ଜହନ୍‌ 7:12 - New Testament in Pengo Parja Language

¹² ହେବେ ବେସିହେନି ମାନାୟାର୍ ମାଚାର୍। ହେୱାର୍ ବିତ୍ରେତାଙ୍ଗ୍ କେତେକ୍ ହେନି ଜାର୍-ଜାର୍‌ବିତ୍ରେ ଯୀଶୁ ବଷୟରେ ବେଣ୍‌କିବାଆଜି ମାଚାର୍, କେତ୍‌ଜାଣ୍ ୱେଚ୍‌ଚାର୍, “ହେୱାନ୍ ରକାନ୍ ହାର୍ଦି ମାନାୟ୍।” ମାତର୍ ଜେକନିକାର୍ ୱେଚ୍‌ଚି ମାଚାର୍, “ଆକାୟ୍, ହେୱାନ୍ ମାନାୟାରିଙ୍ଗ୍ ବୁଲ୍ ହାଜ୍‌ଦିଙ୍ଗ୍ ଅନାନା।”

ସତ୍‌ ବଚନ୍‌ ପୁନି ନିୟମ୍‌

¹² ଆରେ, ତା ବିସ୍ରେ ମାନାୟାର୍‌ ବିତ୍ରେ ବେସି ହେୱାର୍‌ ହେୱେର୍‌ କାଲେ କାଲେ ବେଣ୍‌ କିଦେଙ୍ଗ୍‌ ଲାଗାତାର୍‌; “ଇନେ ଇନେର୍‌ ଇଚାର୍‌, ହେୱାନ୍‌ ରକାନ୍‌ ହାର୍‌ ଲଗୁ, ଆରେ ଇନେ ଇନେର୍‌ ଇଚାର୍‌, ଆକାୟ୍‌, ହେୱାନ୍‌ ମାନାୟାରିଂ ବୁଲ୍‌କାୟ୍‌କିନାନା ।”

ଜହନ୍‌ 7:12 ပူးပေါင်းရင်းမြစ်များ

ମାତିଉ 10:25

ଚେଲା ତା ଗୁରୁ ଲେକେ ଆରେ ହଲିଆ ତା ମାଲିକ୍ ଲେକେ ଆଦେଙ୍ଗ୍ ଆଡ଼୍‌ତିସ୍ ହାର୍। ମାତର୍ ଇଲ୍ ମାଲିକ୍‌ତିଙ୍ଗ୍ ବାଲ୍‌ଜିବୁଲ୍ ଶୟତାନ ଇଞ୍ଜି କୁକ୍ତିସ୍, ଆରେ ଇଲ୍‌ନି ଜେକନିକାରିଙ୍ଗ୍ ତ ଆଦିକ୍ ବାନ୍ୟା ତର୍‍ଦାଙ୍ଗ୍ କୁକିୟା ଆନାତ୍।”

ମାତିଉ 21:46

ଆରେ ହେୱାର୍ ଯୀଶୁଙ୍ଗ୍ ଆସ୍ତେଙ୍ଗ୍ ଉପାୟ୍ କିତାର୍। ମାତର୍ ମାନାୟ୍ ମୁମ୍‌ଦ ପାଣ୍ଡ୍ରା ଆତାର୍। ଇନେସ୍‌କି ହେୱାର୍ ଯୀଶୁଙ୍ଗ୍ ଭବିଷ୍ଯତବକ୍ତା ଇଞ୍ଜି ମାନିକିଜି ମାଚାର୍।

ମାତିଉ 27:63

ହେୱାର୍ ୱେଚ୍‌ଚାର୍, ମାପୃ ମା ମାନ୍ତ ମାନାତ୍ ଯେ ମିଚ୍ ୱେଚ୍‌ନାକାନ୍ ହେୱାନ୍ ଜିଜି ମାନିହିଙ୍ଗ୍ ୱେଚ୍‌ଚି ମାନ୍‌ଞ୍ଚାନ୍, ତିନ୍‌ଦିନ୍ ପାଚେ ଆନେଙ୍ଗ୍ ଆରେ ଜିବୁନ୍‌ଆଜି ନିଙ୍ଗ୍‌ନାଙ୍ଗ୍।

ଲୁକ ଲେକିକିତି ଜିସୁ କ୍ରିସ୍ଟତି ନେକ୍ରିକାବୁର୍‌ 18:19

ହେପାଦ୍ନା ଯୀଶୁ ହେୱାନିଙ୍ଗ୍ ୱେଚ୍‌ଚାନ୍, “ନାଙ୍ଗେଙ୍ଗ୍ ସତ୍ ଇଞ୍ଜି ଇନା କିଦେଙ୍ଗ୍ ଇଞ୍ଜ୍‌ନାୟା? ଈଶ୍ୱରତିଙ୍ଗ୍ ପିସ୍ତି ଆରେ ଇନେର୍ ପା ସତ୍‌ନିକାନ୍ ଆକାୟ୍।

ଲୁକ ଲେକିକିତି ଜିସୁ କ୍ରିସ୍ଟତି ନେକ୍ରିକାବୁର୍‌ 23:47

ସେନାଦଳ୍‌ନି ଶହେଜାଣ୍‌ ସେନାର୍‌ତାଙ୍ଗ୍ ମୁଡ଼୍‌ଦାକାନ୍ ହେବେ ଇନାକା ଗଟାଆତି ଗଟ୍‌ନା ହୁଡ଼୍‌ତାନ୍। ଆରେ ହେବେ ଇବେଣ୍ ୱେଚ୍‌ଚି ଈଶ୍ୱରତିଙ୍ଗ୍ ଦନ୍ଯବାଦ୍‍କିଜି ୱେଚ୍‌ଚାନ୍, “ଆନେଙ୍ଗ୍ ପୁନାଙ୍ଗ୍ ଯେ, ଇୱାନ୍ ରକାନ୍ ହାର୍ଦି ମାନାୟ୍ ମାଚାନ୍!”

ଲୁକ ଲେକିକିତି ଜିସୁ କ୍ରିସ୍ଟତି ନେକ୍ରିକାବୁର୍‌ 23:50

ଯିହୁଦା ଜିଲ୍ଲାନି ହାରାମାତିଆ ସହର୍‌ତାକେ ଯୋଷେପ ତର୍‍ଦାକାନ୍ ରକାନ୍ ମାନାୟ୍ ମାଚାନ୍। ହେୱାନ୍ ରକାନ୍ ଦରମ୍ ଆରେ ହାର୍ଦି ମାନାୟ୍ ମାଚାନ୍। ହେୱାନ୍ ଯିହୁଦିର୍ ଗାଜା ବିଚାର୍‌କିନି ର ମେମର୍ ମାଚାନ୍।

ଲୁକ ଲେକିକିତି ଜିସୁ କ୍ରିସ୍ଟତି ନେକ୍ରିକାବୁର୍‌ 6:45

ର ହାର୍ଦି ମାନାୟ୍ ଗରବ୍ ବିତ୍ରେ ହାର୍ଦି ବିଷୟ ବାର୍ତିଆଜି ମାନ୍‌ଗାନାତ୍। ହେଦାଙ୍ଗ୍ କାଜିଙ୍ଗ୍ ତା ଗରବ୍‌ତାଙ୍ଗ୍ ହାର୍ଦି ବିଷୟ ହନାତ୍। ମାତର୍ ର ବାନ୍ୟା ମାନାୟ୍ ଗରବ୍ ବିତ୍ରେ ବାନ୍ୟାବିଷୟ ବାର୍ତିଆଜି ମାନ୍‌ଗାନାତ୍। ଲାଗିଙ୍ଗ୍ ତା ଗରବ୍‌ତାଙ୍ଗ୍ ବାନ୍ୟାବିଷୟ ହନାତ୍। ର ମାନାୟ୍ ତା ଗରବ୍ ବିତ୍ରେ ଇନାକା ମାନ୍‌ଗାନାତ୍, ହେୱାନ୍ ହେଦାଙ୍ଗ୍ ୱେଚ୍‌ନାନ୍।”

ଲୁକ ଲେକିକିତି ଜିସୁ କ୍ରିସ୍ଟତି ନେକ୍ରିକାବୁର୍‌ 7:16

ହେବେ ମାଚି ୱିଜାକାର୍ ଚାନିଆ ଆତାର୍‌। ଆରେ ହେୱାର୍ ଈଶ୍ୱରତିଙ୍ଗ୍ ଜୟ୍-ଜୟକିଜି ହେୱାର୍ ୱେଚ୍‌ଚାର୍, “ଇୱାନ୍ ଗାଜା ଭବିଷ୍ଯତବକ୍ତା ମା ଲାଗାୟ୍ ୱାତାନ୍‌ନା। ଆରେ ଈଶ୍ୱର ତା ଲକ୍‌ବାକ୍‌ତିଙ୍ଗ୍ ସାଇଜ କିଦେଙ୍ଗ୍ ୱାତାନ୍‌ନା।”

ଜହନ୍‌ 6:14

ମାନାୟାର୍ ଯୀଶୁ ଚାନିଆଆନି କାମାୟ୍ ହୁଡ଼୍‌ଜି ୱେଚ୍‌ଚାର୍, “ହେୱାନ୍ ହାତ୍‌ପା ଭବିଷ୍ଯତବକ୍ତା, ଇନେର୍‌କି ଇ ପୁର୍ତିତାକେ ୱାନାକା ମାଚାତ୍।”

ଜହନ୍‌ 7:32

ଯୀଶୁ ବିଷୟରେ ମାନାୟାର୍ ୱେଚ୍‌ନି ବେଣ୍ ପାରୁସିଦଳ୍‍ ୱେଚାର୍। ଈଶ୍ୱର ହେବାକିନି ମୁଡ଼୍‌ଦି ପୁଜାରିର୍ ଆରେ ପାରୁସିଦଳ୍‍ନି ମାନାୟାର୍ ଯୀଶୁଙ୍ଗ୍ ଆସ୍ତେଙ୍ଗ୍ କେତେକ୍ ହେନି ମନ୍ଦିର୍‌ନି ସେନାରିଙ୍ଗ୍ ପକ୍ତାର୍।

ଜହନ୍‌ 7:47

ପାରୁସିଦଳ୍‍ ହେୱାରିଙ୍ଗ୍ ୱେଚ୍‌ଚାର୍, “ଏଲେଙ୍ଗ୍ଇଚି ଯୀଶୁ ମିଙ୍ଗେଙ୍ଗ୍ ପା ବକୁଆ ରସ୍ତାତାନ୍‌ନା।

ଜହନ୍‌ 7:52

ଯିହୁଦି ନେତାର୍ ୱେଚ୍‌ଚାର୍, “ଏନେଙ୍ଗ୍ ଇନାକା ଗାଲିଲୀ ଜିଲ୍ଲାନି ମାନାୟାର୍ ବିତ୍ରେତାଙ୍ଗ୍ ରକାଇ? ଏପେଙ୍ଗ୍ ଦରମ୍ ସାସ୍ତର୍ ପିଡ଼ିକିୟାଟ୍, ଲାଗିଙ୍ଗ୍ ପୁଞ୍ଜେଙ୍ଗ୍ ଆଡ୍‌ନାଦେର୍, ଇମ୍‌ଣି ଭବିଷ୍ଯତବକ୍ତା ପା ଗାଲିଲୀ ଜିଲ୍ଲାତାଙ୍ଗ୍ ୱାଉନ୍।”

ଜହନ୍‌ 9:16

କେତ୍‌ଜାଣ୍ ପାରୁସିଦଳ୍‍ ୱେଚ୍‌ଚାର୍, “ଇୱାନ୍ ଜମ୍‌ନିଦିନ୍‌ନି ନିୟମ୍‌ତିଙ୍ଗ୍ ମାନିକିଉନା। ଲାଗିଙ୍ଗ୍ ହେୱାନ୍ ଈଶ୍ୱରତାକେଣ୍ଡାଙ୍ଗ୍ ୱାୱାତାନ୍‌ନା।” ଜେକନିକାର୍ ୱେଚ୍‌ଚାର୍, “ରକାନ୍ ପାପି ମାନାୟ୍ ଇନାୱେଡ଼ାଙ୍ଗ୍ ଇ ଲେକେ ଚାନିଆଆନି କାମାୟ୍ କିଦେଙ୍ଗ୍ ଆଡୁନ୍।” ଇଦାଙ୍ଗ୍ କାଜିଙ୍ଗ୍ ପାରୁସିଦଳ୍‍ ବିତ୍ରେ ବାଗ୍-ବାଗ୍ ଆତାର୍।

ପକ୍ୟାତାକା 11:24

ବର୍ଣ୍ଣବା ରକାନ୍ ହାର୍ଦି ମାନାୟ୍ ମାଚାନ୍। ହେୱାନ୍ ପବିତ୍ର ଆତ୍ମାତାଙ୍ଗ୍ ପୁରାଆଜି ମାଚାନ୍ ଆରେ ଈଶ୍ୱରତିଙ୍ଗ୍ ମାନ୍ ପାରାଣ୍ ହିଜି ପାର୍ତି କିଜି ମାଚାନ୍। ହେବେତାଙ୍ଗ୍ ବେସିହେନି ମାନାୟାର୍ ଯୀଶୁ ମାପୃଙ୍ଗ୍ ପାର୍ତି କିତାର୍।

ରୋମିୟ 5:7

ଦରମ୍ ମାନାୟାର୍ କାଜିଙ୍ଗ୍ ଇନେର୍ ପା ଜାର୍ ଜିବୁନ୍‌ତିଙ୍ଗ୍ ହିଉନ୍। ହେୱାନ୍ ହାର୍ ମାନାୟାର୍ କାଜିଙ୍ଗ୍ ଜାର୍ ଜିବୁନ୍ ହିଦେଙ୍ଗ୍ ଇଚା କିତିସ୍‌ ପା ତା କାଜିଙ୍ଗ୍ ହେୱାନ୍ ହାଃଦେଙ୍ଗ୍ ଆଡୁନ୍।

ପିଲିପିୟ 2:14

ହେଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ଇନାକା କିନାଦେର୍ ହେଦାଙ୍ଗ୍‌ତିଙ୍ଗ୍ ଗୁଜ୍-ଗୁଜ୍ କିଜି ଜୁକ୍ତି ଆମାଟ୍।