Jeremia 13:18 - Pennsylvania Dutch Bible

¹⁸ Sawk zumm kaynich un di kaynich-muddah, “Kummet runnah funn eiyah kaynich-shteel, fa eiyah shayni krohna sinn funn eiyah kobb kfalla.”

Jeremia 13:18 ပူးပေါင်းရင်းမြစ်များ

2. Kaynicha 24:12

No hott da Kaynich Joiachin funn Juda sich ufgevva zumm kaynich funn Babylon mitt sei maemm, sei gnechta, sei evvahshti un sei kammah-gnechta. Im achta yoah funn seim reich hott da kaynich funn Babylon da Joiachin kfanga gnumma,

2. Kaynicha 24:15

Eah hott da Joiachin zu Babylon gnumma, un aw sei maemm un veivah, un kammah-gnechta un di evvahshta mennah im land, dee hott eah awl funn Jerusalem zu Babylon gnumma.

2. Chronik 33:12

Un in seim deefa angsht is eah zumm Hah, sei Gott, ganga, un hott sich eahnshtlich gedaymeedicht fannich em Gott funn sei foah-feddah.

2. Chronik 33:19

Em Manasse sei gebayt, vi da Hah bamhatzich voah zu eem, awl sei sinda un vekk-lawfes, di bletz es eah hohchi-bletz gebaut hott, un vi eah Ashera-gleichnisa un abgettah ufkokt hott eb eah sich gedaymeedicht hott—dess is alles ufkshrivva im shreives funn di brofayda.

2. Chronik 33:23

Eah hott sich nett gedaymeedicht fannich em Hah vi sei daett da Manasse hott, avvah hott sich yusht noch may shulda ufkeifeld.

2. Mosi 10:3

Da Mosi un da Aaron sinn no zumm Pharao ganga un henn ksawt zu eem, “Dess is vass da Hah, da Gott funn di Hebrayah sawkt, ‘Vee lang shteibahsht du dich fa dich daymeedich macha fannich miah? Loss mei leit gay, so es si mich deena kenna.

2. Mosi 39:28

Di kobb-dichah, di kobb-banda un di hossa voahra awl gmacht aus fei getwist linnen duch.

Shpricha 27:24

fa reichheit bleibt nett fa'immah un en krohn vatt nett zu di nohch-kummashafta gevva fa'immah.

Jesoiya 3:20

di kobb-dichah, di bay-kedlen, di duch-belts, di goot-shmakkich ayl-bodla, di oahra-rings,

Jesoiya 3:26

Di shtatt-doahra funn Zion zayla veina un heila; di shtatt zayld leah sei un uf em bodda hokka.

Jesoiya 47:1

“Kumm runnah un hokk dich in da shtawb, du leddich maydel Babylon. Hokk dich uf da grund unni en kaynich-shtool, du dochtah funn di Chaldayah. Du zaylsht nimmi shay un vayyich kaysa sei.

Jeremia 22:24

“So shuah es ich layb,” sawkt da Hah, “even vann da Konia—em Kaynich Joiakim funn Juda sei boo—even vann eah en siegel-ring veah uf mei rechtsi hand, doch dayt ich dich abzeeya funn mei fingah.

Jeremia 22:26

Ich shmeis dich un dei maemm es dich geboahra hott in en annah land, en blatz es kens funn eich geboahra voah drinn. Un datt zaylet diah awl zvay shteahva.

Jeremia 29:2

Dess voah noch demm es da Kaynich Jechonia un sei maemm, sei ivvah-saynah, di evvahshti funn Juda un Jerusalem, di shreinah un di shmidda vekk funn Jerusalem gnumma voahra.

Jeremia 36:16

Vo si awl di vadda keaht henn, henn si nannah ohgegukt un henn sich kfeicht. Si henn ksawt zumm Baruch, “Miah missa awl dee vadda zumm kaynich nemma.”

Glawk-Leedah 1:6

Di hallichkeit hott falossa, funn di dochtah funn Zion. Iahra feddahshti sinn vi vildi hash, es kenn vayt finna kenna. Si sinn shvach un henn sich fabutzt, fannich selli es eena nohch sinn.

Glawk-Leedah 1:9

Iahra unreinichkeit hott an da sohm funn iahra rokk kanka, avvah see hott sich nix bekimmaht veyyich vo dess anna fiaht. Iahra fall voah shreklich, un's voah nimmand fa see drayshta. “Oh Hah, gukk an mei aylend, da feind hott ivvah-gnumma.”

Glawk-Leedah 2:10

Di eldishti funn di Dochtah Zion, hokka shtill uf em bodda. Si shmeisa shtawb uf iahra kebb un doon sekk-glaydah oh. Di yunga mayt funn Jerusalem henka iahra kebb nunnah geyyich da grund.

Glawk-Leedah 5:16

Da krohn is funn unsah kobb kfalla; vay zu uns, veil miah ksindicht henn.

Ezekiel 16:12

Ich habb en ring uf dei naws, oahra-rings in dei oahra un en shaynah krohn uf dei kobb gedu.

Ezekiel 21:26

Dess is vass da Awlmechtich Hah sawkt: Nemm dei kobb-duch un dei krohn ab. Es zayld nimmi sei vi's voah difoah. Di niddahra vadda ufkohva un di hohcha vadda niddah gebrocht.

Ezekiel 24:17

Shnauf hatt unni yacht macha, avvah du nett veina fa di dohda. Hald dei kobb zu gedekt un hald dei shoo uf dei fees. Du solsht dei maul nett zu dekka un kenn ess-sach essa es leit diah bringa.”

Ezekiel 24:23

Diah haldet eiyah kebb zu gedekt un eiyah shoo uf eiyah fees. Diah zaylet nett veina un heila, avvah diah zaylet shloh ufdadda deich eiyah sinda un zaylet yammahra unnich nannah.

Ezekiel 44:18

Si sella linnen kobb-dichah uf iahra kebb havva, un linnen unnah-glaydah fumm bauch nunnah. Si sella sich nett oh du mitt ennich ebbes es si shvitza macht.

Daniel 5:20

Avvah vo eah sei hatz ufkohva hott, un sei geisht hohchmeedich un shtols vadda glost hott, voah eah fumm kaynich-shtool kshtohsa un sei hallichkeit voah vekk gnumma funn eem.

Jona 3:6

Vo's vatt zumm kaynich funn Nineveh kumma is, is eah ufkshtanna funn seim kaynich-shtool, hott sei kaynich-glaydah ausgedu un hott sekk-glaydah ohgedu. No hott eah sich in di esh kokt.

Matthäus 18:4

Veah-evvah es sich daymeedich macht vi dess kind, sellah is da graysht im Himmel-Reich.

Jakobus 4:10

Daymeedichet eich fannich Gott un eah haybt eich uf.

1. Petrus 5:6

Fasell, beeyet eich in daymoot unnich di mechtich hand funn Gott, so es eah eich viddah uf hayva kann an di recht zeit.