ତୀତସ 1:13 - New Testament in Pengo Parja Language

¹³ କ୍ରୀତି ଦୀପ୍‌ତାକେ ମାନି ମାନାୟାର୍ ବିଷୟରେ ୱେଚ୍‌ଚିମାଚି ଇ କାତା ସତ୍। ଲାଗିଙ୍ଗ୍ ହେୱାର୍ ଇନେସ୍ ଯୀଶୁ ଖ୍ରୀଷ୍ଟନି ସତ୍ ହିକ୍ଷାତିଙ୍ଗ୍ ପାର୍ତିକିନାର୍।

ତୀତସ 1:13 ပူးပေါင်းရင်းမြစ်များ

୨ କରନ୍ତିୟ 13:10

ଆନେଙ୍ଗ୍ ଇ ଚିଟି ମିତାକେ ୱାୱି ଆଗେ ମି କାଜିଙ୍ଗ୍ ଲେକିକିନାଙ୍ଗା, ଆନେଙ୍ଗ୍ ଆହା କିନାଙ୍ଗା ଯେ ଏଚେପାଦ୍ନା ଆନେଙ୍ଗ୍ ମିତାକେ ୱାନାଙ୍ଗ୍ ମାପୃ ନାଙ୍ଗେଙ୍ଗ୍ ହିତ୍‌ତି ଅଦିକାର୍‌ତିଙ୍ଗ୍ ବ୍ୟବହାର୍ କିଜି ଦଣ୍ଡ୍ ହିଦ୍‌ଦେଙ୍ଗ୍ ଦର୍‌କାର୍ ଆକାୟ୍। ଇନେସ୍‌କି ଆନେଙ୍ଗ୍ ମିଙ୍ଗେଙ୍ଗ୍ ବିନାସ୍ କିଦ୍‌ଦେଙ୍ଗ୍ ଇଚା କିଉଙ୍ଗା, ମାତର୍ ହେ ଅଦିକାର୍‌ତିଙ୍ଗ୍ ବ୍ୟବହାର୍ କିଜି ଈଶ୍ୱରତିଙ୍ଗ୍ ଆଦିକ୍ ପାର୍ତିକିୟାଟ୍ ଇଞ୍ଜି ଆନେଙ୍ଗ୍ ସାଇଜ କିଦ୍‌ଦେଙ୍ଗ୍ ଇଚା କିନାଙ୍ଗା।

୧ ତିମତି 1:10

ଇଦାଙ୍ଗ୍ ପୁନ୍‌ଞ୍ଜି ଯଦି ଇନେର୍ ମଶା ଲେକିକିତି ସାସ୍ତର୍‌ତିଙ୍ଗ୍ ଟିକ୍‌କିଜି ମାନିକିନାର୍, ଲାଗିଙ୍ଗ୍ ହେଦାଙ୍ଗ୍ ହାର୍ ଇଦାଙ୍ଗ୍ ଆପେଙ୍ଗ୍ ପୁଚାପ୍‌ନା।

୧ ତିମତି 4:6

ଏନେଙ୍ଗ୍ ଯଦି ପାର୍ତିକିନି ଟଣ୍ଡାର୍‌ରିଙ୍ଗ୍ ୱିଜୁ ବିଷୟରେ ହିକ୍ଷା ହିନାୟ୍‌, ଲାଗିଙ୍ଗ୍ ଏନେଙ୍ଗ୍ ଯୀଶୁ ଖ୍ରୀଷ୍ଟନି ର ହାର୍‌ଦାଙ୍ଗ୍ ହେବାକିନାକାୟ୍ ଆନାୟ୍। ଆରେ ଏନେଙ୍ଗ୍ ଇମ୍‌ଣି ପାର୍ତି ଆରେ ହାର୍ଦି ହିକ୍ଷାତିଙ୍ଗ୍ ମାନିକିୟା, ହେ କାତାକାଜିଙ୍ଗ୍ ଏନେଙ୍ଗ୍ ବେସି ଦରମ୍ ଜିବୁନ୍ କାଟି କିଦେଙ୍ଗ୍ ଆଡ୍‌ନାୟ୍।

୧ ତିମତି 5:20

ଇମ୍‌ଣାକାନ୍ ପାପ୍ କାମାୟ୍ କିଜି ଲାଗାନାନ୍‌, ହେୱାନିଙ୍ଗ୍ ୱିଜୁ ପାର୍ତି କିନାକାର୍ ମୁମ୍‌ଦ କେତା। ଇନେସ୍‌କି ଜେକନି ପାର୍ତି କିନାକାର୍ ପାଣ୍ଡ୍ରାଆଜି ମାନ୍‌ଗାନାର୍।

୨ ତିମଥି 4:2

ଈଶ୍ୱର କାତା ଶୁଣାୟ୍ କିୟାଟ୍, ସମୟ୍‌ତ କି ଅସମୟତ ପା କାତା ଶୁଣାୟ୍ କିଦେଙ୍ଗ୍ ରେଡି ଆଡ। ଏପେଙ୍ଗ୍ ପୁରା ଶାନ୍ତି ଆରେ ମାନ୍‌ଦିୟାନ୍ କିଜି ମାନାୟାରିଙ୍ଗ୍ ବୁଲ୍ କିନିହିଙ୍ଗ୍ ଟିକ୍ କିୟିକିୟାଟ୍, ପାପ୍ କାମାୟ୍ କିନିହିଙ୍ଗ୍ ରିସା ଆରେ ହେୱାରିଙ୍ଗ୍ ହାର୍ଦି ହିକ୍ଷାହିଜି ସାହାସ୍ ହିୟାଟ୍।

ତୀତସ 2:15

ଇ ୱିଜୁ ବିଷୟ କ୍ରୀତି ଦୀପ୍‌ତାକେ ମାନି ପାର୍ତି କିନାକାରିଙ୍ଗ୍ ହିକ୍ଷା ହିୟାଟ୍। ଏପେଙ୍ଗ୍ ହେୱାରିଙ୍ଗ୍ ପୁରା ଆଦିକାର୍ ହୁଦାଙ୍ଗ୍ ସାହାସ୍ ହିୟାଟ୍ ଆରେ ହେୱାରିଙ୍ଗ୍ ଟିକ୍ କିୟାଟ୍, ଏପେଙ୍ଗ୍ ଇମ୍‌ଣି ହିକ୍ଷା ହିନାଦେର୍ ହେ ହିକ୍ଷାତିଙ୍ଗ୍ ଇନେର୍ ପା ଗିଣ୍ କିଦ୍‌ମେର୍।

ତୀତସ 2:2

ଏପେଙ୍ଗ୍ ଆଗେ ବୁଡ଼ା ମାନାୟାରିଙ୍ଗ୍ ହିକ୍ଷା ହିୟାଟ୍ ଯେ, ହେୱାର୍ ଜାର୍ ଜିବୁନ୍‌ତିଙ୍ଗ୍ କଣ୍ଟ୍ରୁଲ୍ କିନାର୍, ଜେକନିକାର୍ ସନ୍‌ମାନ୍ କିତିଲେକେ ବ୍ଯବହାର୍ କିନାର୍, ଆରେ ବୁଦି ହୁଦାଙ୍ଗ୍ ବ୍ଯବହାର୍ କିନାର୍। ହେୱାର୍ ଈଶ୍ୱରତିଙ୍ଗ୍ ବେସି ପାର୍ତିକିନାର୍, ଜେକନିକାରିଙ୍ଗ୍ ହାର୍ଦି ମାନ୍‌ତାଙ୍ଗ୍ ଲାଡ୍ କିନାର୍, ଆରେ ୱିଜୁ ଦୁକ୍‌କଷ୍ଟତିଙ୍ଗ୍ ପା ସମ୍ୱାଲି କିନାର୍।