Yudas 1:3 - Perjanjian Baru Bahasa Melayu Maluku Utara

³ Sudara-sudara yang kita sayang, sementara kita tulis surat pa ngoni tentang slamat yang torang so tarima, kita rasa ada yang musti kita tulis kamuka, supaya ngoni berusaha butul-butul untuk tetap batahang deng ngoni pe percaya. Kong ngoni pe percaya itu musti iko Tuhan Allah pe ajaran yang Dia so kase satu kali untuk slama-lamanya pa torang yang so jadi Dia pe umat.

Yudas 1:3 ပူးပေါင်းရင်းမြစ်များ

Kisah Para Rasul 17:3

Paulus kase mangarti pa dorang Kitab Suci pe arti deng bilang, “Mesias, Raja yang Tuhan Allah janji itu, Kitab Suci bilang Dia musti dapa siksa, mati kong hidup ulang. Dia itu Yesus suda, yang kita jaga kase tau pa ngoni la ngoni percaya pa Dia.”

Kisah Para Rasul 18:28

Barang, di orang banya pe muka, Apolos barani baku ambe pendapat deng orang-orang Yahudi yang tara percaya pa Yesus. Dia kase tunju bukti dari Kitab Suci, Yesus itu Mesias suda, Raja yang Tuhan Allah janji mo kase slamat pa manusia.

Kisah Para Rasul 20:27

Barang, kita so salalu kase tau samua Tuhan Allah pe rencana pa ngoni.

Kisah Para Rasul 28:28

Abis itu, Paulus bilang lagi, “Jadi sudara-sudara, ngoni musti tau, orang-orang yang bukang Yahudi itu mo dapa slamat dari Tuhan Allah, barang dorang mau dengar deng tarima Kabar Bae dari Tuhan Allah ini yang biking dorang slamat.” [

Kisah Para Rasul 4:12

Jadi, cuma Yesus saja yang bisa kase slamat pa manusia, karna di seluru dunia, cuma Dia saja yang Tuhan Allah pili untuk kase slamat pa manusia. Tara ada yang laeng.”

Kisah Para Rasul 6:7

Mulai dari situ, Tuhan Allah pe firman lebe tamba tasiar, kong orang-orang di Yerusalem yang percaya pa Tuhan Yesus lebe tamba banya. Imam-imam Yahudi me banya yang jadi percaya pa Yesus.

Kisah Para Rasul 9:13

Turus Ananias bilang, “Ado, Tuhan. Kita so dengar dari orang-orang, dia itu so siksa banya orang yang so jadi Tuhan Allah pe umat di kota Yerusalem.

Kisah Para Rasul 9:22

Tapi biar dorang bilang bagitu me, Saulus pe pengaru lebe tamba basar. Dia kase bukti pake Kitab Suci, Yesus itu butul-butul Mesias, Raja yang Tuhan Allah janji mo kase slamat pa manusia. Kong orang-orang Yahudi langsung tabadiam karna tara mampo malawang pa Saulus.

1 Korintus 15:3

Barang, dari samua ajaran yang kita so tarima dari Tuhan Yesus, itu suda yang kita so kase tau pa ngoni, kong yang paling penting itu bagini: Yesus Kristus so mati untuk tebus torang pe dosa-dosa, iko sama deng yang so tatulis di Kitab Suci.

Galatia 2:5

Tapi torang tara kase iko orang-orang itu pe mau, biar cuma sadiki lagi. Torang tara kase iko pa dorang supaya Kabar Bae yang butul yang ngoni jaga iko, tara baku campur deng dorang pe ajaran yang tara butul itu.

Galatia 3:28

Karna itu, samua orang yang so percaya pa Yesus Kristus so tarada beda pa Tuhan Allah pe muka. Biar ngoni itu orang Yahudi atau orang bukang Yahudi, biar ngoni orang karja yang tara bebas atau orang bebas, deng biar ngoni itu laki-laki atau parampuang, Tuhan Allah lia ngoni samua itu sama, karna ngoni itu orang-orang yang so sama-sama percaya pa Kristus Yesus.

Galatia 6:11

Sudara-sudara, coba ngoni perhatikan. Kita ada tulis bagian terahir surat ini deng kita pe tangan sandiri. Kita tulis pake huruf yang basar-basar ini.

Efesus 1:1

Sudara-sudara yang so jadi Tuhan Allah pe umat di kota Efesus, ngoni yang so percaya pa Kristus Yesus. Salam dari kita Paulus. Kita ini Kristus Yesus pe utusan yang orang sebut rasul, kong kita jadi rasul karna Tuhan Allah pe mau.

Filipi 1:1

Sudara-sudara yang so jadi Tuhan Allah pe umat di kota Filipi, deng ngoni yang pimpin jemaat, deng diaken-diaken. Salam dari kita Paulus deng Timotius. Torang dua ini yang jaga biking apa yang Kristus Yesus suru.

Filipi 1:27

Jadi yang penting skarang, ngoni musti hidup deng cara yang pantas untuk orang-orang yang so percaya Kabar Bae tentang Yesus Kristus, supaya nanti kalu kita pigi lia pa ngoni, atau kalu kita bolong sempat pigi pa ngoni, kita bole dengar, ngoni samua tetap kuat percaya deng satu hati, deng ngoni me sama-sama bakarja karas kase tau Kabar Bae itu pa orang-orang supaya dorang lagi bole jadi percaya.

Kolose 1:2

Salam untuk ngoni sudara-sudara yang percaya pa Kristus Yesus di kota Kolose, ngoni yang so jadi Tuhan Allah pe umat deng yang setia pa Kristus Yesus. Torang minta pa Tuhan Allah, torang samua pe Bapa, supaya kase yang bae pa ngoni, deng salalu biking ngoni pe hati tetap tenang.

1 Tesalonika 2:2

Ngoni me tau, waktu torang bolong datang pa ngoni, torang dapa siksa deng dapa hina di kota Filipi. Tapi biar ada orang yang tantang Kabar Bae itu, Tuhan Allah tetap tolong pa torang sampe torang me barani kase tau Kabar Bae dari Tuhan Allah pa ngoni.

1 Timotius 1:18

Timotius, kita so anggap ngana itu sama deng kita pe ana sandiri! Kita suru ngana iko tugas yang kita so bilang ini. Tugas ini sama deng yang Tuhan Allah so kase pa ngana, yang Dia pe utusan kase tau pa ngana dulu. Jadi biking butul-butul ngana pe tugas ini sama deng satu tentara yang lawan pa orang yang serang dia pe daera. Kong supaya ngana biking tugas itu bae-bae, ngana musti percaya kuat Tuhan pe ajaran yang torang so kase tau pa ngana, turus apa yang ngana biking, ngana pe hati musti tau itu butul.

1 Timotius 6:12

Ngana musti berusaha turus percaya pa Tuhan Allah, sama deng orang yang iko lomba yang berusaha mo dapa piala. Tuhan Allah so pangge pa ngana untuk hidup deng Dia slama-lamanya. Waktu Tuhan Allah pangge pa ngana, ngana mangaku sunggu-sunggu percaya pa Yesus Kristus di orang banya pe muka.

2 Timotius 1:13

Jadi Timotius, iko saja ajaran yang ngana so dengar dari kita. Ajaran itu butul deng bisa jadi conto la ngana kase ajar pa orang laeng. Ngana musti percaya turus pa Yesus deng sayang pa samua orang, itu yang jadi bukti ngana jadi satu deng Kristus Yesus.

Titus 1:4

Titus, torang dua sama-sama percaya pa Yesus Kristus, jadi kita anggap ngana so sama deng kita pe ana sandiri. Kita minta pa Tuhan Allah, torang pe Bapa, deng pa Kristus Yesus yang kase slamat pa manusia, supaya kase yang bae pa ngana, deng salalu biking ngana pe hati tetap tenang.

Ibrani 13:22

Sudara-sudara, kita minta deng sunggu-sunggu supaya ngoni dengar bae-bae kita pe nasehat ini, biar lagi cuma pende saja kita pe surat ini.

Ibrani 6:9

Tapi ngoni sudara-sudara yang kita sayang, biar torang bicara bagitu, torang yakin ngoni tara sama deng tana yang dapa kutuk itu. Tapi yang ngoni biking itu kase tunju ngoni so jadi percaya pa Tuhan Allah, jadi torang yakin, ngoni termasuk orang yang dapa slamat dari dosa-dosa.

1 Petrus 5:12

Silwanus yang bantu pa kita tulis surat yang pende ini pa ngoni. Silwanus ini kita pe sudara yang percaya yang bisa kita percaya. Surat ini kita tulis untuk kase smangat pa ngoni supaya ngoni tetap percaya, deng untuk kase yakin pa ngoni tentang Tuhan Allah pe bae yang Dia salalu kase pa ngoni biar ngoni sementara dapa siksa. Ngoni musti tetap yakin Tuhan Allah pe bae itu, karna itu butul.

2 Petrus 1:1

Sudara-sudara yang percaya, salam dari kita Simon Petrus. Kita ini orang yang jaga biking apa yang Yesus Kristus suru, deng kita ini me Dia pe utusan yang orang sebut rasul. Yesus Kristus itu Tuhan Allah, deng Dia me yang kase slamat pa torang dari dosa-dosa. Dia itu yang biking sampe ngoni percaya pa Dia sama deng torang yang so percaya pa Dia, karna Dia salalu biking barang yang butul.

2 Petrus 2:21

Jadi lebe bae dorang tara perna tau ajaran tentang bagimana dorang bole jadi orang yang tara sala pa Tuhan Allah pe muka, daripada dorang so tau kong tara mau iko lagi parenta yang kudus yang orang so kase tau pa dorang.

Yudas 1:1

Sudara-sudara, ngoni yang Tuhan Allah torang pe Bapa so pangge untuk iko pa Dia, yang Dia sayang, deng yang Dia salalu jaga sampe Yesus Kristus datang ulang. Salam dari kita Yudas. Kita ini Yakobus pe sudara, deng kita me yang jaga biking apa yang Yesus Kristus suru.

Yudas 1:17

Tapi ngoni sudara-sudara yang kita sayang, inga apa yang torang pe Tuhan Yesus Kristus pe utusan-utusan so perna bilang.

Yudas 1:20

Tapi ngoni sudara-sudara yang kita sayang, kase kuat ngoni pe hati supaya ngoni pe percaya pa Tuhan lebe tamba kuat, karna ajaran yang torang percaya itu butul-butul suci. Kong kase biar Roh Kudus yang pimpin pa ngoni waktu ngoni berdoa.

Wahyu 12:11

Torang pe sudara-sudara yang percaya so menang, dorang so kase kala pa Iblis. Dorang so kase kala pa dia, karna Anak Domba pe dara so tatumpa untuk tebus dorang pe dosa-dosa. Dorang me kase kala pa dia, karna dong tara berenti mangaku tentang Anak Domba yang jadi dong pe Tuhan. Biar pa dorang pe hidup dorang dapa siksa atau dapa bunu, dong tara mundur, dong tetap kase tau itu turus.

Wahyu 2:10

Ngoni tara usa tako kalu nanti ngoni masi dapa siksa. Dengar bae-bae, nanti babarapa orang dari ngoni, Iblis mo coba, ngoni butul-butul percaya pa Kita ka tarada. Cobaan itu macam bagini, ngoni mo dapa maso di penjara kong dapa siksa di situ selama spulu hari. Tapi biar ngoni dapa siksa sampe mo mati me, ngoni musti tetap percaya pa Kita. Kalu ngoni tetap batahang percaya, Kita mo kase pa ngoni hidup deng Tuhan Allah slama-lamanya, itu sama deng ngoni dapa makota, tanda ngoni so menang.