ଜହନ୍‌ 8:32 - New Testament in Pengo Parja Language

³² ଏପେଙ୍ଗ୍ ସତ୍‌ତିଙ୍ଗ୍ ପୁନାଦେର୍ ଆରେ ହେ ସତ୍ ମିଙ୍ଗେଙ୍ଗ୍ ରକ୍ଷା କିଦ୍‌ନାତ୍।”

ସତ୍‌ ବଚନ୍‌ ପୁନି ନିୟମ୍‌

³² ଆରେ ଏପେଙ୍ଗ୍‌ ହାତ୍‌ପା ପୁନାଦେର୍‌ ଆରି ହେ ହାତ୍‌ପା ମିଙ୍ଗେଙ୍ଗ୍‌ ମୁକ୍‌ଡ଼ାୟ୍‌ କିଦ୍‌ନାତ୍‌ ।”

ଜହନ୍‌ 8:32 ပူးပေါင်းရင်းမြစ်များ

ମାତିଉ 11:29

ଏପେଙ୍ଗ୍ ନା ପାଚେ ୱାଡୁ, ଆନେଙ୍ଗ୍ ମିଙ୍ଗେଙ୍ଗ୍ ହିକାୟ୍ କିଦ୍‌ନାଙ୍ଗ୍। ଇନେସ୍‌କି ଆନେଙ୍ଗ୍ ର ସାଦାସିଦା ଆରେ ଦରମ୍ ମାନାୟ୍‌ତଙ୍ଗ୍‌। ହେଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ଜିବୁନ୍ ପାୟାଆନାଦେର୍।

ଜହନ୍‌ 1:14

ହେ ବେଣ୍ ମାନାୟ୍ ରୁପ୍ ଆତାତ୍, ଆରେ ମା ହୁଦାଙ୍ଗ୍ ବାହାକିତାତ୍‌। ହେୱାନ୍ ଦୟା ଆରେ ସତ୍ ବିଷୟ ବାର୍ତି ମାଚାତ୍। ଆବା ଈଶ୍ୱର ର ମେହିତାକେ ଇନେସ୍ ଲେକେ ଗୌରବ ମାନାତ୍, ହେଲେକେ ଗୌରବ ଆପେଙ୍ଗ୍ ହୁଡ଼୍‌ତାପ୍।

ଜହନ୍‌ 1:17

ଈଶ୍ୱର ମାଙ୍ଗେଙ୍ଗ୍ ମୋଶା ଲେକିକିତି ନିୟମ୍‌ନି ସାସ୍ତର୍‌ତାଙ୍ଗ୍ ହିତ୍‌ତାନ୍‌ନା। ମାତର୍ ଯୀଶୁ ଖ୍ରୀଷ୍ଟତାଙ୍ଗ୍ ଦୟା ଆରେ ସତ୍ ବିଷୟ ହିତ୍‌ତାନ୍‌ନା।

ଜହନ୍‌ 14:6

ଯୀଶୁ ହେୱାନିଙ୍ଗ୍ ୱେଚ୍‌ଚାନ୍, “ଆନେଙ୍ଗ୍ ହାଜି। ଆନେଙ୍ଗ୍ ସତ୍। ଆରେ ଆନେଙ୍ଗ୍ ଜିବୁନ୍। ଆବା ଈଶ୍ୱରତାକେ ହାଞ୍ଜେଙ୍ଗ୍ ଆନେଙ୍ଗ୍ ନେ ରୱାଙ୍ଗ୍ ହାଜି।

ଜହନ୍‌ 16:13

ମାତର୍ ଏଚେପାଦ୍ନା ଈଶ୍ୱରଆତ୍ମା ୱାନାତ୍, ହେପାଦ୍ନା ହେୱାନ୍ ମିଙ୍ଗେଙ୍ଗ୍ ୱିଜୁ ସତ୍ ହାଜ୍‌ଦିଙ୍ଗ୍ ଅସାହାଞ୍ଜ୍‌ନାନ୍। ହେୱାନ୍ ତା ଜାର୍ କାତା ୱେଚ୍‌ଚୁନ୍। ଈଶ୍ୱର ହେୱାନିଙ୍ଗ୍ ଇନାକା ୱେଚ୍‌ନାନ୍, ହେଦାଙ୍ଗ୍ ହେୱାନ୍ ୱେଚ୍‌ଚାନାନ୍। ହେୱାନ୍ ନଙ୍ଗୟ୍‌ୱାନି ଗଟ୍‌ନା ବିଷୟରେ ୱେଚ୍‌ଚାନାନ୍।

ଜହନ୍‌ 17:17

ଲାଗିଙ୍ଗ୍ ଏନେଙ୍ଗ୍ ନି ସତ୍ କାଜିଙ୍ଗ୍ ହେୱାରିଙ୍ଗ୍ ପବିତ୍ର କିୟା। ନି ହିକ୍ଷା ଆନାତା ସତ୍।

ଜହନ୍‌ 6:45

ଭବିଷ୍ଯତବକ୍ତାର୍ ସାସ୍ତର୍‌ତାକେ ଲେକାଆତାତ୍‌ନା, ‘ଈଶ୍ୱର ମାନାୟାରିଙ୍ଗ୍ ହିକ୍ଷା ହିନାନ୍।’ ଇମ୍‌ଣାକାର୍ ନା ଆବା ଈଶ୍ୱର କାତା ୱେନାର୍, ଆରେ ହିକ୍ଷା ପାୟାଆନାର୍‌। ହେୱାର୍ ନା ଲାଗାୟ୍ ୱାନାର୍।

ଜହନ୍‌ 7:17

ଇମ୍‌ଣାକାନ୍ ଆବା ଈଶ୍ୱର ଇଚାତାଙ୍ଗ୍ ପୁରା କିଦେଙ୍ଗ୍ ଇଚାକିନାନ୍। ହେୱାନ୍‌ନେ ପୁଞ୍ଜେଙ୍ଗ୍ ଆଡ୍‌ନାନ୍ ଇଦାଙ୍ଗ୍ ଈଶ୍ୱରନି ହିକ୍ଷା କି ନା ଜାର୍ ହିକ୍ଷା।

ଜହନ୍‌ 8:36

ଯଦି ହେ ହିମ୍‌ଣା ମିଙ୍ଗେଙ୍ଗ୍ ମୁକ୍ତି ହିଦ୍ନାନାନ୍‌, ଲାଗିଙ୍ଗ୍ ଏପେଙ୍ଗ୍ ହାତ୍‌ପା ମୁକ୍ତି ପାୟାଆନାଦେର୍।

ରୋମିୟ 6:22

ମାତର୍ ନଙ୍ଗୟ୍ ଏପେଙ୍ଗ୍ ପାପ୍‌ନି ଶାକ୍ତିତାଙ୍ଗ୍ ମୁକ୍ତି ପାୟା ଆତାଦେର୍‌ନା ଆରେ ଈଶ୍ୱରତାକେ ଚାକର୍ ଆତାଦେର୍‌ନା। ନଙ୍ଗୟ୍ ଏପେଙ୍ଗ୍ ପବିତ୍ର ଆଦେଙ୍ଗ୍ ଆରେ ୱିଜ୍‌ୱି ଜିବୁନ୍ ପାୟା ଆଦେଙ୍ଗ୍ ଦରମ୍ କାମାୟ୍ କିନାଦେରା।

ରୋମିୟ 8:15

ଲାଗିଙ୍ଗ୍ ଏପେଙ୍ଗ୍ ଚାକର୍ ଆଜି ଈଶ୍ୱରତିଙ୍ଗ୍ ପାଣ୍ଡ୍ରାଆନି ଆତ୍ମା ପାୟା ଆୱାତାଦେର୍‌ନା, ମାତର୍ ପବିତ୍ର ଆତ୍ମା ମାଙ୍ଗେଙ୍ଗ୍ ଈଶ୍ୱର ମେହିର୍ କିଜି ତା କୁଟୁମ୍‌ତାକେ ମାହାୟ୍ କିତ୍‌ତାତ୍‌ନା। ହେଦାଙ୍ଗ୍ କାଜିଙ୍ଗ୍ ଆସେଙ୍ଗ୍ ଈଶ୍ୱରତିଙ୍ଗ୍, “ଆବା-ଆବା ଇଞ୍ଜି ହିର୍‌ବାନାସା।”

ରୋମିୟ 8:2

ଇନେସ୍‌କି ପବିତ୍ର ଆତ୍ମା ମାଙ୍ଗେଙ୍ଗ୍ ଜିବୁନ୍ ହିଦ୍‌ନାତ୍ ହେଦାଙ୍ଗ୍ ଯୀଶୁ ଖ୍ରୀଷ୍ଟତାଙ୍ଗ୍ ୱାନାତ୍, ଆରେ ପାପ୍‌ନି ଶାକ୍ତିତାଙ୍ଗ୍ ଆରେ ମାରାଣ୍‌ତାଙ୍ଗ୍ ମୁକ୍ତି କିଦ୍‌ନାତ୍।

୧ କରନ୍ତିୟ 7:22

ଯଦି ମାପୃ ଯୀଶୁ ଖ୍ରୀଷ୍ଟ ମିଙ୍ଗେଙ୍ଗ୍ ଚାକର୍ ଆଜି ମାଚିହିଙ୍ଗ୍ ବାଚି କିତ୍‌ତାନ୍‌ନା, ଲାଗିଙ୍ଗ୍ ହେୱାନ୍ ପାପ୍‌ନି ଶାକ୍ତିତାଙ୍ଗ୍ ମିଙ୍ଗେଙ୍ଗ୍ ମୁକ୍ତି କିତ୍‌ତାନ୍‌ନା। ଆରେ ଯଦି ମାପୃ ଯୀଶୁ ଖ୍ରୀଷ୍ଟ ମିଙ୍ଗେଙ୍ଗ୍ ଚାକର୍ ଆୱିହିଙ୍ଗ୍ ବାଚି କିତ୍‌ତାନ୍‌ନା, ଲାଗିଙ୍ଗ୍ ହେୱାନ୍ ମିଙ୍ଗେଙ୍ଗ୍ ତା ଚାକର୍ କିତ୍‌ତାନ୍‌ନା।

ଗାଲାତିୟ 5:1

ଖ୍ରୀଷ୍ଟ ମାଙ୍ଗେଙ୍ଗ୍ ମୋଶା ନିୟମ୍ ସାସ୍ତର୍‌ତାଙ୍ଗ୍ ସ୍ୱାଦିନ୍ କିତ୍‌ତାନ୍‌ନା। ଲାଗିଙ୍ଗ୍ ଏପେଙ୍ଗ୍ ନଙ୍ଗୟ୍ ଆରେ ନିୟମ୍ ସାସ୍ତର୍‌ନି ଦାସ୍ ଆଜି ମାଞ୍ଜେଙ୍ଗ୍ ଉପାୟ୍ କିୱାଦାଙ୍ଗ୍, ସ୍ୱାଦିନ୍ ଆଜି ମାନାଟ୍।

ଗାଲାତିୟ 5:13

ଇନେସ୍‌କି ଏ ଟଣ୍ଡାର୍‌କାଦେର୍, ଈଶ୍ୱର ମିଙ୍ଗେଙ୍ଗ୍ ସ୍ୱାଦିନ୍ ଆଜି ମାନି କାଜିଙ୍ଗ୍ କୁକ୍ତାତାନ୍‌ନା। ଲାଗିଙ୍ଗ୍ ମି ଗାଗାଡ଼୍‌ନି ଇଚାତାଙ୍ଗ୍ ପୁରା କିଦେଙ୍ଗ୍ ମି ସ୍ୱାଦିନ୍‌ତିଙ୍ଗ୍ ବ୍ୟବହାର୍ କିମାଟ୍, ମାତର୍ ଲାଡ୍‌ତାଙ୍ଗ୍ ଜାର୍-ଜାର୍‌ତିଙ୍ଗ୍ ହେବା କିନି କାଜିଙ୍ଗ୍ ବ୍ଯବହାର୍ କିୟାଟ୍।

୨ ତିମଥି 3:7

ଇ କଗ୍‍ଲେକ୍ ୱିଜୁଦିନ୍ ବିନ୍-ବିନ୍ ହିକ୍ଷା ହିକାଆନିକ୍, ମାତର୍ ହେୱେକ୍ ଇନାୱେଡ଼ାଙ୍ଗ୍ ପା ଯୀଶୁ ଖ୍ରୀଷ୍ଟ ବିଷୟରେ ସତ୍ ହିକ୍ଷା ପୁଞ୍ଜେଙ୍ଗ୍ ଆଡୁକ୍।

ଜାକ୍‌ବ 1:25

ମାତର୍ ଇମ୍‌ଣାକାନ୍ ଜାଗ୍ରତ୍ ଆଜି ଈଶ୍ୱର ଟିକ୍ ନିୟମ୍‌ତିଙ୍ଗ୍ ପଡ଼ିକିଜି ମାନ୍ତ ଇଡ଼୍‌ଜି ମାନି କିନାନ୍, ହେୱାନ୍ ପାପ୍ କାମାୟ୍‌ତାଙ୍ଗ୍ ମୁକ୍ତି ଆନାନ୍, ଆରେ ହେୱାନ୍ ଇନାକା କିତିସ୍ ଈଶ୍ୱର ହେୱାନିଙ୍ଗ୍ ଆଶ୍ରିବାଦ୍ କିନାନ୍।

ଜାକ୍‌ବ 2:12

ମାଙ୍ଗେଙ୍ଗ୍ ମୁକ୍ତି ହିଦ୍‌ନି ନିୟମ୍ କାଜିଙ୍ଗ୍ ଈଶ୍ୱର ମାଙ୍ଗେଙ୍ଗ୍ ବିଚାର୍ କିଦ୍‌ନାନ୍। ଲାଗିଙ୍ଗ୍ ଏପେଙ୍ଗ୍ କାତା ୱେଚ୍‌ନିହିଙ୍ଗ୍ ଆରେ କାମାୟ୍ କିନିହିଙ୍ଗ୍ ଦୟାତାଙ୍ଗ୍ କିୟାଟ୍।

୧ ପିତର 2:16

ଏପେଙ୍ଗ୍ ନଙ୍ଗୟ୍ ଜାର୍ ଇଚାତାଙ୍ଗ୍ ୱିଜୁ ଜିନିଷ୍ କିଦେଙ୍ଗ୍ ଆଡ୍‌ନାଦେର୍, ଆରେ ଇନେର୍ ମିଙ୍ଗେଙ୍ଗ୍ ବନ୍ଦ୍ କିଦ୍‌ଦେଙ୍ଗ୍ ଆଡ଼୍‌ଦୁର୍, ଇନେସ୍‌କି ମା ମାପୃ ଯୀଶୁ ଖ୍ରୀଷ୍ଟ ୱିଜୁ ପର୍‌କାର୍ କିଦେଙ୍ଗ୍ ହିତ୍‌ତାନ୍‌ନା। ମାତର୍ ଟିକ୍ କାମାୟ୍ କିଜି ଈଶ୍ୱର ସତ୍ ଦାସ୍ ଇଞ୍ଜି ପୁନିକିନି ଦର୍‌କାର୍। ହେଦାଙ୍ଗ୍ କାଜିଙ୍ଗ୍ ମାପୃ ହିତ୍‌ତି ସ୍ୱାଦିନତିଙ୍ଗ୍ କରାପ୍ କାମାୟ୍ କିଦେଙ୍ଗ୍ ବ୍ୟବହାର୍ କିନାକା ହାର୍ ଆକାୟ୍।

୨ ଯୋହନ 1:1

ଆନେଙ୍ଗ୍ ଯୋହନ, ଆରେ ଆନେଙ୍ଗ୍ ର ମଣ୍ଡ୍‌ଲିନି ପ୍ରାଚିନ୍‌। ଆନେଙ୍ଗ୍ ଇ ଚିଟି ଈଶ୍ୱର ବାଚିକିତି କଗ୍‌ଲେଙ୍ଗ୍ ଆରେ ତା ମେହିର୍ କାଜିଙ୍ଗ୍ ଲେକିକିନାଙ୍ଗା। ଆନେଙ୍ଗ୍ ଇନେସ୍‌କି ଈଶ୍ୱର ସତ୍‌ତିଙ୍ଗ୍ ପୁଚି ମାନାୟାରିଙ୍ଗ୍‌ ପା ଲାଡ୍ କିନାଙ୍ଗା, ହେଲେକେ ଆନେଙ୍ଗ୍ ହେ କଗ୍‌ଲେଙ୍ଗ୍ ତା ମେହିରିଙ୍ଗ୍ ଲାଡ୍ କିନାଙ୍ଗା।