ପକ୍ୟାତାକା 5:17 - New Testament in Pengo Parja Language

¹⁷ ପାଚେ ଈଶ୍ୱର ହେବାକିନି ପ୍ରଦାନ୍ ମୁଡ଼୍‌ଦି ପୁଜାରି ଆରେ ତା ହାଙ୍ଗ୍‌ଦି ସାଦୁକିଦଳ୍‌ ଆକାର୍ ଆତାର୍।

ସତ୍‌ ବଚନ୍‌ ପୁନି ନିୟମ୍‌

¹⁷ ପାଚେ ମୁଡ଼୍‌ ମାପ୍ରୁହେବାକିନାକାନ୍‌ ଆରି ହେୱାର୍‌ତି ହାଙ୍ଗ୍‌ଦି ୱିଜ଼ାକାର୍‌, ଇଚିସ୍‌ ସାଦୁକିର୍‌ କୁଦା, ପକ୍ୟାତାକାର୍‌ ଜପି ଆକାର୍‍ତ ରିସା ଆଜ଼ି ନିଂତାର୍

ପକ୍ୟାତାକା 5:17 ပူးပေါင်းရင်းမြစ်များ

ମାତିଉ 27:18

ଗବର୍‌ନର୍ ପିଲାତ ପୁନ୍‌ଞ୍ଜି ମାଚାନ୍ ଯେ ମାନାୟାର୍ ଯୀଶୁଙ୍ଗ୍ ରିସା ମାଚାତ୍। ହେଦାଙ୍ଗ୍ କାଜିଙ୍ଗ୍ ହେୱାନ୍ କେଇଦ ହେଲାଇ କିଜି ହିତାର୍‌ନା।

ମାତିଉ 3:7

ମାତର୍ ପାରୁସିଦଳ୍‍ ଆରେ ଯିହୁଦି ଦର୍‍ମନି ସାଦୁକିଦଳ୍‌ ବିତ୍ରେତାଙ୍ଗ୍ କେତେକ୍ ମାନାୟ୍ ଡୁବନ୍ ଅଦେଙ୍ଗ୍ ୱାନାରା, ଇଦାଙ୍ଗ୍ ହୁଡ଼୍‌ଜି ଡୁବନ୍‌ହିନି ଯୋହନ ହେୱାରିଙ୍ଗ୍ ୱେଚ୍‌ଚାନ୍, “ଏପେଙ୍ଗ୍ ବିସ୍‌ମାନି ରାଚ୍ ଲେକେ ବାନ୍ୟା ମାନାଦେର୍! ଏପେଙ୍ଗ୍ ମି ଆଗେନି ରିସାତାଙ୍ଗ୍ ହନ୍ତେଙ୍ଗ୍ ମିଙ୍ଗେଙ୍ଗ୍ ଇନେର୍ ଚେତ୍‌ନା କିତ୍‌ତାର୍।

ଜହନ୍‌ 12:10

ଲାଗିଙ୍ଗ୍ ଈଶ୍ୱର ହେବାକିନି ମୁଡ଼୍‌ଦି ପୁଜାରିର୍ ପା ଲାଜରତିଙ୍ଗ୍ ମାର୍ନେ ଅସ୍ତେଙ୍ଗ୍ ଉପାୟ୍ କିତାର୍।

ଜହନ୍‌ 12:19

ଲାଗିଙ୍ଗ୍ ପାରୁସିଦଳ୍‍ ହେୱାର୍ ବିତ୍ରେ କାତାବାର୍ତା ଆତାର୍, “ହୁଡ଼୍‌ନାଦେରା ମା ୱିଜୁ ଉପାୟ୍ ବେକାରେ ଆନାତା। ହୁଡ଼ାଟ୍, ପୁର୍ତିନି ମାନାୟାର୍ ତାପାଚେ-ପାଚେ ହାଚାରେ।”

ପକ୍ୟାତାକା 13:45

ମାତର୍ ଯିହୁଦି ନେତାର୍ ବିନ୍‌ଜାତିର୍ ମାନାୟାରିଙ୍ଗ୍ ହୁଡ଼୍‌ଜି ରିସାଆତାର୍। ଆରେ ହେୱାର୍ ପାଉଲ ୱେଚ୍‌ଚି କାତାତିଙ୍ଗ୍ ବିରଦ୍ କିଜି ନିନ୍ଦା କିଦେଙ୍ଗ୍ ଲାଗାତାର୍।

ପକ୍ୟାତାକା 15:5

ପାରୁସିଦଳ୍‍ନି କେତ୍‌ଜାଣ୍ ପାର୍ତି କିନାକାର୍ ନିଙ୍ଗ୍‌ଞ୍ଜି ୱେଚ୍‌ଚାର୍, “ବିନ୍‌ଜାତିନି ମାନାୟାର୍ ସୁନତ ବିଦି ଆରେ ମୋଶା ଲେକିକିତି ନିୟମ୍‌ନି ସାସ୍ତର୍ ପା ମାନିକିନି ଦର୍‌କାର୍।”

ପକ୍ୟାତାକା 17:5

ମାତର୍ ଯିହୁଦି ମାନାୟାର୍ ଆକାର୍ ଆଜି ସହର୍‌ତାଙ୍ଗ୍ କେତେକ୍ କରାପ୍ ମାନାୟାରିଙ୍ଗ୍ ରୁଣ୍ଡାଇ କିତାର୍, ଆରେ ହେୱାର୍ ରବେଆଜି ସହର୍‌ତାକେ ଗଣ୍ଡ୍‍ଗଲ୍ କିୟିକିତାର୍। ଆରେ ହେୱାର୍ ଯାସୋନ ଇଲ୍‌ତିଙ୍ଗ୍ ଡ୍ରିକ୍‌ଚି ପାଉଲ ଆରେ ଶିଲାଙ୍ଗ୍ ମାନାୟାର୍ ଲାଗାୟ୍ ତାତେଙ୍ଗ୍ ଉପାୟ୍ କିତାର୍।

ପକ୍ୟାତାକା 4:26

ଈଶ୍ୱର ବିରଦ୍‌ତାକେ ଆରେ ତା ବାଚିକିତି ଖ୍ରୀଷ୍ଟ ବିରଦ୍‌ତାକେ, ପୁର୍ତିନି ରାଜାର୍ ଯୁଜ୍ କିଦେଙ୍ଗ୍ ନିଲ୍‌ତାର୍, ଆରେ ଜେକନି ସାସନ୍ କିନାକାର୍ ହେୱାର୍ ହୁଦାଙ୍ଗ୍ ମେହାଆଜି ରବେ ଆତାର୍।’

ପକ୍ୟାତାକା 4:6

ହେ ନେତାର୍ ବିତ୍ରେତାଙ୍ଗ୍ ହାନାନ ତର୍‌ଦି ଈଶ୍ୱର ହେବାକିନି ପ୍ରଦାନ୍ ମୁଡ଼୍‌ଦି ପୁଜାରି, କୟାପା ତର୍‍ଦାକାନ୍ ର ମାନାୟ୍, ଯୋହନ ତର୍‍ଦାକାନ୍ ର ମାନାୟ୍, ଆଲେକ୍‌ଜାଣ୍ଡ୍ରିଆ ତର୍‍ଦାକାନ୍ ର ମାନାୟ୍, ଆରେ ଈଶ୍ୱର ହେବାକିନି ପ୍ରଦାନ୍ ମୁଡ଼୍‌ଦି ପୁଜାରି ଲାତ୍ରାନି ୱିଜାକାର୍ ମାନାୟ୍ ହେବେ ମାଚାର୍।

ପକ୍ୟାତାକା 5:16

ବାଚିକିତି ଚେଲାହିର୍‌ତାକେ ଯିରୁଶାଲାମ ସହର୍‌ନି ଚାରିବେଣ୍‌ତି ସହର୍‌ନି ମାନାୟାର୍ ପା ରଗିୟାରିଙ୍ଗ୍ ଆରେ ବୁତ୍ଆତ୍ମା ଡୁୟାଆତାକାରିଙ୍ଗ୍ ତାସି ରବେଆଜି ମାଚାର୍। ଆରେ ହେୱାର୍ ୱିଜାକାର୍ ହାର୍‌ଆତାର୍।

ପକ୍ୟାତାକା 7:9

ଇ ଆକଦାଦିର୍ ତା ହିରୁ ଟଣ୍ଡାହି ଯୋଷେପତିଙ୍ଗ୍ ଆକାର୍ ଆତାର୍। ଆରେ ହେୱାନିଙ୍ଗ୍ ର ହଲିଆ କିଜି ମିସର୍ ଦେସ୍‌ତ ପତାର୍‌। ମାତର୍ ଈଶ୍ୱର ଯୋଷେପତିଙ୍ଗ୍ ସାଇଜ କିଜି ମାଚାନ୍।

ଗାଲାତିୟ 5:21

ଆରେ ମଦୁଆ ଆନାକା, କରାପ୍ ମାନାୟ୍ ହୁଦାଙ୍ଗ୍ ମାହାଆଜି ୱାରି କିନାକା, ଇଲେକେ ଜେକନି ପାପ୍ କାମାୟ୍ କିନାର୍। ଆନେଙ୍ଗ୍ ଆଗେ ମିଙ୍ଗେଙ୍ଗ୍ ଇନେସ୍ ୱେଚ୍‌ଚି ମାନ୍‌ଞ୍ଚାଙ୍ଗ୍, ହେଲେକେ ଆରେରଗ ୱେଚ୍‌ଚାନାଙ୍ଗା ଯେ, ଇମ୍‌ଣାକାର୍ ଇ ୱିଜୁ ପର୍‌କାର୍ କାମାୟ୍ କିନାର୍, ହେୱାର୍ ଈଶ୍ୱର ସାସନ୍ କିନି ରାଜିନି ଅଦିକାର୍ ଆଦେଙ୍ଗ୍ ଆଡୁର୍।

ଜାକ୍‌ବ 4:5

ଦରମ୍ ସାସ୍ତର୍‌ତାକେ ଲେକେଆତି ଇ ବିଷୟତିଙ୍ଗ୍ ଏପେଙ୍ଗ୍ ବୁଲ୍ ଇଞ୍ଜି ବାବିକିନାଦେରା କି?, ସାସ୍ତର୍‌ତାକେ ଲେକାଆତାତ୍‌ନା, “ଈଶ୍ୱର ପବିତ୍ର ଆତ୍ମାତିଙ୍ଗ୍ ମା ବିତ୍ରେ ବାହା କିଦେଙ୍ଗ୍ ହିତ୍‌ତାନ୍‌ନା। ଆରେ ହେୱାନ୍ ମାଙ୍ଗେଙ୍ଗ୍ ପୁରା ଆଦିକାର୍ କିଦେଙ୍ଗ୍ ର ମାନ୍ କିତାନ୍‌ନା।”

୧ ପିତର 2:1

ହେଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ୱିଜୁ ପର୍‌କାର୍ କରାପ୍ କାମାୟ୍ କିନି କାଜିଙ୍ଗ୍ ମୁନା କିୟାଟ୍। ଏପେଙ୍ଗ୍ ଜେକନି ମାନାୟାରିଙ୍ଗ୍ ଟକାୟ୍ କିମାଟ୍, ଏପେଙ୍ଗ୍ ହାର୍ ଇଞ୍ଜି ଜାର୍‌ତିଙ୍ଗ୍ ବାଟ୍‌ପାଣ୍ ଆମାଟ୍, ଏପେଙ୍ଗ୍ ଜେକନି ମାନାୟାରିଙ୍ଗ୍ ଆକାର୍ ଆମାଟ୍ ଆରେ ମାନାୟାର୍ ବିରଦ୍‌ତାକେ କରାପ୍ କାତା ୱେଚ୍‌ମାଟ୍।