Römer 8:7 - Pennsylvania Dutch Bible

⁷ Di meind vo uf flayshlichi sacha ksetzt is shaft geyyich Gott, veil see sich nett unnich's Ksetz funn Gott gebt, un see kann aw nett so du.

Römer 8:7 ပူးပေါင်းရင်းမြစ်များ

2. Chronik 19:2

Da Jehu, em Hanani sei boo, da brofayt, is naus ganga fa een ohdreffa un hott ksawt zumm kaynich, “Setsht du di gottlohsa helfa un selli lohva es da Hah hassa? Fasell kumd da zann fumm Hah uf dich.

Hiob 15:13

so es du dei geisht geyyich Gott draysht, un losht so vadda aus deim maul kumma?

Psalm 53:1

Da grohs-feelich sawkt in seim hatz, “Es hott kenn Gott.” So leit sinn unrein, iahra verka sinn evil, 's is nimmand es goot dutt.

2. Mosi 20:5

Du solsht dich nett nunnah bikka zu eena adda si deena, fa ich, da Hah dei Gott, binn en Gott es jealous is, un ich shtrohf di kinnah fa di sinda funn iahra feddah biss di dritt adda fiaht sett nohch-kummashaft funn selli es mich hassa.

Jeremia 13:23

Kann en mann sei haut en anrah kollah macha, adda en leopard sei blakka abnemma? Grawt so kansht du nett goot du veil du gegvaynd bisht fa letz du.

Ezekiel 14:5

Ich du dess fa di hatza funn di leit funn Israel zrikk greeya, dee es mich falossa henn fa iahra abgettah.’

Matthäus 12:34

Diah kinnah funn shlanga! Vi kennet diah vo evil sind goodi sacha sawwa? Da mensh sawkt mitt em maul, vass fumm hatz ivvah-lawft.

Matthäus 5:19

So, ennich ebbah es da glensht funn dee gebodda nett hald un land di leit so, eah zayld's vennichsht kaysa sei im Himmel-Reich. Avvah ennich ebbah es dee gebodda hald un dutt di leit so lanna, eah zayld's mensht kaysa sei im Himmel-Reich.

Johannes 7:7

Di veld kann eich nett hassa, avvah di veld hast mich veil ich zeiknis gebb es vass see dutt is evil.

Römer 1:28

Un siddah es si nett gmaynd henn es es nohtvendich is fa vissa veyyich Gott, hott Gott si ivvah-gevva zu en unreini meind, fa di sacha du es si nett sedda.

Römer 1:30

un doon anri leit nunnah. Si hassa Gott, sinn rawsich, shtols un braekkah. Si denka an alli sadda evil, un heicha iahra eldra nett.

Römer 3:31

Doon miah dann's Ksetz nix veaht macha deich da glawva? Ich dayt moll nett denka! Miah gevva em Ksetz sei rechtah blatz.

Römer 5:10

Vann Gott uns zrikk gnumma hott deich da doht funn seim Sohn diveil es miah noch sei feinda voahra, vi feel may, nau es miah zrikk gnumma sinn, zayla miah saylich vadda deich sei layva.

Römer 7:22

Ich habb grohsi frayt im Ksetz funn Gott in meim innahlichah mensh.

Römer 8:4

Eah hott dess gedu so es di gerechtichkeit fumm Ksetz folfild vatt in uns, miah, vo nett lawfa noch em flaysh avvah noch em Geisht.

1. Korinther 2:14

Da nadiahlich mann nemd nett di sacha oh vo sinn fumm Geisht Gottes; fa si sinn dumhayda zu eem. Eah kann si aw nett fashtay, veil si fashtanna sei missa deich's geishtlicha.

1. Korinther 9:21

Zu selli unni's Ksetz, binn ich vadda vi aynah es es Ksetz nett hott, so es ich selli unni's Ksetz zumm glawva fiahra kann. (Ich binn avvah nett unni Gottes Ksetz, fa ich binn unnich Christus sei Ksetz.)

Kolosser 1:21

An aynra zeit voahret diah veit vekk funn Gott, un voahret geyyich een in eiyah meind deich di evili sacha es diah kshaft hend.

Kolosser 2:18

Losset nimmand es sich uf hald mitt falshi daymoot un en deensht funn di engel eich vekk fiahra funn eiyah betzawling. Dess sinn sacha es eah nett ksenna hott. So aynah blohst sich selvaht uf mitt sei nadiahlichi gedanka,

2. Timotheus 3:4

Si kenna nett gedraut sei, sinn foah-vitzich, ufgeblohsa un gleicha blesiah may es Gott.

Hebräer 8:10

Dess is es bund es ich macha zayl mitt em haus funn Israel noch selli dawwa, sawkt da Hah: Ich zayl mei Ksetz in iahra meind du un's uf iahra hatza shreiva. Ich zayl iahra Gott sei un si zayla mei leit sei.

Jakobus 4:4

Diah aybrechichi mennah un veivah, visset diah nett es deah vo sich freindlich macht mitt di veld hast Gott? Ennich ebbah es sich en freind macha vill mitt di veld vatt en feind funn Gott.

2. Petrus 2:14

Si henn awwa es foll sinn mitt aybruch un es nett ufheahra kenna sindicha. Si lokka shvachi sayla zu sich. Iahra hatza sinn gland in lusht fa geld. Fafluchti leit sinn si!