Yohanes 3:16 - Perjanjian Baru Bahasa Melayu Maluku Utara

¹⁶ Memang Tuhan Allah paling sayang skali pa samua orang di dunia ini, sampe Dia kase Dia pe Anak yang cuma satu untuk tebus manusia pe dosa-dosa, supaya sapa saja yang percaya pa Dia pe Anak tara mo dapa hukuman tapisa deng Tuhan Allah, tapi mo dapa hidup deng Dia slama-lamanya.

Yohanes 3:16 ပူးပေါင်းရင်းမြစ်များ

Matius 9:13

Dulu Tuhan Allah bilang di Kitab Suci bagini, ‘Yang Kita mau itu, ngoni kase tunju ngoni pe rasa kasiang pa orang laeng, daripada ngoni bakase binatang korban persembahan kong tarada rasa kasiang.’ Jadi skarang ngoni pigi suda cari tau butul-butul apa yang Tuhan Allah bilang itu pe arti. Karna Kita datang bukang untuk pangge pa orang yang anggap dong pe diri butul, tapi Kita datang untuk pangge pa orang berdosa supaya dorang bertobat.”

Markus 12:6

Skarang tinggal satu orang, dia pe ana yang paling dia sayang. Ahirnya dia suru dia pe ana itu pigi pa dorang. Dia bilang bagini, ‘Kalu kita pe ana yang ka sana, pasti dorang hormati pa dia.’

Lukas 2:14

“Puji deng hormat pa Tuhan Allah yang ada di sorga! Kong di bumi ini, Tuhan Allah akan kase hati yang tenang pa orang-orang yang biking sanang Tuhan Allah pe hati.”

Yohanes 1:14

Tuhan Allah pe Firman itu so jadi manusia, kong Dia tinggal di antara torang. Torang so lia Dia pe kuasa yang hebat, kuasa yang Dia dapa dari Tuhan Allah, Dia pe Bapa, karna Dia itu Tuhan Allah pe Anak. Kong Tuhan Allah pe Anak itu cuma satu itu saja. Dia yang biking torang bole tau yang butul tentang Tuhan Allah deng tentang Tuhan Allah pe sayang pa torang.

Yohanes 1:18

Tarada satu orang yang perna lia pa Tuhan Allah, tapi Anak Allah yang cuma satu itu yang jadi satu deng Tuhan Allah, Dia itu suda yang kase tunju deng jelas pa torang sapa itu Tuhan Allah.

Yohanes 1:29

Dia pe beso, Yohanes lia Yesus sementara datang pa dia. Kong Yohanes bilang pa orang-orang yang ada di situ, “Coba ngoni lia, Dia yang datang kamari itu Tuhan Allah mo kase jadi korban, sama deng domba pe ana yang torang orang Israel biasa kase korban untuk hapus dosa.

Yohanes 10:28

Kong Kita mo biking dorang hidup deng Tuhan Allah slama-lamanya deng dong pasti tara akan mati sampe slama-lamanya. Deng tarada satu orang yang bisa rampas pa dorang dari Kita pe tangan.

Yohanes 3:15

supaya sapa saja yang percaya pa Anak Manusia bole mo dapa hidup deng Tuhan Allah slama-lamanya.

Yohanes 3:18

Sapa saja yang percaya pa Anak Allah, orang itu tara mo dapa hukum. Tapi sapa saja yang tara percaya pa Anak Allah, Tuhan Allah so kase sadia dia pe hukuman, karna dia tara percaya pa Anak Allah yang cuma satu ini.

Yohanes 3:36

Jadi, sapa yang percaya pa Dia pe Anak itu, dia mo dapa hidup deng Tuhan Allah slama-lamanya, kong sapa yang tara iko Anak itu pe mau, dia tara mo dapa hidup deng Tuhan Allah slama-lamanya, tapi Tuhan Allah pe hukuman ada pa dia slama-lamanya.

Yohanes 6:40

Barang, ini yang Kita pe Bapa mau: Dia mau supaya tiap orang yang lia pa Dia pe Anak kong percaya pa Anak itu, dorang itu mo dapa hidup deng Tuhan Allah slama-lamanya, deng nanti di hari kiamat, Kita mo kase hidup ulang pa dorang.”

Roma 5:10

Karna dulu, waktu torang masi pangmalawang pa Tuhan Allah, Tuhan Allah sandiri yang kase bae-bae ulang torang pe hubungan deng Dia, deng cara Dia kase Dia pe Anak supaya mati untuk torang. Kong karna torang deng Dia pe hubungan so bae-bae ulang skarang, torang tau, torang pasti akan dapa slamat dari dosa-dosa karna Dia pe Anak so hidup ulang.

Roma 5:8

Tapi Tuhan Allah pe sayang pa torang itu tara bagitu. Waktu torang masi berdosa, Yesus Kristus mati untuk torang. Itu yang kase tunju Tuhan Allah pe sayang yang basar pa torang.

Roma 8:32

Dia pe Anak sandiri saja Dia tara tahang-tahang, tapi Dia kase sampe mati di kayu salib supaya tebus torang pe dosa. Karna itu, torang jadi tau, apa saja yang bae untuk torang, pasti Dia kase.

Efesus 2:4

Tapi Tuhan Allah pe rasa kasiang pa torang itu basar skali. Karna itu, Dia sayang skali pa torang.

2 Tesalonika 2:16

Yesus Kristus, torang pe Tuhan, deng Tuhan Allah, torang pe Bapa, sayang skali pa torang deng salalu kase kuat torang pe hati sampe torang bole baharap deng yakin torang dapa hidup deng Dia slama-lamanya. Torang bole yakin bagitu, karna torang tau, Yesus Kristus pe bae pa torang.

Titus 3:4

Biar torang so jahat bagitu, tapi Tuhan Allah sayang pa torang kong kase tunju Dia pe bae pa torang sampe torang bole dapa slamat dari torang pe dosa-dosa.

Ibrani 2:9

Tapi yang so jelas itu, Yesus Kristus yang berkuasa pa samua-samua yang ada. Dia suda yang Tuhan Allah biking Dia pe posisi sadiki lebe randa dari malaekat-malaekat. Tapi itu cuma sementara saja, cuma waktu Dia ada di dunia ini. Skarang ini, Tuhan Allah so biking Dia jadi hebat deng dapa hormati sama deng Raja karna Dia so menderita sampe mati di kayu salib. Dia rasa samua itu karna Tuhan Allah kase Dia pe bae yang cuma-cuma pa torang samua, supaya torang samua dapa slamat dari dosa-dosa.

1 Yohanes 3:1

Coba ngoni pikir, pe basar skali Tuhan Allah torang pe Bapa pe sayang pa torang, sampe Dia bilang torang ini Dia pe ana-ana! Deng memang torang ini Dia pe ana-ana! Karna itu, orang-orang yang jaga iko dunia pe mau, dorang tara tau torang ini Dia pe ana-ana, barang dorang me tara kanal pa Tuhan Allah.

1 Yohanes 4:19

Torang baku sayang, karna Tuhan Allah yang kamuka sayang pa torang.

Wahyu 1:5

deng pa Yesus Kristus. Yesus Kristus itu yang setia kase tau Tuhan Allah pe pasáng. Dia itu yang kamuka hidup ulang dari antara orang mati. Kong Dia itu Yang Paling Berkuasa dari samua raja di bumi ini. Yesus Kristus itu sayang pa torang. Dia pe dara yang tatumpa waktu Dia mati di kayu salib, kase bebas pa torang dari torang pe dosa-dosa.