Yohanes 3:26 - Perjanjian Baru Bahasa Melayu Maluku Utara

²⁶ Turus Yohanes pe murit-murit itu datang pa Yohanes kong balapor tentang Yesus, “Guru, guru masi inga to, pa Orang yang sama-sama deng guru di kali Yordan pe sabla? Guru perna kase tau tentang Dia. Coba lia pa Dia, Dia me ada baptis orang kong pe banya skali orang yang so datang pa Dia.”

Yohanes 3:26 ပူးပေါင်းရင်းမြစ်များ

Matius 23:7

Dorang me suka skali orang hormati pa dorang kalu dorang ada di tampa orang banya. Kong dorang mau orang pangge pa dorang ‘bapa guru’.

Matius 23:8

Tapi ngoni, jang ngoni ingin orang hormati pa ngoni deng orang pangge pa ngoni ‘bapa guru’! Barang, ngoni pe Guru itu cuma satu, kong ngoni samua itu basudara.

Yohanes 1:15

Satu kali bagini, Yohanes Pembaptis kase tau pa orang-orang tentang Yesus, Firman itu. Yohanes kase tau pa dorang deng suara yang kuat, bagini, “Dia itu suda yang kita pe maksut waktu kita bilang, ‘Nanti ada yang mo datang abis kita, Dia lebe hebat dari kita. Barang sebelum kita ada di dunia ini, Dia so kamuka ada.’ ”

Yohanes 1:7

Dia datang untuk jadi saksi la kase tau tentang tarang itu, supaya samua orang yang dengar apa yang dia kase tau itu, dorang bole percaya.

Yohanes 1:9

Tarang yang butul itu Yesus suda, kong Dia sementara datang di dunia. Dia mo kase tarang samua orang pe hati la dorang bole tau tentang Tuhan Allah.

Yohanes 11:48

Kalu torang kase biar pa Dia, samua orang Yahudi akan jadi percaya pa Dia, kong dorang mo biking Dia jadi dong pe raja. Dia pe ahir kabawa, pemerinta Roma yang jaja pa torang bangsa Yahudi akan suru dorang pe tentara-tentara datang la kase ancor torang pe Ruma Ibada Pusat deng tong pe bangsa lagi.”

Yohanes 12:19

Kong orang-orang Yahudi dari aliran Farisi baku bilang, “Ado, tong pe usaha untuk kase berenti pa Dia tara berhasil. Coba ngoni lia saja, banya skali orang di dunia so datang iko pa Dia.”

Yohanes 3:2

Satu kali bagini, dia datang pa Yesus malam-malam, kong bilang bagini, “Guru, torang tau, Guru ini yang Tuhan Allah utus untuk kase ajar pa torang. Barang, tara ada satu orang yang bisa biking mujizat-mujizat macam deng yang Guru biking, kalu Tuhan Allah tara sama-sama deng dia.”

Yohanes 4:1

Orang-orang Yahudi dari aliran Farisi dengar kabar, banya orang so iko pa Yesus, deng kata, Dia so baptis orang lebe banya dari Yohanes.

Yohanes 4:2

(Biar lagi dorang dengar kabar bagitu, tapi sebenarnya bukang Yesus yang kase baptis, tapi Dia pe murit-murit).

Yohanes 4:31

Waktu parampuang itu ada pigi di kota, Yesus pe murit-murit bilang pa Yesus, “Guru, makang suda.”

Yohanes 5:33

Ngoni perna suru orang tanya pa Yohanes Pembaptis tentang Kita, kong Yohanes itu so kase tau yang butul tentang Kita.