Un's is zu kumma funn di zeit es eah een da ivvah-saynah gmacht hott in sei haus un awl sei sach, es da Hah em Egyptah sei haus ksaykend hott fa di sayk fumm Joseph. Un so voah em Hah sei sayya uf alles es eah gaygend hott, im haus un aw draus im feld.
Da Dawfit voah no nett villing fa di Bundes-Lawt fumm Hah nei in di shtatt fumm Dawfit bringa mitt eem. No hott eah si nayva anna in's haus fumm Obed-Edom, da Gathiddah, gedu.
Eah hott aw da Obed-Edom un sex un achtzich funn sei freindshaft datt glost fa deena mitt eena. Da Obed-Edom, em Jedithun sei boo, un da Hosea voahra doah-heedah.