୧ ଥେସଲନୀକିୟ 2:16 - New Testament in Pengo Parja Language

¹⁶ ଇନେସ୍‌କି ବିନ୍‌ଜାତିନି ମାନାୟାର୍ ରକ୍ଷା ପାୟାଆମେର୍ ଇଞ୍ଜି ହାର୍ଦିକାବୁର୍ ଶୁଣାୟ୍ କିତିଲେ, ହେୱାର୍ ମାଙ୍ଗେଙ୍ଗ୍ ଦୁଃକ୍ କଷ୍ଟ ହିଦ୍‌ନାରା। ହେଲେକେ ହେୱାର୍ ପାପ୍ କିଜି ମାଚାର୍, ସେସ୍ ୱେଡ଼ାଙ୍ଗ୍ ଈଶ୍ୱର ହେୱାରିଙ୍ଗ୍ ଦଣ୍ଡ୍ ହିଦେଙ୍ଗ୍ କାତାନ୍‌ନା।

ସତ୍‌ ବଚନ୍‌ ପୁନି ନିୟମ୍‌

¹⁶ ଇନାକିଦେଂକି ଇସ୍ୱର୍‌ତିଂ ପାର୍ତିକିୱି ଜିହୁଦିର୍‌ତି ମୁକ୍ତି ଆନାକା କାଜିଂ ହେୱାର୍‌ ଲାଗାଂ ସୁଣାୟ୍‌ କିଦେଙ୍ଗ୍‌ ହେୱାର୍‌ ମାଙ୍ଗେଙ୍ଗ୍‌ ବାଦା ହିତ୍‌ତାର୍‌ନା; ଇ ଲାକେ ହେୱାର୍‌ ନିତ୍ରେ ଜାର୍‌ ଜାର୍‌ତିଂ ପାପ୍‌ ବାର୍ତି କିତାର୍ଣ୍ଣା; ମତର୍‌ ହେୱାର୍‌ତି ଜପି ରିସା ପୁରାବାର୍ତି ଆର୍‍ତାତେ ।

୧ ଥେସଲନୀକିୟ 2:16 ပူးပေါင်းရင်းမြစ်များ

ମାତିଉ 12:45

ହେପାଦ୍ନା ହେ ବୁତ୍ଆତ୍ମା ହାଲ୍‌ଜି ତାବେତାଙ୍ଗ୍ ଆରେ ଆଦିକ୍ ବାନ୍ୟା ସାତ୍‌ଜାଣ୍ ବୁତ୍‌କୁକାଙ୍ଗ୍ କୁକ୍‌ଚି ତାନାତ୍। ହେ ବୁତ୍‌କୁ ୱିଜୁ ହେ ମାନାୟ୍‌ବିତ୍ରେ ହଣ୍‌ଜି ରବେ ମାନ୍‌ଗିନିକ୍। ହେଲେକେ ହେ ମାନାୟ୍ ଅବସ୍ତା ଆଗେଲେକେ ଆଦିକ୍ କରାପ୍ ଆନାତ୍। ଇ ଯୁଗ୍‌ନି କରାପ୍ ମାନାୟାର୍ ବିତ୍ରେ ପା ହେଲେକେ ଗଟାଆନାତ୍।”

ମାତିଉ 23:32

ମି ଆକଦାଦିର୍ ଇମ୍‌ଣି ପାପ୍ କାମାୟ୍ ଆରମ୍ କିଜି ମାଚାର୍, ହେଦେଲିଙ୍ଗ୍ ଏପେଙ୍ଗ୍ ସେସ୍ କିନାଦେର୍।

ମାତିଉ 24:14

ଈଶ୍ୱର ମାନିରାଜି ବିଷୟରେ ହାର୍ଦିକାବୁର୍ ୱିଜୁ ମାନାୟ୍ ଜାତିର୍ କାଜିଙ୍ଗ୍ ସତ୍ ସାକି ଲେକେ ଇ ୱିଜୁ ପୁର୍ତିତାକେ ୱେଚ୍‌ନାକା ମାନାତ୍। ତାପାଚେ ହାଲ୍‌ଜି ଯୁଗ୍‌ଶେସ୍ ଆନାତ୍।

ମାତିଉ 24:6

ଯୁଜ୍ ବିଷୟ ଆରେ ଯୁଜ୍ ଆନାତ୍ ଇଞ୍ଜି ଏପେଙ୍ଗ୍ ୱେନାଦେର୍, ଜାଗ୍ରତ୍! ହେପାଦ୍ନା କାକୁଲ୍‌ତି ଆମାଟ୍। ଇୱିଜୁ ହାତ୍‌ପା ଗଟାଆନାତ୍, ମାତର୍ ଇପାଦ୍ନା ଯୁଗ୍ ୱିଜୁତ୍।

ମାତିଉ 3:12

ହେୱାନ୍ କେଇଦ ଗହମ୍‌‌ନି ପଲ ଏଡ଼ାଇ କିଦେଙ୍ଗ୍ ତା କେଇଦ ହେଚି ମାନାତ୍। ହେବେତାଙ୍ଗ୍ ହେୱାନ୍ ତାସ୍‌ତିଙ୍ଗ୍ ପଲତାଙ୍ଗ୍ ଏଡ଼ାଇ କିନାନ୍। ହେୱାନ୍ ତା ହେଚିତାଙ୍ଗ୍ ବାଚିକିତି ହାର୍ଦି କୁଲିଙ୍ଗ୍ ରୁଣ୍ଡାଇକିଜି ପାଲ୍‌ତାକେ ଅଜି ଇଟ୍‌ନାନ୍। ତାପାଚେ ପଲ ଆରେ ଦର୍‌କାର୍‌ଆୱି ବାରବିନି ଜିନିଷ୍‌ତିଙ୍ଗ୍ ୱିଜୁଦିନ୍ କାଚାଆନି ନାଣିତାକେ ଅଜି ତୁସିହିନାନ୍‌।”

ମାର୍କ 16:16

ଇନେର୍ ନା ହାର୍ଦିକାବୁର୍‌ତିଙ୍ଗ୍ ପାର୍ତିକିନାର୍ ଆରେ ଡୁବନ୍ ଆନାର୍। ହେୱାନ୍ ରକ୍ଷା ପାୟା ଆନାନ୍, ମାତର୍ ଇନେର୍ ପାର୍ତି କିଉନ୍, ହେୱାନିଙ୍ଗ୍ ଈଶ୍ୱର ଦଣ୍ଡ୍ ହିନାନ୍।

ପକ୍ୟାତାକା 13:45

ମାତର୍ ଯିହୁଦି ନେତାର୍ ବିନ୍‌ଜାତିର୍ ମାନାୟାରିଙ୍ଗ୍ ହୁଡ଼୍‌ଜି ରିସାଆତାର୍। ଆରେ ହେୱାର୍ ପାଉଲ ୱେଚ୍‌ଚି କାତାତିଙ୍ଗ୍ ବିରଦ୍ କିଜି ନିନ୍ଦା କିଦେଙ୍ଗ୍ ଲାଗାତାର୍।

ପକ୍ୟାତାକା 13:50

ମାତର୍ ଯିହୁଦି ନେତାର୍ ଯିହୁଦି ଦରମ୍ ମାନିକିନି ବିନ୍‌ଜାତି ଜଣାସୁଣା କଗ୍‍ଲେକାଙ୍ଗ୍ ଆରେ ସହର୍‌ନି ମୁଡ଼୍‌ଦାକାରିଙ୍ଗ୍, ପାଉଲ ଆରେ ବର୍ଣ୍ଣବା ବିରଦ୍‌ତାକେ ଟିଉଲାୟ୍ କିତାର୍। ଲାଗିଙ୍ଗ୍ ହେୱାର୍ ପାଉଲ ଆରେ ବର୍ଣବାଙ୍ଗ୍ ଦୁକ୍‌କଷ୍ଟ ହିତାର୍। ଆରେ ହେୱାର୍ ଏରିଆତାଙ୍ଗ୍ ହପ୍ତାର୍।

ପକ୍ୟାତାକା 14:19

ଆନ୍ତିୟକିଆ ସହର୍ ଆରେ ଇକନିୟ ସହର୍‌ତାଙ୍ଗ୍ କେତେକ୍ ଯିହୁଦିର୍ ହେବେ ୱାଜି ମାନାୟାରିଙ୍ଗ୍ ତାପଣ୍ କିତାର୍। ହେୱାର୍ ପାଉଲତିଙ୍ଗ୍ କାଲ୍‌କୁ ଇଡ଼୍‌ତାର୍, ଆରେ ହେୱାର୍ ପାଉଲ ହାଃତାନ୍ ଇଞ୍ଜି ବାବିକିଜି ବାର୍ତ ନିର୍‌ଚି ଅତାର୍।

ପକ୍ୟାତାକା 14:2

ମାତର୍ ଇମ୍‌ଣି ଯିହୁଦି ମାନାୟାର୍ ପାର୍ତି କିୱାତାର୍, ହେୱାର୍ ବିନ୍‌ଜାତିନି ମାନାୟାରିଙ୍ଗ୍ ପାର୍ତି କିନାକାର୍ ମାନାୟାର୍ ବିରୁଦ୍‌ତାକେ ଉସ୍‌କାଇ କିତାର୍। ଲାଗିଙ୍ଗ୍ ବିନ୍‌ଜାତିନି ଟଣ୍ଡାରିଙ୍ଗ୍ ରିସାଆତାର୍।

ପକ୍ୟାତାକା 14:5

ଏଚେପାଦ୍ନା ବିନ୍‌ଜାତିର୍ ଆରେ ପାର୍ତିକିୱି ଯିହୁଦିର୍, ହେୱାର୍ ନେତାର୍ ହୁଦାଙ୍ଗ୍ ମେହାଆଜି ହେୱାର୍ ବିରଦ୍‌ତାଙ୍ଗ୍ ଇନସ୍ତାକିଜି କାଲ୍‌କୁ ହୁଦାଙ୍ଗ୍ ଇଡ଼୍‌ଦେଙ୍ଗ୍ ଉପାୟ୍ କିତାର୍।

ପକ୍ୟାତାକା 17:13

ପାଉଲ ବେରିୟା ସହର୍‌ତାକେ ପା ଈଶ୍ୱର କାତା ଶୁଣାୟ୍ କିନାନା ଥେସଲନିକି ସହର୍‌ତାକେ ମାନି ଯିହୁଦିର୍ ପୁନ୍‌ଞ୍ଜି, ଇ ସହର୍‌ତାକେ ୱାତାର୍। ଇ ସହର୍ ପା ମାନାୟାରିଙ୍ଗ୍ ଉସ୍‌କାଇ କିଜି ମାନାୟାରିଙ୍ଗ୍ ଗଣ୍ଡ୍‍ଗଲ୍ କିୟିକିଦେଙ୍ଗ୍ ଲାଗାତାର୍।

ପକ୍ୟାତାକା 19:9

ମାତର୍ ହେବେ ମାନି କେତ୍‌ଜାଣ୍ ମାନାୟ୍ ଅମାନ୍ୟା ଆଜି ପାର୍ତି କିୱାତାର୍। ଆରେ ହେୱାର୍ ୱିଜାକାର୍ ମୁମ୍‌ଦ ଯୀଶୁତାକେ ପାର୍ତିକିନି ବିଷୟରେ ନିନ୍ଦା କିଦେଙ୍ଗ୍ ଲାଗାତାର୍। ଲାଗିଙ୍ଗ୍ ପାଉଲ ହେୱାର୍ ହୁଦାଙ୍ଗ୍ ଅଲ୍‌ଗା ଆତାନ୍। ଆରେ ହେୱାନ୍ ପାର୍ତିକିନି ଚେଲାହିରିଙ୍ଗ୍ ଅଜି ତୁରାନ ତର୍‌ଦି ସ୍କୁଲ୍‌ତାକେ ହିକ୍ଷାହିଜି ମାଚାନ୍।

ପକ୍ୟାତାକା 21:21

ବିନ୍‌ଜାତିନି ମାନାୟାର୍ ବିତ୍ରେ ମାନି ଯିହୁଦିର୍ ତା ହିମ୍‌ଣା ୱାକ୍‌ଡ଼ାକାଙ୍ଗ୍ ସୁନତ ବିଦି କିୱେଦେଙ୍ଗ୍ ଆରେ ଜେକନି ବିଦିତିଙ୍ଗ୍, ଆରେ ମୋଶା ଲେକିକିତି ନିୟମ୍‌ ସାସ୍ତର୍‌ତିଙ୍ଗ୍ ମାନି କିୱେଦେଙ୍ଗ୍ ହିକ୍ଷା ହିତି ବିଷୟରେ ଇ ଯିହୁଦି ଖ୍ରୀଷ୍ଟାନାର୍ ୱେଚାର୍‌ନା।

ପକ୍ୟାତାକା 23:12

ନାଡ଼ିସ୍ ଆତିଲେ ଯିହୁଦି କେତେକ୍ ମାନାୟାର୍ ଦଳ୍ ଆତାର୍। ପାଉଲତିଙ୍ଗ୍ ମାର୍ନେ ଅହ୍‌ୱି ପାତେକ୍ ଆପେଙ୍ଗ୍ ଆରାଣ୍ ଆସ୍‌ପୁପ୍ ଇଞ୍ଜି ଜାର୍-ଜାର୍ ପାର୍ମାଣ୍ କିତାର୍।

ପକ୍ୟାତାକା 24:9

ତର୍ତୁଲ କାତା ସତ୍ ଇଞ୍ଜି ତା ହୁଦାଙ୍ଗ୍ ମାନି ଯିହୁଦିର୍ ପା ୱେଚ୍‌ଚାର୍।

ପକ୍ୟାତାକା 25:2

ଈଶ୍ୱର ହେବାକିନି ମୁଡ଼୍‌ଦି ପୁଜାରିର୍ ଆରେ ଯିହୁଦି ନେତାର୍ ହେ ରାଜା ଲାଗାୟ୍ ୱାତାର୍, ଆରେ ହେୱାର୍ ପାଉଲ ବିରଦ୍‌ତାକେ ୱେଚ୍‌ଚାର୍।

ପକ୍ୟାତାକା 25:7

ଏଚେପାଦ୍ନା ହେୱାନିଙ୍ଗ୍ ତାହିୱାତାର୍, ଯିରୁଶାଲାମ ସହର୍‌ତାଙ୍ଗ୍ ହାଲ୍‌ଜି ମାଚି ଯିହୁଦିର୍ ହେୱାନ୍ ଚାରିବେଣ୍‌ତାଙ୍ଗ୍ ନିଲ୍‌ତାର୍, ଆରେ ହେୱାର୍ ତା ବିରଦ୍‌ତାକେ ଗାଜା ଦସ୍ ହିଜି ୱେଚ୍‌ଚାର୍, ମାତର୍ ହେୱାର୍ ହେ ୱିଜୁ କାତାତିଙ୍ଗ୍ ସତ୍ ଇଞ୍ଜି ଚଚ୍‌ଚେଙ୍ଗ୍ ଆଡ୍‌ୱାତାର୍।

ପକ୍ୟାତାକା 4:12

ଯୀଶୁଙ୍ଗ୍ ପିସ୍ତି ଆରେ ଇନେର୍‌ତାକେ ପା ଉଦାର୍ ଗାଟାଆଦୁତ୍। ଇନେସ୍‌କି ବାଦାଡ଼୍ ତାରେନ୍ ମାନାୟାର୍ ବିତ୍ରେତାଙ୍ଗ୍ ହେଲେକେ ଇନେର୍ ତର୍‌ ହିଲୁତ୍, ତା ତର୍‍ଦାଙ୍ଗ୍ ରକ୍ଷା ପାୟାଆନାସ୍।”

ପକ୍ୟାତାକା 9:23

ଶାଉଲ ଦମେସକ ସହର୍‌ତାକେ କେତେକ୍ ଦିନ୍ ମାଚି ପାଚେ, ଯିହୁଦିର୍ ମେହାଆଜି ହେୱାନିଙ୍ଗ୍ ମାର୍ନେ ଅସ୍ତେଙ୍ଗ୍ ଉପାୟ୍ କିତାର୍।

୧ କରନ୍ତିୟ 10:33

ହେଲେକେ ଆନେଙ୍ଗ୍ ପା ୱିଜାରିଙ୍ଗ୍ ୱିଜୁ ନିପଣ୍ ସାର୍‌ଦା କିନି କାଜିଙ୍ଗ୍ ଉପାୟ୍ କିନାଙ୍ଗା। ଆନେଙ୍ଗ୍ ନା ଜାର୍ ହାର୍ କାଜିଙ୍ଗ୍ ଉପାୟ୍ କିଉଙ୍ଗା, ମାତର୍ ମାନାୟାର୍ ରକ୍ଷା ପାୟାଆନି କାଜିଙ୍ଗ୍ ଇମ୍‌ଣାକା ହାର୍ ହେଦାଙ୍ଗ୍ କିନାଙ୍ଗା।

ଗାଲାତିୟ 5:11

ମାତର୍ ଏ ଟଣ୍ଡାର୍‌କାଦେର୍, ଯଦି ଆନେଙ୍ଗ୍ ସୁନତ ବିଦି ମାନି କିଦେଙ୍ଗ୍ ଶୁଣାୟ୍ କିତାଙ୍ଗ୍‌ମା, ଲାଗିଙ୍ଗ୍ ଆନେଙ୍ଗ୍ ନଙ୍ଗୟ୍ କଷ୍ଟ ପଡ଼ାଆୱାତାଙ୍ଗ୍‌ମା। ଆରେ ଆନେଙ୍ଗ୍ ଯଦି କୃଶକାଟ୍‌ତାକେ ହାଃତି ଖ୍ରୀଷ୍ଟ କାଜିଙ୍ଗ୍ ନେ ଉଦାର୍ ମାନାତ୍ ଇଞ୍ଜି ଶୁଣାୟ୍ କିୱାତାଙ୍ଗ୍‌ମା, ଲାଗିଙ୍ଗ୍ ଇନେର୍‌ତାକେ ପା ଅପ୍‌ମାନ୍ ପାୟାଆୱାତାଙ୍ଗ୍‌ମା।

ଏପିସିୟ 3:13

ଲାଗିଙ୍ଗ୍ ଆନେଙ୍ଗ୍ ୱେଚ୍‌ଚାନାଙ୍ଗା ଯେ, ଆନେଙ୍ଗ୍ ଇମ୍‌ଣି ଦୁକ୍‌କଷ୍ଟ ପାୟାଆନାଙ୍ଗା, ହେଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ମନ୍‌ଦୁକ୍ କିମାଟ୍। ମାତର୍ ଇଦାଙ୍ଗ୍ ମିଙ୍ଗେଙ୍ଗ୍ ଲାବ୍‌ନି ବିଷୟ।

ଏପିସିୟ 3:8

ଈଶ୍ୱର ୱିଜୁ ମାନାୟାର୍ ବିତ୍ରେ ଆନେଙ୍ଗ୍ ରକାଙ୍ଗ୍ ହିରୁକାଙ୍ଗ୍। ମାତର୍ ବିନ୍‌ଜାତିନି ମାନାୟାରିଙ୍ଗ୍ ଖ୍ରୀଷ୍ଟତାକେ ମାନି ୱିଜ୍‌ୱି ହେବାକିନି ବାବ୍‌ନାତାଙ୍ଗ୍ ଆଦିକ୍ ଆଶ୍ରିବାଦ୍‌ନି ହାର୍ଦିକାବୁର୍ ଆନେଙ୍ଗ୍ ୱେଚ୍‌ଚେଙ୍ଗ୍ ଆଡ୍‌ନାଙ୍ଗ୍।

୧ ଥେସଲନୀକିୟ 1:10

ଆରେ ଈଶ୍ୱର ତା ମେହିଙ୍ଗ୍ ହାଃତିତାଙ୍ଗ୍ ଆରେରଗ ଜିବୁନ୍ କିତାନ୍। ନଙ୍ଗୟ୍‌ୱାନି ଦଣ୍ଡ୍‌ତାଙ୍ଗ୍ ରକ୍ଷା ପାୟାଆନି କାଜିଙ୍ଗ୍ ଉଦାର୍ କିଦ୍‌ନି ଯୀଶୁ ସରଗ୍‌ତାଙ୍ଗ୍ ୱାନାନ୍ ଇଞ୍ଜି କାନାଦେରା। ହେଦାଙ୍ଗ୍ କାଜିଙ୍ଗ୍ ଜାର୍-ଜାର୍ ଜିବୁନ୍‌ତିଙ୍ଗ୍ ବାଦ୍‌ଲାୟ୍ କିଜି ଈଶ୍ୱରତିଙ୍ଗ୍ ପାର୍ତି କିତାଦେର୍।

୨ ଥେସଲନୀକିୟ 2:10

ହେୱାନ୍ ୱିଜୁ ପର୍‌କାର୍ କରାପ୍ କାମାୟ୍ କିନାନ୍, ଆରେ ଈଶ୍ୱର ଇନେରିଙ୍ଗ୍ ବିନାସ୍ କିଦେଙ୍ଗ୍ ବାଚି କିତାନ୍‌ନା ହେୱାରିଙ୍ଗ୍ ଟକାୟ୍ କିନାନ୍। ଇନେସ୍‌କି ହେୱାର୍ ଯୀଶୁ ମାପୃ ସତ୍ ବିଷୟତିଙ୍ଗ୍ ମାନି କିୱାତାର୍, ହେଦାଙ୍ଗ୍ କାଜିଙ୍ଗ୍ ଈଶ୍ୱର ହେୱାରିଙ୍ଗ୍ ରକ୍ଷା କିଉନ୍‌।

୧ ତିମତି 2:4

ଇନେସ୍‌କି ହେୱାନ୍ ୱିଜାକାରିଙ୍ଗ୍ ସତ୍ ବିଷୟ ପୁନେର୍ ଇଞ୍ଜି ଆରେ ରକ୍ଷା ପାୟାଆୟେର୍‌ ଇଞ୍ଜି ଇଚାକିନାନ୍।

ଏବ୍ରି 6:8

ମାତର୍ ଜେକନି ମାନାୟାର୍ ୱାଡ଼ି ମାର୍ ଆରେ କାଚ୍ରା ମାର୍ ଲେକେ, ହେଦାଙ୍ଗ୍ ଇନା କାମାୟ୍‌ତାକେ ଯଗ୍ଯ ଆକାୟ୍। ହେଦାଙ୍ଗ୍ ଈଶ୍ୱରତାଙ୍ଗ୍ ଅବିଶାପ୍ ପାୟାଆନାତ୍ ଆରେ ନାଣିତାକେ ନଷ୍ଟ ଆନାତ୍।

ହତ୍‌ତି 22:11

ଲାଗିଙ୍ଗ୍ ଇମ୍‌ଣି ମାନାୟ୍ କରାପ୍ କାମାୟ୍ କିନାନା, ହେୱାନ୍ କରାପ୍ କାମାୟ୍ କିଜି ମାନେନ୍। ଇମ୍‌ଣି ମାନାୟ୍ ଅଦରମ୍‌ କାମାୟ୍ କିନାନା, ହେୱାନ୍ ଅଦରମ୍‌ କାମାୟ୍ କିଜି ମାନେନ୍। ଇମ୍‌ଣି ମାନାୟ୍ ହାର୍ କାମାୟ୍ କିନାନା, ହେୱାନ୍ ହାର୍ କାମାୟ୍ କିଜି ମାନେନ୍ ଆରେ ଇମ୍‌ଣି ମାନାୟ୍ ପବିତ୍ର ଆତାନ୍‌ନା ହେୱାନ୍ ପବିତ୍ର ଆଜି ମାନେନ୍।