Jeremia 33:11 - Pennsylvania Dutch Bible

¹¹ datt zayla viddah di shtimma keaht sei funn frayt un fraylichkeit, fumm hochtzich-maydel un em hochtzich-mann un di shtimma funn selli es dank-opfahra zumm Hah sei haus bringa, un sawwa, ‘Gevvet dank zumm Awlmechticha Hah veil eah goot is, un sei shtandhaftichi-leevi ayvichlich is.’ Ich zayl dess land viddah goot macha grawt vi's voah difoah,” sawkt da Hah.

Jeremia 33:11 ပူးပေါင်းရင်းမြစ်များ

1. Chronik 16:34

Gevvet dank zumm Hah, fa eah is goot; sei shtandhaftichi-leevi bleibt fa'immah.

1. Chronik 16:8

Gevvet dank zumm Hah, un roofet sei nohma oh; fakindichet unnich di heida vass eah gedu hott.

2. Chronik 20:21

Noch demm es eah kshvetzt hott mitt di leit, hott da Josaphat singah raus ksetzt fa fannich di greeks-gnechta lawfa un da Hah lohva fa sei hallichkeit. Eah hott ksawt: “Danket da Hah, fa sei shtandhaftichi-leevi is ayvichlich.”

2. Chronik 29:31

Da Hiskia hott no ksawt zu di leit, “Diah hend nau eich heilich gmacht zumm Hah. Kummet nau un bringet opfahra un dank-opfahra zumm tempel fumm Hah.” So hott di fasamling opfahra un dank-opfahra gebrocht, un awl selli mitt frei-villichi hatza henn brand-opfahra gebrocht.

2. Chronik 5:13

Di blohs-hann shpeelah un di singah voahra mitt-nannah es vi ay shtimm am da Hah lohva un danka. Di blohs-hanna, cymbals un harfa henn kshpeeld diveil es di singah da Hah glohbt henn bei dee vadda singa: “Eah is goot, un sei bamhatzichi leevi is ayvich.” No voah da tempel fumm Hah kfild mitt en volk,

2. Chronik 7:3

Vo awl di Kinnah-Israel's feiyah ksenna henn runnah kumma un es di hallichkeit fumm Hah uf em tempel voah, henn si sich anna gegneet un henn iahra ksichtah uf da bodda gedu. Si henn gebayda un da Hah gedankt, un henn ksawt, “Eah is goot; sei shtandhaftichi-leevi shtayt fa'immah.”

Ezra 6:22

Un si henn's Unksavvaht Broht Fesht kalda fa sivva dawk mitt frayt, veil da Hah si kfild hott mitt frayt bei em kaynich funn Assyria sei hatz freindlich drayya geyyich si, un eena kolfa hott mitt di eahvet uf em haus funn Gott, da Gott funn Israel.

Nehemia 12:43

Uf sellah dawk henn si grohsi opfahra gopfaht mitt frayt veil Gott eena grohsi frayt gevva hott. Di veibsleit un di kinnah henn sich aw kfroit. Di yacht funn dee grohs frayt in Jerusalem hott veit abkeaht sei kenna.

Nehemia 8:12

No sinn awl di leit vekk ganga fa ess-sach essa un drinka un dayl difunn ausdayla. Si henn en fraylich grohs essa gmacht veil si di vadda fashtanna henn es ausglaykt voahra zu eena.

Psalm 106:1

Lohb sei zumm Hah! Gevvet dank zumm Hah, fa eah is goot, un sei shtandhaftichi-leevi bleibt fa'immah.

Psalm 107:1

Gevvet dank zumm Hah, fa eah is goot; sei shtandhaftichi-leevi is ayvich.

Psalm 107:22

Loss si dank-opfahra opfahra, un sei verka fazayla mitt frayt.

Psalm 116:17

Zu diah zayl ich en dank-opfah macha, un da nohma fumm Hah ohroofa.

Psalm 147:13

Eah macht di rikkel funn dei doahra shteik, un saykend dei kinnah es in diah sinn.

Psalm 85:7

Veis uns dei shtandhaftichi-leevi, oh Hah, un gebb uns dei saylichkeit.

Jesoiya 35:10

Selli es da Hah frei gmacht hott kumma zrikk. Si gayn in Zion nei am singa, un ayvichi frayt zayld uf iahra kebb sei. Si sinn ufgnumma mitt freyyaheit un frayt; dreebsawl un heiles is fabei.

Jesoiya 51:11

Selli es frei gmacht sinn beim Hah, kumma zrikk, si kumma zu Zion am singa; ayvichi frayt is uf iahra kebb. Si vadda froh un zayla fraylich sei, dreebsawl un heiles gayt vekk.

Jesoiya 51:3

Da Hah zayld Zion drayshta, un zayld bamhatzich sei zu iahra veeshti bletz; eah macht iahra vildahnis vi Eden, un iahra drukka land vi em Hah sei goahra. Frayt un fraylichkeit vatt kfunna datt, un aw dankboahkeit un di yacht funn singes.

Jesoiya 52:8

Heich moll, di vatsh-mennah roofa mitt laudi shtimma, si greisha zammah mitt frayt; fa si sayna mitt iahra aykni awwa, da Hah am zrikk kumma zu Zion.

Jesoiya 52:9

Seind fraylich un singet zammah, diah fadauvani bletz in Jerusalem, fa da Hah hott sei leit gedraysht un hott Jerusalem frei ksetzt.

Jeremia 16:9

Fa dess is vass da Awlmechtich Hah, da Gott funn Israel, sawkt: ‘In demm land fannich eiyah awwa un in eiyah layves-zeit, zayl ich en end macha funn di yacht vo leit am en goodi zeit havva sinn un am sich froiya sinn, un di shtimm funn di hochtzich-fraw un da hochtzich-mann.’

Jeremia 17:26

Leit zayla kumma funn di shtett in Juda, funn di shtett um Jerusalem rumm, fumm land funn Benjamin, funn di niddahra lendah un di hohcha lendah un funn di saut. Si zayla brand-opfahra, shlacht-opfahra, shpeis-opfahra, insens un dank-opfahra an's haus fumm Hah bringa.

Jeremia 25:10

Ich nemm di fraylicha yachta vekk funn eena, un di shtimma fumm hochtzeidah un em hochtzich-maydel, di yacht funn meel-shtay un di helling funn lichtah.

Jeremia 29:14

Ich zayl kfunna sei bei eich,” sawkt da Hah, “un ich bring eich zrikk funn eiyah kfengnis. Ich sammel eich zammah funn awl di lendah un bletz es ich eich anna kfiaht habb,” sawkt da Hah, “un bring eich zrikk fumm blatz es ich eich hee kshikt katt habb.”

Jeremia 30:19

Funn eena kumma dank-leedah un di yacht funn frayt un singes. Si zayla sich fameahra, un nett vennichah vadda. Ich bring eah zu eena, un si vadda nett fa'acht.

Jeremia 30:3

Di dawwa sinn am kumma,’ sawkt da Hah, ‘vann ich mei leit Israel un Juda es kfanga sinn, zrikk bring un gebb eena's land viddah es ich zu iahra foah-feddah gevva habb fa iahra ayknes sei.’ So sawkt da Hah.”

Jeremia 32:44

Leit zayla feldah kawfa mitt geld, un deeds zayla kseind un kseald vadda diveil es zeiya vatsha. Dess zayld blatz nemma im land funn Benjamin, in di shtetlen um Jerusalem rumm, in di shtett funn Juda, in di shtett drovva in di hivla un drunna in di deicha un in di shtett funn di saut. Ich zayl eena goot du un iahra lendah zrikk gevva zu eena,’ sawkt da Hah.”

Jeremia 33:26

Un grawt vi ich sell gedu habb, so zayl ich mei bund halda mitt em Jakob sei nohch-kummashaft un mitt meim gnecht da Dawfit. Ich nemm ayns fumm Dawfit sei nohch-kummashaft fa ivvah em Abraham, Isaac un em Jakob sei nohch-kummashaft roola. Ich zayl bamhatzich sei zu eena un si aus em kfengnis zrikk in's land bringa.’”

Jeremia 33:7

Ich zayl Juda un Israel zrikk bringa fumm blatz es si kfanga sinn, un bau si viddah uf vi si voahra difoah.

Jeremia 7:34

In di shtett funn Juda un in di shtrohsa funn Jerusalem zayl ich en end bringa zu di shayna yachta funn frayt un kshpass, un aw di fraylicha shtimma fumm hochtzich-mann un di hochtzich-fraw. Es land zayld alles fadauva vadda.’”

Amos 9:14

Ich zayl Israel, mei kfangani leit, zrikk bringa; si zayla di fadauvana shtett ufbauwa un drinn voona, si zayla vei-goahra blansa un da vei drinka difunn; si zayla goahra macha un's frucht essa difunn.

Jona 2:9

Avvah mitt en dankboahri shtimm bring ich en opfah zu diah, Ich betzawl sell es ich fashprocha habb. Di saylichkeit is fumm Hah.”

Nahum 1:7

Da Hah is goot, un is en feshtah-blatz an di zeit funn druvvel; eah gebt acht uf selli es iahra fadrauwa in een doon.

Zephania 3:14

Sing mitt frayt, oh Dochtah funn Zion! Greish naus, oh Israel! Sei froh un froi dich mitt dei gans hatz, oh Dochtah funn Jerusalem!

Sacharia 10:7

Em Ephraim sei nohch-kummashaft vadda vi mechtichi mennah, un iahra hatza zayla fraylich vadda vi funn vei. Iahra kinnah zayla dess sayna un sich froiya, un iahra hatza zayla froh sei deich da Hah.

Sacharia 8:19

Dess is vass da Awlmechtich Hah sawkt: “Di fasht-dawwa es kalda vadda im fiahda, fimfda, sivvada un zeyyada moonet, zayla fraylichi zeida vadda un goodi fesht-zeida sei fa Juda. So greeyet en leevi fa di voahheit un fridda.”

Sacharia 9:17

Vi shay un leeblich zayla si sei! Di frucht fumm land un neiyah vei macht iahra yungi boova un mayt bleeya.

Johannes 3:29

Deah vo's hochtzich-maydel heiyahra zayld is da hochtzeidah. Da freind fumm hochtzeidah vo uf shtayt un heicht een ab, froit sich oahrich veil eah em hochtzeidah sei shtimm heaht. Fasell is mei frayt nau folkumma.

Hebräer 13:15

Losset uns, dann, di gans zeit en lohb-opfah opfahra zu Gott deich een; sell is, di frucht funn leftz es sei nohma bekenna.

Di Offenbarung 18:23

Di helling funn en licht soll nee nimmi sheina in diah, un di shtimm fumm hochtzich-mann un en hochtzich-maydel vatt nimmi keaht in diah; fa dei kawf-leit voahra di grohsa leit funn di eaht. Di leit in alli lendah voahra fafiaht deich dei hexahrei.