ପକ୍ୟାତାକା 4:29 - New Testament in Pengo Parja Language

²⁹ ଏ ମାପୃ ନଙ୍ଗୟ୍ ହେୱାର୍ ମାଙ୍ଗେଙ୍ଗ୍ ଅସ୍ତାନାପ୍ ଇଞ୍ଜି ପାଣ୍ଡ୍ରୁ କିଦ୍‌ନାରା ହେ ବିଷୟରେ ଏନେଙ୍ଗ୍ ଅଲପ୍ ବାବିକିଜି ହୁଡ଼ା। ଆରେ ନି ହେବାକିନି ଇ ମାନାୟାରିଙ୍ଗ୍ ନି ବିଷୟରେ ସାହାସ୍ ହୁଦାଙ୍ଗ୍ ୱେଚ୍‌ଚେଙ୍ଗ୍ ଶାକ୍ତି ହିୟା।

ସତ୍‌ ବଚନ୍‌ ପୁନି ନିୟମ୍‌

²⁹ ଆରେ ନଙ୍ଗ୍‌, ଏ ମାପ୍ରୁ, ହେୱାର୍‌ତି ପାଣ୍ଡ୍ରୁନିକାରିଂ ମେହା; ଆରେ, ନି ଆଡ଼ିୟାରିଂ ପୁରା ସାସ୍‌ ହୁକେ ନି ବଚନ୍‌ ଇଞ୍ଜେଙ୍ଗ୍‌ ସାକ୍ତି ହିଦା,

ପକ୍ୟାତାକା 4:29 ပူးပေါင်းရင်းမြစ်များ

ପକ୍ୟାତାକା 13:46

ପାଉଲ ଆରେ ବର୍ଣ୍ଣବା ହେୱାରିଙ୍ଗ୍ ସାହାସ୍‌ଆଜି ୱେଚ୍‌ଚାର୍, “ପାର୍ତୁମ୍ ମିଙ୍ଗେଙ୍ଗ୍ ଈଶ୍ୱର କାତା ୱେଚ୍‌ନାକା ମାଚାତ୍। ମାତର୍ ଏପେଙ୍ଗ୍ ହେଦାଙ୍ଗ୍‌ତିଙ୍ଗ୍ ମାନି କିଉଦେରା, ଆରେ ଏପେଙ୍ଗ୍ ୱିଜ୍‌ୱି ଜିବୁନ୍ ପାୟା ଆଦେଙ୍ଗ୍ ଇଚା କିଉଦେରା। ଲାଗିଙ୍ଗ୍ ଆପେଙ୍ଗ୍ ବିନ୍‌ଜାତିର୍‌ତାକେ ହାନାପା।

ପକ୍ୟାତାକା 14:3

ମାତର୍ ପାଉଲ ଆରେ ବର୍ଣ୍ଣବା ହେ ସହର୍‌ତାକେ କେତେକ୍ ଦିନ୍ ପାତେକ୍ ମାଚାର୍। ମାପୃତିଙ୍ଗ୍ ଆହାକିଜି ସାହାସ୍‌ତାଙ୍ଗ୍ ଶୁଣାୟ୍ କିତାର୍। ମାପୃ ହେୱାରିଙ୍ଗ୍ ବେସି ଚିନା ଆରେ ଚାନିଆଆନି କାମାୟ୍ କିଦେଙ୍ଗ୍ ସାଇଜ କିତାନ୍। ଆରେ ହେୱାନ୍ ହେୱାର୍ ଶୁଣାଇକିତି କାତା ସତ୍ ଇଞ୍ଜି ମାନାୟାରିଙ୍ଗ୍ ଚଚ୍‌ଚାନ୍।

ପକ୍ୟାତାକା 19:8

ପାଚେ ପାଉଲ ପାକାପାକି ତିନ୍‌ମାସ୍‌ ପାତେକ୍ ପାର୍ତାନା ଇଞ୍ଜ ହାଲ୍‌ଜି ମାଚାନ୍। ହେୱାର୍ ଇନେସ୍ ଈଶ୍ୱର ସାସନ୍ କିନି ରାଜି ବିଷୟରେ ପାର୍ତିକିନାର୍ ହେଦାଙ୍ଗ୍ କାଜିଙ୍ଗ୍ ହେୱାର୍ ହୁଦାଙ୍ଗ୍ ଆଲ୍‌ଚାନା କିଜି ମାଚାନ୍।

ପକ୍ୟାତାକା 26:26

ରାଜା ତ ଇୱିଜୁ ବିଷୟରେ ପୁଚାନ୍‌ନା, ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ଶାସ୍ ହୁଦାଙ୍ଗ୍ ହେୱାନିଙ୍ଗ୍ ୱେଚ୍‌ନାଙ୍ଗା। ଆନେଙ୍ଗ୍ ପାର୍ତି କିନାଙ୍ଗା ଯେ ଇ ବିଷୟରେ ହେୱାନ୍ ପୁରା-ପୁରି ପୁଚାନ୍‌ନା, ଇୱିଜୁ ବିଷୟ ୱିଜାକାର୍ ଆଗେ ଗଟାଆତାତ୍‌ନା।

ପକ୍ୟାତାକା 28:31

ଆରେ ତା ଲାଗାୟ୍ ୱାଜିମାଚାର୍ ହେ ୱିଜାକାରିଙ୍ଗ୍ ଶାସ୍ ହୁଦାଙ୍ଗ୍ ଆରେ ପାଣ୍ଡ୍ରା ଆୱାଦାଙ୍ଗ୍ ଈଶ୍ୱର ସାସନ୍ କିନି ରାଜି ବିଷୟରେ ଶୁଣାୟ୍ କିଜି ମାଚାନ୍, ଆରେ ମାପୃ ଯୀଶୁ ଖ୍ରୀଷ୍ଟ ବିଷୟରେ ହିକ୍ଷା କିଜି ମାଚାନ୍।

ପକ୍ୟାତାକା 4:13

ହେୱାର୍ ପିତର ଆରେ ଯୋହନ ସାହାସ୍ ହୁଡ଼୍‌ଜି, ଆରେ ହେୱାର୍ ପାଟ୍ ପଡ଼ିକିୱାତାର୍ ଆରେ ବୁଦି ହିଲାକାର୍ ଇଞ୍ଜି ପୁନ୍‌ଞ୍ଜି, ଇଦାଙ୍ଗ୍ ବୁଜାଆଜି ଚାନିଆଆତାର୍। ଆରେ ହେୱାର୍ ଯୀଶୁ ହୁଦାଙ୍ଗ୍ ମାଚାର୍ ଇଞ୍ଜି ହେୱାରିଙ୍ଗ୍ ଚିନ୍ କିତାର୍।

ପକ୍ୟାତାକା 4:21

ହେବେତାଙ୍ଗ୍ ହେ ମିଟିଙ୍ଗ୍ ଇଲ୍‌ନି ମାନାୟାର୍ ହେୱାରିଙ୍ଗ୍ ଦଣ୍ଡ୍ ହିଦେଙ୍ଗ୍ ଇମ୍‌ଣି ଉପାୟ୍ ପା ଗାଟା ଆୱିତିଲେ, ହେୱାରିଙ୍ଗ୍ ପାଣ୍ଡ୍ରୁକିଜି ପିସ୍ତାର୍, ଲାଗିଙ୍ଗ୍ ଇନାକା ଗଟାଆଜି ମାଚିସ୍, ହେଦାଙ୍ଗ୍ କାଜିଙ୍ଗ୍ ମାନାୟ୍ ୱିଜାକାର୍ ଈଶ୍ୱରତିଙ୍ଗ୍ ଜୟ୍-ଜୟ୍ କିଦେଙ୍ଗ୍ ଲାଗାତାର୍।

ପକ୍ୟାତାକା 4:31

ହେୱାର୍ ପାର୍ତାନା କିତି ପାଚେ, ଇମ୍‌ଣି ବାହାତାକେ ରବେଆଜି ମାଚାର୍, ହେ ବାହାତିଙ୍ଗ୍ ଈଶ୍ୱର ଲେପ୍‌ତାନ୍‌। ଆରେ ହେବେ ମାନି ୱିଜାକାର୍ ପବିତ୍ର ଆତ୍ମା ପୁରାଆଜି, ଆରେ ସାସ୍‌ତାଙ୍ଗ୍ ଈଶ୍ୱର କାତା ୱେଚ୍‌ଚେଙ୍ଗ୍ ଲାଗାତାର୍।

ପକ୍ୟାତାକା 9:27

ମାତର୍ ବାଚିକିତି ଚେଲାହିର୍ ଲାଗାୟ୍ ବର୍ଣ୍ଣବା ତର୍‍ଦାକାନ୍ ରକାନ୍ ମାନାୟ୍ ଶାଉଲତିଙ୍ଗ୍ ତାସିୱାତାନ୍। ଦମେସକ ସହର୍‌ତାକେ ହାନି ହାଜ୍‌ଦ ଶାଉଲ ଯୀଶୁ ମାପୃଙ୍ଗ୍ ହୁଡ଼୍‌ତି ବିଷୟ ହେୱାରିଙ୍ଗ୍ ୱେଚ୍‌ଚାନ୍। ଆରେ ଶାଉଲ ଦମେସକ ସହର୍‌ତାକେ ଯୀଶୁ ବିଷୟରେ ଶାସ୍ ହୁଦାଙ୍ଗ୍ ଶୁଣାୟ୍ କିତି ବିଷୟ ପା ହେୱାନ୍ ହେୱାରିଙ୍ଗ୍ ୱେଚ୍‌ଚାନ୍।

ପକ୍ୟାତାକା 9:28

ଆରେ ଶାଉଲ ବାଚିକିତି ଚେଲାହିର୍ ହୁଦାଙ୍ଗ୍ ମାଚାନ୍। ଆରେ ଯୀଶୁ ମାପୃ ବିଷୟରେ ହେୱାନ୍ ଶାସ୍ ହୁଦାଙ୍ଗ୍ ଯିରୁଶାଲାମ ସହର୍‌ନି ୱିଜୁ ନିପଣ୍ ଶୁଣାୟ୍ କିଦେଙ୍ଗ୍ ଲାଗାତାନ୍।

୧ କରନ୍ତିୟ 14:13

ଲାଗିଙ୍ଗ୍, ଇନେର୍ ବୁଜାଆୱି ବାଷାତାଙ୍ଗ୍ କାତା ୱେଚ୍‌ନାନ୍, ହେୱାନ୍ ହେ କାତାନି ଅର୍ତ ବୁଜାୟ୍ କିଦେଙ୍ଗ୍ ଈଶ୍ୱର ଦାନ୍ ହିଦେନ୍ ଇଞ୍ଜି ପାର୍ତାନା କିୟେନ୍।

୨ କରନ୍ତିୟ 3:12

ହେଦାଙ୍ଗ୍ କାଜିଙ୍ଗ୍ ଆପେଙ୍ଗ୍ ଇ ପୁନି ପାର୍ମାଣ୍‌ତାଙ୍ଗ୍ ଆହା ପାୟାଆଜି ସାସ୍ ଆତାପ୍‌ନା।

ପିଲିପିୟ 1:14

ଆରେ ଆନେଙ୍ଗ୍ ବନ୍ଦି ଆଜିମାଚି କାଜିଙ୍ଗ୍ ପାର୍ତିକିନି ଟଣ୍ଡାର୍ ଈଶ୍ୱରତାକେ ବେସି ପାର୍ତି କିତାର୍। ଆରେ ଈଶ୍ୱର କାତା ସାହାସ୍ ହୁଦାଙ୍ଗ୍ ଶୁଣାୟ୍ କିତାର୍।

୧ ଥେସଲନୀକିୟ 2:2

ମାତର୍ ଆପେଙ୍ଗ୍ ମିତାକେ ୱାନି ଆଗେ ଫିଲିପ ସହର୍‌ତାକେ ଦୁଃକ୍ ଆରେ କଷ୍ଟ ପାୟାଆଜି ମାଚିସ୍ ପା, ଈଶ୍ୱର ମାଙ୍ଗେଙ୍ଗ୍ ହାର୍ଦିକାବୁର୍ ଶୁଣାୟ୍ କିଦେଙ୍ଗ୍ ସାସ୍ ହିତ୍‌ତାନ୍। ହେଦାଙ୍ଗ୍ କାଜିଙ୍ଗ୍ ଆପେଙ୍ଗ୍ ମିଙ୍ଗେଙ୍ଗ୍ ହାର୍ଦିକାବୁର୍ ଶୁଣାୟ୍ କିଦେଙ୍ଗ୍ ସାସ୍ କିତାପ୍।

୨ ତିମଥି 4:17

ମାତର୍ ମାପୃ ନା ନିପଣ୍ ଆଜି ନାଙ୍ଗେଙ୍ଗ୍ ଶାକ୍ତି କିତ୍‌ତାନ୍, ଆରେ ଆନେଙ୍ଗ୍ ଇନେସ୍ ହାର୍ଦିକାବୁର୍ ପୁରାପୁରି କିଲେର୍ କିଜି ଶୁଣାୟ୍ କିଦେଙ୍ଗ୍ ଆଡ୍‌ନାଙ୍ଗ୍। ଆରେ ବିନ୍‌ଜାତିର୍ ୱିଜୁ ମାନାୟାର୍ ହେଦାଙ୍ଗ୍ ୱେଞ୍ଜେଙ୍ଗ୍ ଆଡ୍‌ନାର୍, ଇଦାଙ୍ଗ୍ କାଜିଙ୍ଗ୍ ହେୱାନ୍ ନାଙ୍ଗେଙ୍ଗ୍ ହାଃନିତାଙ୍ଗ୍ ରକ୍ଷା କିତ୍‌ତାନ୍।