Yohanes 7:28 - Perjanjian Baru Bahasa Melayu Maluku Utara

²⁸ Waktu Yesus masi sementara mangajar di Ruma Ibada Pusat pe kompleks, Dia babilang deng suara kuat, “Memang ngoni kanal pa Kita deng ngoni tau Kita pe asal dari mana. Tapi Kita datang bukang karna Kita iko Kita pe mau sandiri. Kita datang karna Tuhan Allah yang utus pa Kita. Dia itu yang butul, kong ngoni tara kanal pa Dia.

Yohanes 7:28 ပူးပေါင်းရင်းမြစ်များ

Matius 11:27

Samua yang ada pa Kita pe Bapa, Bapa so kase pa Kita. Tara ada satu orang yang kanal pa Kita Anak Allah, cuma Bapa saja. Kong tara ada satu orang yang kanal pa Bapa, cuma Kita Anak Allah, deng orang-orang yang Kita pili untuk kanal pa Bapa.

Matius 2:23

Waktu dorang sampe di daera Galilea, dong tinggal di kota satu yang pe nama Nazaret. Itu jadi sama deng apa yang Tuhan Allah so bilang dulu pa nabi-nabi bagini, “Dia itu akan dapa sebut, orang Nazaret.”

Matius 26:55

Kong Yesus bilang pa orang banya yang datang mo tangka pa Dia, “Ngoni sangka Kita ini orang jahat, sampe ngoni datang bawa parang deng kayu panggal la mo tangka pa Kita? Padahal tiap hari Kita kase tau Tuhan Allah pe Kabar Bae di Ruma Ibada Pusat, tapi ngoni tara tangka pa Kita di situ.

Lukas 10:22

Samua yang ada pa Kita pe Bapa, Bapa so kase pa Kita. Tara ada satu orang yang tau sapa sebenarnya Kita Anak Allah, cuma Bapa yang tau. Kong tara ada satu orang yang tau sapa itu Bapa, cuma Kita, Anak Allah yang tau, deng orang-orang yang Kita pili untuk kanal pa Bapa.”

Lukas 2:11

Kabar yang bae itu bagini: hari ini, Orang yang mo kase slamat pa manusia so lahir. Dia so lahir di Betlehem, raja Daud pe kota. Dia itu orang pangge Kristus, Raja yang Tuhan Allah janji mo kase slamat pa ngoni. Dia itu suda Tuhan.

Lukas 2:39

Bagitu Yusuf deng Maria so abis biking samua acara iko Tuhan Allah pe aturan di lima kitab Musa, dorang samua pulang pa dong pe ruma di kota Nazaret, di daera Galilea.

Lukas 2:4

Bagitu lagi deng Yusuf. Dia barangkat dari Nazaret dia pe tampa tinggal di daera Galilea, kong dia pigi di kota yang pe nama Betlehem, di daera Yudea. Yusuf pigi di Daud pe kota, barang dia itu raja Daud pe turunan.

Lukas 2:51

Abis itu, Yesus pulang di Nazaret sama-sama deng dorang, kong Dia tetap dengar-dengaran pa dorang. Tapi Dia pe mama inga-inga turus apa yang Yesus bilang tadi kong tanya-tanya dalam hati apa itu dia pe arti.

Yohanes 1:46

Kong Natanael jawab pa dia, “Apa? Nazaret? Tara mungkin orang bae macam deng yang Tuhan Allah janji itu mo datang dari kampong yang kacil bagitu!” Kong Filipus bale bilang pa dia, “Mari iko kong ngana lia sandiri suda!”

Yohanes 10:36

bikiapa kong ngoni bilang Kita so kase tara bae Tuhan Allah pe nama gara-gara Kita bilang Kita ini Anak Allah? Barang, Tuhan Allah sandiri yang so pili deng utus pa Kita untuk datang di dunia ini.

Yohanes 12:49

Barang, Kita pe ajaran bukang dari Kita pe diri sandiri, tapi dari Bapa yang utus pa Kita. Dia itu yang ada parenta pa Kita untuk bilang apa yang musti Kita mo bilang deng kase tau.

Yohanes 14:10

Ngana tara percaya, Kita deng Bapa itu satu, kong Bapa deng Kita satu? Kong, apa yang Kita bilang pa ngoni itu bukang Kita bakarang sandiri, tapi dari Bapa yang satu deng Kita. Kong apa saja yang Kita biking, itu suda yang Bapa biking.

Yohanes 14:31

Tapi Kita mo biking apa yang Kita pe Bapa ada parenta pa Kita supaya samua orang di dunia ini bole tau, Kita ini sayang pa Kita pe Bapa. Skarang, badiri suda, kong mari torang pigi dari sini.”

Yohanes 16:3

Dorang mo biking bagitu pa ngoni karna dorang tara kanal butul pa Kita pe Bapa deng dorang lagi tara kanal pa Kita.

Yohanes 17:25

Ya Bapa yang adil, orang-orang yang ada di dunia ini tara kanal pa Bapa, tapi Kita kanal pa Bapa. Deng Kita pe murit-murit tau, Bapa itu yang utus pa Kita.

Yohanes 17:3

Kong hidup deng Bapa slama-lamanya itu, pe maksut bagini: dorang so kanal Bapa itu Tuhan Allah yang butul, tara ada yang laeng, deng dorang so kanal Yesus Kristus itu yang Bapa utus untuk datang di dunia ini.

Yohanes 3:2

Satu kali bagini, dia datang pa Yesus malam-malam, kong bilang bagini, “Guru, torang tau, Guru ini yang Tuhan Allah utus untuk kase ajar pa torang. Barang, tara ada satu orang yang bisa biking mujizat-mujizat macam deng yang Guru biking, kalu Tuhan Allah tara sama-sama deng dia.”

Yohanes 3:33

Tapi sapa yang percaya deng apa yang Dia kase tau itu, orang itu setuju, samua yang Tuhan Allah bilang itu butul.

Yohanes 5:32

Tapi Tuhan Allah sandiri yang jadi saksi bilang butul Kita ini yang Dia utus, kong Kita tau apa yang Dia kase tau tentang Kita itu butul, jadi orang bole percaya.

Yohanes 5:43

Kita datang di dunia ini, karna Kita pe Bapa yang utus pa Kita, tapi ngoni tara tarima pa Kita. Padahal kalu orang laeng datang pa ngoni kong dong utus dong pe diri sandiri, ngoni akan tarima pa dia.

Yohanes 6:42

Dorang bilang, “Ee, Dia itu Yesus to? Yusuf pe ana laki-laki. Torang kanal Dia pe mama deng papa. Jadi bagimana bisa Dia bilang kata, Dia so turung dari sorga?”

Yohanes 7:14

Dorang biking hari raya itu, dia pe lama satu minggu, kong nanti so dua tiga hari, baru Yesus maso di Ruma Ibada Pusat pe kompleks kong mulai mangajar di situ.

Yohanes 8:14

Yesus bilang pa dorang, “Biar lagi Kita basaksi tentang Kita pe diri sandiri, tapi yang Kita kase tau itu butul, karna Kita tau dari mana Kita datang deng ka mana Kita pigi. Tapi ngoni, ngoni tara tau, dari mana Kita datang deng ka mana Kita pigi.

Yohanes 8:16

Tapi kalu Kita mo hukum orang, Kita hukum orang deng butul, karna Kita tara hukum sandiri, tapi Kita sama-sama deng Kita pe Bapa yang utus pa Kita.

Yohanes 8:19

Kong dorang bilang pa Dia, “Di mana Guru pe Bapa kong?” Yesus jawab, “Ngoni tara kanal pa Kita, deng ngoni me tara kanal pa Kita pe Bapa. Kalu ngoni kanal pa Kita, pasti ngoni kanal lagi pa Kita pe Bapa.”

Yohanes 8:26

Sebenarnya masi banya lagi yang musti Kita bilang deng kase sala pa ngoni. Tapi Kita cuma mo bilang pa ngoni apa yang Kita dengar dari Dia yang so utus pa Kita. Yang Dia bilang itu butul, kong itu suda yang Kita kase tau pa orang-orang di dunia.”

Yohanes 8:42

Yesus bilang pa dorang, “Kalu Tuhan Allah itu ngoni pe Bapa, ngoni akan sayang pa Kita, barang Kita ini datang dari Tuhan Allah kong skarang Kita ada di sini. Kita datang bukang karna Kita pe mau sandiri, tapi karna Dia suda yang utus pa Kita.

Yohanes 9:29

Torang tau, Tuhan Allah so bicara pa nabi Musa, tapi tentang Orang itu, torang tara tau Dia itu datang dari mana.”

Kisah Para Rasul 17:23

Karna waktu kita bakuliling di ngoni pe kota, kita perhatikan di ngoni pe tampa-tampa semba itu, kita lia ada satu tampa semba yang ada tulisan bagini ‘Tampa semba ini untuk Tuhan Allah yang torang tara kanal’. Jadi Tuhan Allah yang ngoni jaga semba tapi ngoni tara kanal itu, Dia itu suda Tuhan Allah yang kita mo kase kanal pa ngoni skarang.

Roma 1:28

Deng karna dorang rasa dong tara perlu tau tentang Tuhan Allah, jadi Tuhan Allah kase biar dorang pe pikiran yang tara guna itu kuasai pa dorang. Dia pe ahir kabawa, dorang biking barang yang tara pantas dong biking.

Roma 3:4

Yang pasti tara bagitu! Biar samua orang tukang bafoya, Tuhan Allah tetap setia deng Dia pe janji. Tuhan Allah itu salalu butul sama deng yang ada tatulis di Kitab Suci, “Samua yang Tuhan Allah bilang itu butul, kong kalu ada yang mo kase sala pa Dia, Tuhan Allah pasti menang.”

2 Korintus 1:18

Kita tara bagitu, sudara-sudara! Itu sama deng Tuhan Allah, yang pe janji pa torang tara perna beruba. Bagitu lagi deng torang, kata-kata yang tong so bilang pa ngoni, tara perna beruba.

2 Korintus 4:6

Barang, waktu Tuhan Allah biking dunia ini, Dia bicara supaya galap jadi tarang. Bagitu lagi, Dia biking torang pe hati yang galap jadi tarang, supaya tong bole mangarti Tuhan Allah pe kuasa yang luar biasa, kong itu torang bole lia dari Yesus Kristus pe hidup.

Titus 1:2

Kita ajar pa orang-orang yang percaya itu, supaya dorang bole baharap deng yakin, dorang bole dapa hidup deng Tuhan Allah slama-lamanya, sama deng Tuhan Allah so janji. Karna waktu Tuhan Allah bolong biking dunia ini, Dia so janji kamuka, Dia mo kase hidup slama-lamanya pa orang-orang yang percaya pa Dia. Dia pe janji itu pasti jadi, karna Tuhan Allah tara perna bafoya.

Ibrani 6:18

Jadi ada dua hal yang tara perna beruba: pertama, Tuhan Allah pe janji, deng kedua, Dia pe sumpa. Barang, Tuhan Allah tara perna bafoya. Kong karna itu, torang yang cari slamat pa Dia, torang pe hati jadi kuat kong torang bole percaya deng yakin, tong akan tarima samua yang Tuhan Allah so janji pa torang.

1 Yohanes 5:10

Sapa saja yang percaya pa Anak Allah, di dia pe hati dia so tarima apa yang Tuhan Allah so kase tau tentang Dia pe Anak. Tapi sapa saja yang tara percaya pa Tuhan Allah, dia biking Tuhan Allah sama deng pangbafoya, barang dia tara percaya apa yang Tuhan Allah so kase tau tentang Dia pe Anak.