2 Kronikles 13:12 - Holy Bible Nigerian Pidgin English

¹² Na God ensef dey lead us. En priest dey here won blow trumpet, so dat wi go kon fight una. Israel pipol, make una nor fight against una grand-grand papa God, bikos una nor go fit win.”

2 Kronikles 13:12 ပူးပေါင်းရင်းမြစ်များ

2 Kronikles 24:20

God Spirit kon enter Zekaraya wey bi Jehoiada pikin. E stand up kon tell di pipol, “Dis na wetin God tok: ‘Why una nor dey obey God kommand? Una nor go prosper and God don rijet una, bikos una nor gri obey am!’ ”

2 Kronikles 32:8

Na only human being pawa dem get, but di Oga wey bi awa God dey with us and E go help us fight all awa war.” So, wetin King Hezekaya tok kon make di sojas get strong heart.

Job 40:9

Yu strong rish mi? Abi yor vois loud rish my own?

Job 9:4

God too get sense and en pawa dey mighty; nobody fit stand against am.

Psalms 20:7

Some nashon dey make mout and trust dia shariot and sojas, but na awa Oga God name wi take dey boast.

Psalms 46:7

God wey dey lead heaven sojas dey with us and na Israel God dey protet us.

Isaya 45:9

E nor go betta for di pesin wey dey argue with di Pesin wey kreate am! Pesin wey bi like ordinary pot for where oda pots dey for groun. Klay fit tell who dey use am sey, “Wetin yu dey do?” Abi di pot wey yu dey make fit sey, “Yu nor know work at-all?”

Isaya 54:17

But nor-tin wey pipol use against una, go fit distroy una; una go ovakom evribody wey dey akuiz una. Dis na wetin pipol wey dey serve Mi dey enjoy and I go defend and make dem win.” Na so God tok!

Isaya 8:10

Even if una plan, una nor go susid. Make una tok anytin wey una wont, but all of dem go dey yuzles, bikos God dey with us.

Jeremaya 2:37

Una go kover una face with shame and sorrow wen una dey kom back from Egypt, bikos God don rijet di pipol wey una trust and even with dia help, e nor go still betta for una.”

Jeremaya 50:24

I set trap for Babilon and e katch dem, before dem know. Una fight against mi and na dis make dem katch and distroy una.

Ezekiel 17:9

Naw, mi God wey get pawa dey ask: Dis vine go prosper? No! I go plok all en fruit kon rut am komot groun and en leaf go dry kon die. I nor nid strong hand or many pipol, bikos e nor go hard mi to rut am from groun.

Zekaraya 10:5

Judah pipol go win and mash dia enemies for portor-portor. Wen dem go fight, dem go win dia enemies, bikos mi God dey with dem.

Nombas 14:41

But Moses ansa dem, “Den why una kon dey disobey God? Una nor go fit win!

Nombas 23:21

Wahala nor go happen to Jakob shidren; Israel pipol nor go si trobol. Bikos di Oga wey bi dia God dey with dem and na-im bi di king.

Nombas 31:6

So Moses send dem go war and na Finehas wey Eleazar di priest born bi dia leader. Na dis Finehas dey kare for di holy tins and di trumpet wey dem take dey give sign.

Acts 5:39

but if na from God, una nor go fit stop dem, escept una won fight God.”

Romans 8:31

Wetin wi go tok about all dis tins? If God dey for awa side, who go fit dey against us?

Deutronomi 20:4

Bikos di Oga una God dey go with una! E go fight una enemies for una kon make una win di war!”

Deutronomi 28:29

For aftanoon, una go dey find road to pass like blind pipol and doz wey dey darkness and una go dey fail for evritin wey una dey do. Pipol go always dey tif una tin and opress una and nobody go save una.

Hibru 2:10

Dis na true, bikos na from am and thru am evritin take kom dis life, so dat salvashon go dey korrect thru en sofa and e go karry many pipol enter en glory.