Yohanes 3:2 - Perjanjian Baru Bahasa Melayu Maluku Utara

² Satu kali bagini, dia datang pa Yesus malam-malam, kong bilang bagini, “Guru, torang tau, Guru ini yang Tuhan Allah utus untuk kase ajar pa torang. Barang, tara ada satu orang yang bisa biking mujizat-mujizat macam deng yang Guru biking, kalu Tuhan Allah tara sama-sama deng dia.”

Yohanes 3:2 ပူးပေါင်းရင်းမြစ်များ

Matius 22:16

Jadi dorang suru pa dong pe murit-murit deng babarapa orang yang jaga iko pa raja Herodes pigi ka sana supaya bilang bagini, “Guru, torang tau, Guru ini jujur. Guru jaga kase ajar pa orang-orang yang butul tentang bagimana hidup iko Tuhan Allah pe mau. Kong Guru tara tako pa sapa-sapa, karna Guru tara cari muka.

Matius 23:7

Dorang me suka skali orang hormati pa dorang kalu dorang ada di tampa orang banya. Kong dorang mau orang pangge pa dorang ‘bapa guru’.

Matius 23:8

Tapi ngoni, jang ngoni ingin orang hormati pa ngoni deng orang pangge pa ngoni ‘bapa guru’! Barang, ngoni pe Guru itu cuma satu, kong ngoni samua itu basudara.

Markus 12:14

Dorang datang pa Yesus kong bilang bagini, “Guru, torang tau guru orang jujur, deng guru tara cari muka. Guru mangajar yang butul tentang bagimana hidup iko Tuhan Allah pe mau, barang guru tara tako pa sapa-sapa. Jadi skarang torang mo tanya, kalu mo iko tong pe aturan agama, bole ka tarada torang bayar pajak pa raja basar Roma? Torang musti bayar pajak itu ka tarada?”

Yohanes 1:38

Yesus balia ka balakang, Dia lia dorang dua ada iko-iko pa Dia dari balakang. Turus Yesus batanya pa dorang dua, “Ngoni cari apa?” Dorang jawab pa Yesus, “Guru, Guru tinggal di mana?”

Yohanes 10:38

Tapi Kita ini jaga biking yang Kita pe Bapa suru. Jadi, biar ngoni tara mau percaya pa Kita, tapi paling tarada ngoni musti percaya mujizat-mujizat yang Kita so biking. Deng bagitu, ngoni akan jadi tau deng mangarti, Kita pe Bapa deng Kita itu satu.”

Yohanes 12:37

Biar lagi Yesus so biking banya mujizat pa dorang pe muka, tapi dorang masi tara percaya pa Dia.

Yohanes 14:10

Ngana tara percaya, Kita deng Bapa itu satu, kong Bapa deng Kita satu? Kong, apa yang Kita bilang pa ngoni itu bukang Kita bakarang sandiri, tapi dari Bapa yang satu deng Kita. Kong apa saja yang Kita biking, itu suda yang Bapa biking.

Yohanes 15:24

Kalu misalnya Kita tara biking mujizat-mujizat sama deng yang orang laeng tara perna biking, pasti Tuhan Allah tara bilang dorang itu berdosa kalu dorang binci pa Kita. Tapi ini, dorang so lia mujizat-mujizat yang Kita biking, tapi dorang tetap binci pa Kita deng pa Kita pe Bapa lagi.

Yohanes 2:11

Mujizat yang Yesus biking di Kana di daera Galilea, itu jadi Yesus pe mujizat yang pertama. Deng mujizat itu, Yesus so kase tunju Dia pe kuasa yang hebat sampe Dia pe murit-murit jadi percaya pa Dia.

Yohanes 20:16

Kong, Yesus pangge pa Maria, “Maria!” Maria balia pa Yesus, turus bilang, “Rabuni!”, yang pe arti dalam bahasa Ibrani, ‘Guru’.

Yohanes 3:26

Turus Yohanes pe murit-murit itu datang pa Yohanes kong balapor tentang Yesus, “Guru, guru masi inga to, pa Orang yang sama-sama deng guru di kali Yordan pe sabla? Guru perna kase tau tentang Dia. Coba lia pa Dia, Dia me ada baptis orang kong pe banya skali orang yang so datang pa Dia.”

Yohanes 4:31

Waktu parampuang itu ada pigi di kota, Yesus pe murit-murit bilang pa Yesus, “Guru, makang suda.”

Yohanes 5:36

Tapi ada bukti yang lebe basar dari apa yang Yohanes kase tau tentang Kita, yang kase tunju pa orang, Kita ini memang Tuhan Allah yang utus. Bukti itu, Kita pe ajaran deng mujizat yang Kita pe Bapa suru Kita biking kong Kita biking skarang. Kita pe ajaran deng mujizat itu kase tunju pa orang, Kita ini memang yang Tuhan Allah utus.

Yohanes 6:2

Banya skali orang yang iko-iko pa Yesus, karna dong so lia mujizat-mujizat yang Dia biking pa orang-orang saki.

Yohanes 7:31

Tapi di antara orang banya itu, ada banya yang so jadi percaya pa Dia, kong dorang bilang, “Pasti ini Mesias suda, Raja yang Tuhan Allah janji mo kase slamat pa manusia. Barang, tara ada orang yang bisa biking mujizat lebe banya dari yang Dia ada biking.”

Yohanes 9:16

Kong ada dari dorang yang aliran Farisi itu bilang, “Orang yang kase sembu pa orang ini, tara mungkin Tuhan Allah yang utus, barang Dia tara iko aturan agama tentang hari Sabat.” Tapi yang laeng bilang, “Kalu Dia orang berdosa, tara mungkin dia bisa biking mujizat macam bagitu.” Kong dorang deng dorang baku malawang tara abis-abis.

Kisah Para Rasul 10:38

Tuhan Allah pili pa Yesus dari Nazaret kong kase Dia pe Roh Kudus deng kase Dia pe kuasa. Abis itu, Yesus bajalang bakuliling kong biking banya barang yang bae, deng kase sembu pa orang-orang yang Iblis kuasai, barang Tuhan Allah ada sama-sama deng Dia.

Kisah Para Rasul 2:22

Turus Petrus bilang lagi, “Ee, sudara-sudara orang Israel! Dengar bae-bae yang kita mo bilang pa ngoni ini. Tuhan Allah yang utus pa Yesus orang Nazaret itu, kong itu so jelas waktu Yesus biking mujizat-mujizat deng tanda-tanda yang kase tunju Tuhan Allah pe kuasa sampe biking orang herang. Samua itu so jadi di ngoni pe tenga-tenga, sama deng yang ngoni so tau.

Filipi 1:14

Kong gara-gara kita dapa kase maso di penjara, itu yang biking banya sudara yang percaya yang tinggal di kota ini lebe tatamba kuat percaya pa Tuhan, sampe dorang lagi lebe barani kase tau Kabar Bae tentang Yesus Kristus deng tara tako-tako lagi.