Exodus 1:17 - Holy Bible Nigerian Pidgin English

¹⁷ But di nurse dem dey fear God and dem nor gri do wetin di king tell dem, so dem nor kill di boys.

Exodus 1:17 ပူးပေါင်းရင်းမြစ်များ

Jenesis 20:11

Abraham ansa, “Bikos I feel sey nobody dey wey dey fear God for dis place and dem fit kill mi if I sey na my wife.

Jenesis 42:18

For di third day, Josef kon tell dem, “Make una do as I tok and una go dey alive, bikos I dey fear God.

2 Samuel 24:4

But di king make Joab and en ofisas obey en kommand, den dem komot go kount Israel pipol.

Nehemaya 5:15

All di govnors wey don rule before mi, trobol di pipol and dey kollect forty silva koins evriday for food and wine. Even dia savants dey opress di pipol too. But I difren from dem, bikos I dey fear God.

Estha 3:3

So di king savants wey dey di palis gate kon ask Mordekai, “Wetin make yu dey go against di king kommand?”

Psalms 31:19

Si as yor favor great rish; di one wey Yu keep for doz wey dey fear Yu. Yu dey pour dem on pipol wey kom make Yu protet dem and Yu dey bless dem for evribody front.

Exodus 1:18

Den di king koll di nurse kon ask, “Why una do dis kind tin? Why una nor kill di boys?”

Exodus 1:21

Bikos di nurse dem dey fear God, Oga God kon give dem dia own family.

Proverbs 16:6

If pesin dey honbol and faithful, God go forgi-am en sins. If yu dey fear God, yu nor go gri do bad tins.

Proverbs 8:13

If to sey una dey fear God, den una go hate bad tins. I hate pride, pipol wey dey tok anyhow, bad-bad tins and lie-lie words.

Ekklesiastes 12:13

So, since yu don hear evritin, dis na my last advise: “Make yu fear God and obey all en kommands, bikos na wetin man suppose do, bi dat.”

Ekklesiastes 8:12

If pipol wey sin hundred times still get long life, den I know sey pipol wey dey fear God, na dia life go long pass.

Daniel 6:13

So dem tell di king, “Daniel, wey bi one of di pipol wey dem bring kom from Judah, nor gri respet di king orda at-all. Na three times a day, e dey pray give anoda God.”

Hosea 5:11

Dem go opress and judge Israel pipol anyhow, bikos dem don make up dia mind to serve juju.

Mikah 6:16

Una dey obey only King Omri wiked laws and una wiked like King Ahab! So, I go use una as ezample kon distroy una finish. Dem go ponish una and evribody wey si una, go laf well-well.”

Matiu 10:28

Make una nor fear who go fit kill di body and nor fit kill di soul. Instead, make una fear God wey fit distroy pesin soul and body for hell-fire.

Luke 12:5

But make I tell una who una must fear: Make una fear di Pesin wey get pawa to trow una inside hell-fire afta E don kill una. Yes, I tell una true word, na-im una must fear!

Acts 5:29

But Pita and di apostles ansa, “Wi go must obey God instead of human being.

1 Samuel 22:17

Den di king tell di pipol wey dey with am sey, “Make una go kill God priests. Bikos dem don join David side. Dem know sey e dey run, but dem nor kom tell mi.” But di king savants nor gri tosh God priest.