Yohanes 4:10 - Perjanjian Baru Bahasa Melayu Maluku Utara

¹⁰ Turus Yesus bilang pa dia, “Kalu ibu tau sapa sebenarnya yang minta minum pa ibu, deng pe bagus apa itu yang Tuhan Allah mo kase pa ibu, pasti ibu yang mo bale minta minum pa Kita kong Kita mo kase aer yang bisa biking manusia hidup.”

Yohanes 4:10 ပူးပေါင်းရင်းမြစ်များ

Lukas 11:13

Jadi biar ngoni pe hati tara bae, tapi ngoni tau bagimana kase barang yang bae pa ngoni pe ana-ana. Apalagi ngoni pe Bapa yang di sorga! Dia pasti mo kase Roh Kudus pa orang-orang yang minta pa Dia.”

Yohanes 16:3

Dorang mo biking bagitu pa ngoni karna dorang tara kanal butul pa Kita pe Bapa deng dorang lagi tara kanal pa Kita.

Yohanes 17:3

Kong hidup deng Bapa slama-lamanya itu, pe maksut bagini: dorang so kanal Bapa itu Tuhan Allah yang butul, tara ada yang laeng, deng dorang so kanal Yesus Kristus itu yang Bapa utus untuk datang di dunia ini.

Yohanes 3:16

Memang Tuhan Allah paling sayang skali pa samua orang di dunia ini, sampe Dia kase Dia pe Anak yang cuma satu untuk tebus manusia pe dosa-dosa, supaya sapa saja yang percaya pa Dia pe Anak tara mo dapa hukuman tapisa deng Tuhan Allah, tapi mo dapa hidup deng Dia slama-lamanya.

Yohanes 4:14

Tapi sapa saja yang minum aer yang Kita mo kase, dia tara akan aus lagi untuk slama-lamanya. Lebe-lebe lagi aer yang Kita mo kase pa dia, nanti mo jadi sama deng mata aer di dia pe dalam diri yang tara mo berenti-berenti, sampe dia bole dapa hidup deng Tuhan Allah slama-lamanya.”

Yohanes 6:35

Yesus bilang pa dorang, “Kita ini suda makanang yang biking orang bole mo dapa hidup deng Tuhan Allah slama-lamanya. Sapa saja yang datang pa Kita, dia itu tara akan lapar lagi, deng sapa saja yang percaya pa Kita, dia tara akan aus lagi.

Yohanes 6:51

Kita ini suda makanang yang so turung dari sorga, yang bole kase hidup pa manusia. Sapa saja yang makang makanang ini, dia akan dapa hidup deng Tuhan Allah slama-lamanya. Kong makanang yang Kita mo kase itu, Kita pe badan suda, yang Kita mo kase pa samua orang di dunia ini supaya dorang bole hidup.”

Kisah Para Rasul 9:11

Turus Tuhan bilang pa dia, “Ngana pigi suda di jalang yang pe nama Jalang Lurus kong cari Yudas pe ruma. Di situ ngana cari pa satu orang yang pe nama Saulus. Dia itu orang Tarsus, kong skarang dia sementara berdoa.

Roma 8:32

Dia pe Anak sandiri saja Dia tara tahang-tahang, tapi Dia kase sampe mati di kayu salib supaya tebus torang pe dosa. Karna itu, torang jadi tau, apa saja yang bae untuk torang, pasti Dia kase.

1 Korintus 1:30

Barang, Tuhan Allah sandiri yang buka jalang untuk ngoni, supaya ngoni bole percaya pa Kristus Yesus. Deng bagitu, torang bole tau Tuhan Allah pe rencana yang bijaksana untuk kase slamat pa manusia. Yesus Kristus itu yang biking torang jadi orang yang tara sala pa Tuhan Allah pe muka deng yang biking torang jadi Dia pe umat, deng Yesus me yang tebus torang pe dosa-dosa.

1 Korintus 10:4

Dorang samua me minum aer yang sama yang Tuhan Allah kase, aer itu kaluar dari batu basar satu. Batu basar itu sama deng Yesus Kristus sandiri yang ada iko sama-sama turus deng dorang.

2 Korintus 9:15

Mari torang bilang tarimakasi pa Tuhan Allah, karna waktu Dia kase Yesus Kristus mati untuk kase slamat pa torang dari dosa-dosa, itu bole kase sama deng hadia yang paling bagus. Hadia itu pe bagus, torang tara dapa bilang deng kata-kata.

Efesus 2:8

Tuhan Allah kase slamat pa torang yang so percaya pa Yesus Kristus karna Dia pe bae pa torang. Dia kase slamat pa torang dari dosa-dosa bukang karna torang pe usaha biking barang yang bae, tapi Dia kase slamat itu deng cuma-cuma pa torang.

Ibrani 6:4

Orang-orang yang so kase tinggal dorang pe percaya pa Yesus Kristus, so tara mungkin lagi bisa bawa pa dorang untuk bertobat. Barang, dulu dorang hidup di dalam tarang, deng dong so rasa banya Yesus Kristus pe bae yang Dia kase dari sorga, deng dorang lagi so tarima Roh Kudus di dong pe hati.

1 Yohanes 5:20

Torang me tau Anak Allah so datang kong so biking torang mangarti la torang kanal Tuhan Allah yang Butul. Torang so hidup satu hati deng Tuhan Allah, karna torang so hidup satu hati deng Dia pe Anak Yesus Kristus. Dia itu suda Tuhan Allah yang Butul deng Dia yang biking orang bole dapa hidup deng Tuhan Allah slama-lamanya.

Wahyu 21:6

Dia bilang lagi pa kita, “Samua itu so selesai. Kita ini Alfa deng Omega, yang pe arti, mulai dari pertama dunia ini bolong ada, Kita so ada, deng sampe dunia abis, Kita tetap ada. Sapa yang aus, Kita mo kase aer minum deng cuma-cuma pa dia. Aer itu dari mata aer yang biking orang hidup deng Tuhan Allah slama-lamanya.

Wahyu 22:17

Kong Tuhan Allah pe Roh deng pengantin parampuang itu bilang, “Mari suda!” Sapa saja yang dengar itu, lebe bae dia bilang, “Mari suda!” Sapa yang aus, lebe bae dia datang. Deng sapa yang mau minum, lebe bae dia ambe aer deng cuma-cuma, aer yang biking orang hidup deng Tuhan Allah slama-lamanya.

Wahyu 7:17

Karna Anak Domba yang ada di tenga-tenga kursi raja pe muka itu, Dia mo jadi dorang pe Gembala. Dia mo bawa pa dorang minum di mata aer yang biking dorang hidup, kong Tuhan Allah mo hapus dorang samua pe aer mata.”