ଜହନ୍‌ 8:55 - New Testament in Pengo Parja Language

⁵⁵ ମାତର୍ ହେୱାନିଙ୍ଗ୍ ଏପେଙ୍ଗ୍ ହାତ୍‌ପା ପୁନୁଦେରେ। ହେୱାନିଙ୍ଗ୍ ଆନେଙ୍ଗ୍ ପୁନାଙ୍ଗ୍। ଆନେଙ୍ଗ୍ ଯଦି ଇଞ୍ଜ୍‌ନାଙ୍ଗ୍ ଆନେଙ୍ଗ୍ ହେୱାନିଙ୍ଗ୍ ପୁନୁଙ୍ଗ୍। ଲାଗିଙ୍ଗ୍ ଆନେଙ୍ଗ୍ ମି ଲେକେ ମିଚ୍‌ୱା ମାନାୟ୍ ଆନାଙ୍ଗ୍। ମାତର୍ ଆନେଙ୍ଗ୍ ହେୱାନିଙ୍ଗ୍ ହାତ୍‌ପା ପୁନାଙ୍ଗ୍। ହେୱାନ୍ ଇନାକା ଇଞ୍ଜ୍‌ନାନ୍ ଆନେଙ୍ଗ୍ ହେ ୱିଜୁ ମାନିକିନାଙ୍ଗା।

ସତ୍‌ ବଚନ୍‌ ପୁନି ନିୟମ୍‌

⁵⁵ ଏପେଙ୍ଗ୍‌ ଇନାୱାଡ଼ାଂ ତାଙ୍ଗେଙ୍ଗ୍‌ ପୁନୁଦେରା, ଆନ୍‌ ତାଙ୍ଗେଙ୍ଗ୍‌ ପୁନାଙ୍ଗ୍‌ । ଆନ୍‌ ତାଙ୍ଗେଙ୍ଗ୍‌ ପୁନୁଙ୍ଗ୍‌ ଇଞ୍ଜି ଜଦି ଇନାଙ୍ଗ୍‌, ମି ଲାକେ ଆନ୍‌ ପା ମିଚ୍‌ୱା ଆନାଙ୍ଗ୍‌, ମାତର୍‌ ହାତ୍‌ପା ଆନ୍‌ ତାଙ୍ଗେଙ୍ଗ୍‌ ପୁନାଙ୍ଗ୍‌ ଆରି ତା ବଚନ୍‌ ପାଲି କିନାଙ୍ଗ୍‌ ।

ଜହନ୍‌ 8:55 ပူးပေါင်းရင်းမြစ်များ

ମାତିଉ 11:27

ନା ଆବା ସରଗ୍ ଆରେ ପୁର୍ତିନି ଆଦିକାର୍ ୱିଜୁ ବିଷୟ ନାଙ୍ଗେଙ୍ଗ୍ ହିତ୍‌ତାନ୍‌ନା। ହେଦାଙ୍ଗ୍ କାଜିଙ୍ଗ୍ ହିମ୍‌ଣା ବିଷୟରେ ଆବାଙ୍ଗ୍ ପିସ୍ତି ଇନେର୍ ପା ପୁନୁର୍। ଆରେ ଆବା ବିଷୟରେ ହିମ୍‌ଣାଙ୍ଗ୍ ପିସ୍ତି ଇନେର୍ ପୁଞ୍ଜେଙ୍ଗ୍ ଆଡୁର୍। ଆରେ ହିମ୍‌ଣା ଇନେରିଙ୍ଗ୍ ବାଚିକିଜି ୱେଚ୍‌ଚାଙ୍ଗ୍‌ନା ହେୱାର୍ ନେ ଆବାଙ୍ଗ୍ ପୁନାନ୍।

ଲୁକ ଲେକିକିତି ଜିସୁ କ୍ରିସ୍ଟତି ନେକ୍ରିକାବୁର୍‌ 10:22

ନା ଆବାନି ଆଦିକାର୍ ୱିଜୁ ବିଷୟ ନାଙ୍ଗେଙ୍ଗ୍ ହିତ୍‌ତାନ୍‌ନା। ହିମ୍‌ଣା ବିଷୟରେ ଆବାଙ୍ଗ୍ ପିସ୍ତି ଇଦାଙ୍ଗ୍ ଇନେର୍ ପା ପୁନୁର୍, ଆରେ ଆବା ବିଷୟରେ ଇନେର୍, ହିମ୍‌ଣାଙ୍ଗ୍ ପିସ୍ତି ଇନେର୍ ପୁଞ୍ଜେଙ୍ଗ୍ ଆଡୁର୍, ଆରେ ହିମ୍‌ଣା ଇନେରିଙ୍ଗ୍ ହେଦାଙ୍ଗ୍ ପୁନିକିଦେଙ୍ଗ୍ ଇଚାକିନାନ୍ ହେୱାନିଙ୍ଗ୍‌ନେ ଆବା ବିଷୟରେ ପୁନିକିନାଙ୍ଗ୍‌।”

ଜହନ୍‌ 1:18

ଈଶ୍ୱରତିଙ୍ଗ୍ ଇନାୱେଡ଼ାଙ୍ଗ୍ ଇନେର୍ ପା ହୁଡ଼୍‌ୱାତାର୍‌ନା। ମାତର୍ ଈଶ୍ୱର ଲାଗାୟ୍ ମାନି ରକାନ୍ ଇଞ୍ଜି ମେହି ଯୀଶୁ ନେ ତା ବିଷୟରେ ୱେଚ୍‌ଚାନ୍‌ନା।

ଜହନ୍‌ 10:15

ଆନେଙ୍ଗ୍ ହେଲେକେ ନା ମେଣ୍ଢାକାଙ୍ଗ୍ ପା ପୁନାଙ୍ଗ୍, ଆରେ ହେୱେକ୍ ପା ନାଙ୍ଗେଙ୍ଗ୍ ପୁଞ୍ଜ୍‌ନିକ୍। ଆନେଙ୍ଗ୍ ମେଣ୍ଢାକାଙ୍ଗ୍ ନା ଜିବୁନ୍ ହିଦେଙ୍ଗ୍ ପା ରାଜି ମାନାଙ୍ଗ୍।

ଜହନ୍‌ 15:10

ଆନେଙ୍ଗ୍ ନା ଆବା ଈଶ୍ୱର ଆଦେସ୍‌ତିଙ୍ଗ୍ ମାନିକିନାଙ୍ଗା ଆରେ ଆନେଙ୍ଗ୍ ତା ଲାଡ୍‌ତାକେ ତିର୍‌ଆଜି ମାନାଙ୍ଗା। ହେଲେକେ ଏପେଙ୍ଗ୍ ଯଦି ନା ଆଦେସ୍‌ତିଙ୍ଗ୍ ମାନିକିନାଦେର୍, ଲାଗିଙ୍ଗ୍ ଏପେଙ୍ଗ୍ ନା ଲାଡ୍‌ତାକେ ତିର୍‌ଆଜି ମାନାଦେର୍।

ଜହନ୍‌ 15:21

ମାନାୟାର୍ ନା କାଜିଙ୍ଗ୍ ମିଙ୍ଗେଙ୍ଗ୍ ହେଲେକେ ବାଉରା ଆଦ୍‌ନାର୍। ଇନେସ୍‌କି ହେୱାର୍ ନାଙ୍ଗେଙ୍ଗ୍ ପକ୍ତିତି ଆବା ଈଶ୍ୱରତିଙ୍ଗ୍ ପୁନୁର୍।

ଜହନ୍‌ 16:3

ହେୱାର୍ ହେଲେକେ କିନାର୍, ହେଦାଙ୍ଗ୍ କାଜିଙ୍ଗ୍ ନା ଆବା ଈଶ୍ୱରତିଙ୍ଗ୍ ପୁନୁରେ, ଆରେ ହେୱାର୍ ନାଙ୍ଗେଙ୍ଗ୍ ପା ପୁଞ୍ଜୁରେ।

ଜହନ୍‌ 17:25

ଏ ଦରମ୍ ଆବା ଈଶ୍ୱର ନିଙ୍ଗେଙ୍ଗ୍ ପୁର୍ତି ପୁଞ୍ଜୁତେ, ମାତର୍ ଆନେଙ୍ଗ୍ ନିଙ୍ଗେଙ୍ଗ୍ ପୁନ୍‌ଞ୍ଚାଙ୍ଗ୍‌ନା। ଏନେଙ୍ଗ୍ ଯେ ନାଙ୍ଗେଙ୍ଗ୍ ପକ୍ତାତାଇନା ହେଦାଙ୍ଗ୍ ପୁଚାର୍‌ନା।

ଜହନ୍‌ 6:46

ଇନେର୍ ପା ଆବା ଈଶ୍ୱରତିଙ୍ଗ୍ ହୁଡ଼୍‌ୱାତାର୍‌ନା। ମାତର୍ ଆନେଙ୍ଗ୍ ଈଶ୍ୱରତାଙ୍ଗ୍ ୱାଜିମାଚି ମାନାୟ୍ ହିମ୍‌ଣା ନେ ଆବାଙ୍ଗ୍ ହୁଡ଼୍‌ତାଙ୍ଗ୍‌ନା।

ଜହନ୍‌ 8:19

ହେୱାର୍ ୱେନ୍‌ବାତାର୍, “ମିଞ୍ଜ୍‌ବା ଇମେନ୍?” ଯୀଶୁ ୱେଚ୍‌ଚାନ୍, “ଏପେଙ୍ଗ୍ ନାଙ୍ଗେଙ୍ଗ୍ ପୁଞ୍ଜ୍‌ୱାତାଦେର୍‌ନା ଆରେ ନା ଆବା ଈଶ୍ୱରତିଙ୍ଗ୍ ପା ପୁନ୍‌ୱାତାଦେର୍‌ନା। ଯଦି ଏପେଙ୍ଗ୍ ନାଙ୍ଗେଙ୍ଗ୍ ପୁନ୍‌ଞ୍ଚାଦେର୍‌ମା ଲାଗିଙ୍ଗ୍ ନା ଆବା ଈଶ୍ୱରତିଙ୍ଗ୍ ପା ପୁଚାଦେର୍‌ମା।”

ଜହନ୍‌ 8:29

ନାଙ୍ଗେଙ୍ଗ୍ ଇମ୍‌ଣି ଆବା ଈଶ୍ୱର ପକ୍ତାତାନ୍‌ନା, ହେୱାନ୍ ନା ହୁଦାଙ୍ଗ୍ ମାନାନ୍। ହେୱାନ୍ ନାଙ୍ଗେଙ୍ଗ୍ ରକାନ୍ କିଜି ପିସ୍ତି ହାଞ୍ଜ୍‌ୱାତାନ୍‌ନା। ହେୱାନ୍ ୱାରି ଆନି କାମାୟ୍ ୱିଜୁଦିନ୍ କିନାଙ୍ଗ୍।”

ଜହନ୍‌ 8:44

ଶୟତାନ୍ ଆନାନା ମିଞ୍ଜ୍‌ବା ଆରେ ଏପେଙ୍ଗ୍ ତା ମେହି କାଦେର୍। ଏପେଙ୍ଗ୍ ତା ଇଚାତାଙ୍ଗ୍ କାମାୟ୍ କିନାଦେରା। ହେୱାନ୍ ଆଗେତାଙ୍ଗ୍ ମାନାୟ୍ ମାରୁ, ଆରେ ହେୱାନ୍ ଇନାୱେଡ଼ାଙ୍ଗ୍ ପା ସତ୍ ୱେଚ୍‌ୱାତାନ୍‌ନା। ଇନେସ୍‌କି ହେୱାନ୍ ମିଚ୍‌ୱା। ଏଚେପାଦ୍ନା ହେୱାନ୍ ମିଚ୍ କାତା ୱେଚ୍‌ନାନ୍, ହେପାଦ୍ନା ହେୱାନ୍ ଜାର୍‌ତିଙ୍ଗ୍ ୱେଚ୍‌ନାନ୍। ଇନେସ୍‌କି ହେୱାନ୍ ମିଚ୍ ୱେଚ୍‌ନି ମାନାୟ୍, ଆରେ ହେୱାନ୍ ମିଚ୍ ୱେଚ୍‌ନାକାର୍ ତାଞ୍ଜିବା।

ଜହନ୍‌ 8:51

ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍‌ଚାନାଙ୍ଗା, “ଇନେର୍ ଯଦି ନା ହିକ୍ଷାତିଙ୍ଗ୍ ମାନିକିନାର୍, ଲାଗିଙ୍ଗ୍ ହେୱାନ୍ ଇନାୱେଡ଼ାଙ୍ଗ୍ ପା ହାଃଉନ୍।”

ଜହନ୍‌ 8:52

ଯିହୁଦି ନେତାର୍ ଯୀଶୁଙ୍ଗ୍ ୱେଚ୍‌ଚାର୍, “ନଙ୍ଗୟ୍ ଆପେଙ୍ଗ୍ ପୁଚାପ୍ ଯେ, ନି ବିତ୍ରେ ରଞ୍ଜାଙ୍ଗ୍ ବୁତ୍ଆତ୍ମା ଡାଞ୍ଜ୍‌ଜାତାତ୍‌ନା। ଇନେସ୍‌କି ଅବ୍ରାହାମ୍‌ ହାଃଜି ମାଚାନ୍ ଆରେ ଭବିଷ୍ଯତବକ୍ତାର୍ ପା ହାଃଜି ମାଚାର୍। ମାତର୍ ଏନେଙ୍ଗ୍ ୱେଚ୍‌ଚାନାୟା, ‘ନା ହିକ୍ଷାତିଙ୍ଗ୍ ମାନିକିନାକାର୍ ଇନାୱେଡ଼ାଙ୍ଗ୍ ପା ହାଃଉର୍।’

ପକ୍ୟାତାକା 17:23

ଇନେସ୍‌କି ଆନେଙ୍ଗ୍ ଚାରିବେଣ୍‌ତାଙ୍ଗ୍ ବୁଲାଆନିହିଙ୍ଗ୍ ଏପେଙ୍ଗ୍ ପୁଜାକିନି ଜିନିଷ୍‌ତିଙ୍ଗ୍ ହୁଡ଼୍‌ତାଙ୍ଗ୍‌ନା। ଆନେଙ୍ଗ୍ ହେଲେକେ ବେଦିତିଙ୍ଗ୍ ପା ହୁଡ଼୍‌ତାଙ୍ଗ୍, ହେବେ ଲେକାଆଜି ମାଚାତ୍, ‘ପୁନ୍‌ୱିତି ଈଶ୍ୱର କାଜିଙ୍ଗ୍।’ ଲାଗିଙ୍ଗ୍ ଏପେଙ୍ଗ୍ ପୁନୁୱାଦାଙ୍ଗ୍‌ ଇମ୍‌ଣି ଈଶ୍ୱରତିଙ୍ଗ୍ ହେବା କିନାଦେରା ଆନେଙ୍ଗ୍ ହେ ଈଶ୍ୱର ବିଷୟରେ ଶୁଣାୟ୍ କିଦ୍‌ନାଙ୍ଗା।

୨ କରନ୍ତିୟ 4:6

ଇନେସ୍‌କି ଈଶ୍ୱର ଆଗେ ୱେଚ୍‌ଚି ମାଚାନ୍, “ମାଜ୍‌ଗାତାକେ ଅଜଡ଼୍ ଆଏତ୍” ଆରେ ଇଲେକେ କିଜି ହେୱାନ୍ ତା ଗୌରବ ବୁଜାୟ୍ କିଜି ମାଚାତ୍ ଯେ, ହେ ଅଜଡ଼୍‌ଲେକେ ତା ଗୌରବ ଯୀଶୁ ଖ୍ରୀଷ୍ଟ ମୁମ୍‌ଦ ଚନ୍‌ଞ୍ଜି ମାଚାତ୍।

୧ ଯୋହନ 1:6

ଯଦି ଆସେଙ୍ଗ୍ ଯୀଶୁ ହୁଦାଙ୍ଗ୍ ମାହାଆଜି ମାନାସ୍ ଇଞ୍ଜି ୱେଚ୍‌ନାସ୍, ଆରେ ମାଜ୍‌ଗାତାକେ ମାନିଲେକେ କରାପ୍ କାମାୟ୍ କିଜି ମାନାସ୍। ଲାଗିଙ୍ଗ୍ ଆସେଙ୍ଗ୍ ମିଚ୍‌ୱାକାସ୍‌, ଆରେ ଆସେଙ୍ଗ୍ ସତ୍ ହିକ୍ଷା ଅନୁସାରେ ଜିବୁନ୍ କାଟି କିଉସା।

୧ ଯୋହନ 2:22

ଇମ୍‌ଣି ମାନାୟ୍ ଯୀଶୁ ନେ ଖ୍ରୀଷ୍ଟ ଇଞ୍ଜି ୱେଚୁନ୍, ହେୱାନ୍ ନେ ବେସି ମିଚ୍‌ୱା। ହେଲେଗ୍‌ଦି ମାନାୟ୍ ନେ ଖ୍ରୀଷ୍ଟଙ୍ଗ୍ ବିରଦ୍ କିନାର୍, ଇନେସ୍‌କି ହେୱାର୍ ଆବା ଈଶ୍ୱରତିଙ୍ଗ୍ ଆରେ ତା ମେହି ଯୀଶୁଙ୍ଗ୍ ଆହୁର୍।

୧ ଯୋହନ 2:4

ଇମ୍‌ଣି ମାନାୟ୍ ତା ଆଜ୍ଞା ମାନିକିୱାଦାଙ୍ଗ୍ ତାଙ୍ଗେଙ୍ଗ୍ ପୁଚାଙ୍ଗ୍‌ନା ଇଞ୍ଜି ୱେଚ୍‌ନାନ୍, ହେୱାନ୍ ମିଚ୍‌ୱା, ଆରେ ହେୱାନ୍ ସତ୍ ଯିବୁନ୍ କାଟି କିଉନା।

୧ ଯୋହନ 5:10

ଇମ୍‌ଣି ମାନାୟ୍ ଈଶ୍ୱର ମେହି ଯୀଶୁତାକେ ପାର୍ତିକିନାନ୍। ଈଶ୍ୱର ହେୱାନିଙ୍ଗ୍ ଇନାକା ଚଚ୍‌ଚାନ୍‌ନା ହେ କାତାତିଙ୍ଗ୍ ସତ୍ ଇଞ୍ଜି ମାନି କିନାନ୍। ଇମ୍‌ଣି ମାନାୟ୍ ଈଶ୍ୱର ୱେଚ୍‌ଚି କାତାନି ସାକିତିଙ୍ଗ୍‌ ପାର୍ତି କିଉନ୍। ହେୱାନ୍ ଈଶ୍ୱରତିଙ୍ଗ୍ ମିଚ୍‌ୱା ଇଞ୍ଜି ୱେଚ୍‌ନାନ୍, ଇନେସ୍‌କି ଈଶ୍ୱର ତା ମେହି ବିଷୟରେ ଇମ୍‌ଣି ସାକି ହିତାନ୍‌ନା, ହେ କାତାତିଙ୍ଗ୍ ହେୱାର୍ ପାର୍ତି କିଉରା।

ହତ୍‌ତି 3:9

ଲାଗିଙ୍ଗ୍ ହୁଡ଼ାଟ୍, ଇମ୍‌ଣି ମାନାୟାର୍ ଶୟତାନ ଦଳ୍‌ନି ମାନାୟାର୍ ହେୱାର୍ ଈଶ୍ୱର ବାଚି କିତ୍‌ତି ସତ୍ ଯିହୁଦି ମାନାୟାର୍ ଇଞ୍ଜି ଚଞ୍ଜିଆ ଆନାରା, ମାତର୍ ହେୱାର୍ ସତ୍ ଯିହୁଦି ମାନାୟାର୍ ଆକାୟ୍। ହେୱାର୍ ୱାଜି ମି କାଲ୍‌ପାନାତାକେ ମୁଣ୍ଡିଆ ଇଡ଼୍‌ଦାନାର୍ ଆରେ ଆନେଙ୍ଗ୍ ମିଙ୍ଗେଙ୍ଗ୍ ଲାଡ୍ କିନାଙ୍ଗା ଇଞ୍ଜି ହେୱାର୍ ପୁଞ୍ଜ୍‌ନାର୍।”