalipsis 9:11

Jahuätö cä̧'ö̧mä̧ ttu̧ru̧hua̧'i̧nä̧ ku̧nä̧ri̧nä̧tö̧. Ja̧u̧ ttu̧ru̧hua̧mä̧ reju beipocoju ángel pi̧nö̧. Ja̧u̧ i̧mi̧mä̧ hebreos tti̧huȩnȩnä̧ Abadón mi̧cui̧nö̧. Ja̧'hua̧ta̧nö̧ griegos tti̧huȩnȩnä̧ Apolión mi̧cui̧nö̧. Ujutu pä'ätöjä Be'epö Icuähuä I̧sa̧ pä'ö.