Jeremia 6:16 - Pennsylvania Dutch Bible

¹⁶ Dess is vass da Hah sawkt: “Shtaynd an di greitz-vayya un gukket, frohwet fa di alda pawda; frohwet fa da goot vayk, un lawfet drinn, no finnet diah roo fa eiyah sayl. Avvah si henn ksawt, ‘Miah zayla nett drinn lawfa.’

Jeremia 6:16 ပူးပေါင်းရင်းမြစ်များ

1. Kaynicha 8:36

no heich si ab fumm himmel un fagebb di sinda funn dei gnechta, di Kinnah-Israel. Veis eena da recht vayk zu lawfa, un shikk reyyah uf's land es du gevva hosht zu dei leit fa en eahbshaft.

2. Chronik 19:11

Da Amaria, da evvahsht preeshtah, is ivvah eich in di sacha fumm Hah; da Sebadia, em Ismael sei boo, un da evvahsht funn di shtamm funn Juda, is ivvah eich in di sacha veyyich em kaynich, un di Lefiddah shaffa unnich eich fa sayna es di leit iahra recht greeya. Seind shteik un doond's, da Hah is mitt selli es recht doon.”

Psalm 116:7

Gay zrikk zu dei roo, mei sayl, fa da Hah voah goot zu diah.

Jesoiya 2:5

Kummet nau, diah haus fumm Jakob, vella lawfa im licht fumm Hah.

Jesoiya 28:12

Eah hott ksawt zu eena, “Dess is da roo-blatz, losset selli es meet sinn roowa, un do is da blatz fa roowa.” Avvah si henn eem nett abkeicht.

Jesoiya 30:21

Vann diah lings adda rechts drayya vellet dann heahret diah en shtimm hinnich eich es sawkt, “Dess is da vayk, gaynd deah vayk.”

Jesoiya 46:9

Meindet vass blatz gnumma hott lang zrikk. Ich binn Gott, un's hott kenn anra; ich binn Gott, un's is nimmand vi ich.

Jesoiya 57:2

Selli es ufrichtich lawfa, zayla fridda havva; si finna roo im dohdes-bett.

Jesoiya 8:20

Zumm ksetz un em zeiknis! Vann si nett shvetza noch demm vatt, dann henn si's licht funn meiyets nett.

Jeremia 12:16

Un's kumd zu vann si da vayk funn mei leit recht lanna, un lanna fa shveahra bei meim nohma, un sawwa, ‘So voah es da Hah laybt,’ grawt vi si eahshtah mei leit gland henn fa shveahra zumm abgott Baal—no zayla si viddah ufgebaut vadda unnich mei leit.

Jeremia 18:12

Avvah si zayla sawwa, ‘Sell is kenn goot. Miah zayla ohhalda du vi miah vella; yaydahs funn uns zayld iahra ayya shteibahrich, evil hatz nohch gay.’”

Jeremia 18:15

Doch mei leit henn mich fagessa; si brenna insens zu iahra falshi gettah, gettah es si macha shtolbahra in iahra vayya un uf iahra aldi pawda. Si sinn ab fumm vayk kumma, un lawfa vo kenn vayk is.

Jeremia 2:25

Israel, shpring du nett rumm biss dei shoo-sohla deich gvoahra sinn, un dei hals drukka is fumm dasht. Avvah du sawksht, ‘'Sis zu shpoht! Ich habb fremdi gettah leeb, un ich muss eena nohch gay.’

Jeremia 22:21

Ich habb dich gvand vo's noch goot ganga is mitt diah, avvah du hosht ksawt, ‘Ich zayl nett heicha!’ Fumm yungem uf voah sell dei vayk; du hosht miah nett keicht.

Jeremia 31:21

“Doond signs uf un meiket da vayk; setzet poshta uf fa's meika. Haldet eiyah gedanka uf em vayk, uf em vayk es diah nemma sellet. Kumm zrikk, oh beleebt Israel, kumm zrikk zu dei shtett.

Jeremia 42:3

Bayt es da Hah dei Gott uns sawkt vo miah anna gay sella un vass miah du sella.”

Jeremia 44:16

“Miah zayla nett abheicha zu di vadda es du ksawt hosht zu uns im Hah sei nohma!

Jeremia 50:5

Si zayla da vayk frohwa zu Zion, un gayn no sellah vayk, si sawwa, ‘Kummet, vella uns zumm Hah binna mitt en ayvich bund es nee nett fagessa vatt.’

Jeremia 7:23

avvah ich habb eena dess gebott gevva: Heichet miah, no zayl ich eiyah Gott sei un diah zaylet mei leit sei. Lawfet folshtendich im vayk es ich eich gebodda habb. No zayld's goot gay mitt eich.

Jeremia 7:24

Avvah si henn nett keicht un acht katt. In blatz funn sell sinn si iahra ayknah roht nohch gloffa, un sinn iahra shteibahrich un evil hatz nohch ganga. Si sinn hinnahsich un nett fassich gloffa.

Jeremia 7:3

Dess is vass da Awlmechtich Hah, da Gott funn Israel, sawkt: Fabessahret eiyah vayya un di sacha es diah doond, no loss ich eich voona an demm blatz.

Maleachi 4:4

“Denket an's ksetz funn meim gnecht da Mosi, di gebodda un adninga es ich eem gevva habb uf em Berg Horeb fa gans Israel.

Lukas 16:29

Avvah da Abraham hott ksawt, ‘Si henn da Mosi un di brofayda, loss si eena abheicha.’

Johannes 12:35

Jesus hott ksawt zu eena, “Es licht is bei eich fa noch en glenni zeit. Lawfet diveil es diah's licht hend, adda's dunkla kumd ivvah eich. Deah vo im dunkla lawft vayst nett vo eah hee gayt.

Johannes 13:17

Vann diah dee sacha visset, sind diah ksaykend vann diah si aw doond.

Johannes 5:39

Diah suchet in di Shrift veil diah maynet es deich sell hend diah ayvich layva. Dess is di naymlich Shrift vo zeiknis gebt veyyich miah.

Di Apostelgeschichte 17:11

Dee leit voahra may fashtendlich es selli an Thessalonicha. Si voahra gans villing fa's Vatt ohnemma un henn alli dawk ksucht in di Shrift eb dee sacha so sinn.

Römer 4:12

Un eah is aw da faddah funn di beshniddana, dee vo nett yusht beshnidda sinn, avvah vo lawfa im sayma glawva es unsah faddah, da Abraham, katt hott eb eah beshnidda voah.

5. Mosi 32:7

Denket zrikk an di alda dawwa, an di zeit lang zrikk. Frohwet eiyah faddah, un eah sawkt eich's, eiyah aldi leit, un si fakindicha's zu eich.

Kolosser 2:6

So dann, vi diah Jesus Christus ohgnumma hend, so lawfet in eem;

Hebräer 11:2

Deich dess henn di foah-feddah en goot zeiknis grikt.

Hebräer 6:12

Dess is so es diah nett aldvannish vaddet, avvah es diah selli nohch machet vo deich da glawva un geduld sell eahva zayla vass fashprocha voah.

Richtah 2:17

Avvah si henn alsnoch di richtah nett abkeicht un sinn anri gettah nohch glusht, un henn si ohgebayda. Si sinn kshvind vekk gedrayt fumm vayk es iahra foah-feddah gloffa henn vo si di gebodda fumm Hah gedu henn. Si henn nett gedu vi iahra foah-feddah gedu henn.