Hibru 13:4 - Holy Bible Nigerian Pidgin English

⁴ Make evribody respet marriage: una must make sure sey una nor sleep with who nor bi una husband or wife, bikos God go judge pipol wey dey sleep with who dem nor marry and pipol wey don marry, wey dey sleep with oda pipol.

Hibru 13:4 ပူးပေါင်းရင်းမြစ်များ

Jenesis 2:21

So Oga God kon make man sleep deep sleep and as e dey sleep, God take one from di man rib kon use flesh kover di place.

Jenesis 2:24

Dat na di rizin why man must live en papa and mama kon go stay with en wife and dem two go bikom one.

2 Kings 22:14

So Priest Hilkaya, Ahikam, Akbor, Shafan and Asaya kon go meet Profetes Hulda wey bi Shullam wife. Shullam papa na Tikvah and na Harhas wey dey kare for di wardrobe bi en grand-papa. (Di woman dey stay for Mishneh aria for Jerusalem.) Dem go meet am kon tell am wetin make dem kom,

Job 31:12

Make e bi like hell-fire wey dey distroy tins; fire wey go burn evritin wey I get.

Isaya 8:3

So afta sometaim, my wife kon get belle. Wen e don born awa son, God kon tell mi, “Make yu koll am, ‘Kwik karry Make Yu Distroy Fast-fast.’

Levitikus 15:18

Afta di man don sleep with di woman finish, di man and di woman must go baf and dem go dey unklean till evening.

Levitikus 18:20

“ ‘Make una nor sleep with anoda man wife, bikos e nor good and e go make una dey unklean.

Malakai 3:5

Oga God sey, “I go judge pipol wey dey do majik; doz wey dey sleep with who dem nor marry; pipol wey dey tok wetin dia eye nor si; oga dem wey nor dey pay dia workers; doz wey dey opress wimen wey dia husband don die, shidren wey nor get papa and mama again and strenjas. Dem dey do like dis, bikos dem nor dey fear mi.

1 Korintians 5:13

Na God go judge doz wey dey outside, bikos en word sey, “Doz wey dey do wiked tins among una, make una drive dem komot from di church.”

1 Korintians 6:18

Make una nor live ashawo life. Evry oda sin wey man dey kommit na for outside en body, but di pesin wey dey do ashawo, dey sin against en own body.

1 Korintians 6:9

Una nor know sey wiked pipol nor go enter God kingdom? So make una nor fool unasef! Pipol wey dey sleep with who dem nor marry; doz wey dey serve juju; men wey dey sleep with oda men;

1 Korintians 7:38

E dey rite and okay to marry, but e betta sey yu nor marry at-all.

1 Korintians 9:5

abi wi nor get rite to marry biliver for Christ?

2 Korintians 5:10

Bikos all of us must stand for Christ front and e go judge us akordin to di tins wey wi do wen wi dey dis eart; weda dem good or bad.

Galatians 5:19

Na di tins wey di flesh dey do bi dis: To sleep with pesin wey yu nor marry; to get bad mind; to opress pipol;

Galatians 5:21

bad belle; killi-killi; to dey drink anyhow and dey do oda tins like all dis ones. I dey warn una naw as I don warn una before sey, pipol wey dey do dis kind tins, nor go enter God kingdom!

Efesians 5:5

One tin wey una must know bi sey, pesin wey dey sleep with who e nor marry; wey nor dey pure or wey get long-trot and dey serve juju, nor go enter Christ and God kingdom.

Deutronomi 22:22

If dem katch anybody dey sleep with anoda man wife, both of dem must die; like dis, una go remove evil from Israel.

1 Tesalonians 4:6

Make nobody shit en Christian broda or make am vex, bikos na God go fight for di pesin wey yu shit and wi don tell una before and wi still dey warn una sey, God go really ponish pipol wey dey do like dat.

1 Timoti 3:12

Deakons must dey faithful to en wife and must fit kontrol en shidren and evritin for en house.

1 Timoti 3:2

Leader for church must bi pesin wey nor get fault; wey get only one wife; fit kontrol ensef; get sense and respet; dey welkom pipol and e bi good tisha.

1 Timoti 3:4

E must bi pesin wey dey manage en own house well and dey make en shidren obey and respet am.

1 Timoti 4:3

Dem dey tish sey, e nor good to marry or chop some kind food. But na God kreate dis food and E sey pipol wey bilive di trut fit chop am afta dem don tank am.

1 Timoti 5:14

So I wont make di yong wimen marry; born shidren; dey guide dia house, so dat enemies nor go get shance to akuiz dem.

Titus 1:6

Anybody wey won bi elder must dey good. E must get only one wife and en shidren must bi bilivers; dey gentol and dey respet demsef.

Hibru 12:16

Make una make sure sey nobody dey do bad tins or nor dey fear God, just like Esau wey sell en rite as first-born, bikos of food.

Revelashon 22:15

Pipol wey dey do like dogs, doz wey dey do majik and kill odas; doz wey dey serve juju and dey like to lie, all of dem nor go enter di town.