Yohanes 15:5 - Perjanjian Baru Bahasa Melayu Maluku Utara

⁵ Kita ini sama deng pohong anggur kong ngoni ini sama deng pohong anggur pe cabang-cabang. Jadi, sama deng pohong deng cabang yang jadi satu, bagitu lagi deng ngoni, kalu ngoni hidup satu hati deng Kita, Kita lagi hidup satu hati deng ngoni, turus ngoni bole biking yang bae yang kase sanang Tuhan Allah pe hati. Karna kalu ngoni tara satu hati deng Kita, ngoni ini tara mampo biking yang bae untuk kase sanang pa Tuhan Allah.

Yohanes 15:5 ပူးပေါင်းရင်းမြစ်များ

Matius 13:21

Tapi firman itu dorang tara simpang bae-bae di dong pe hati, jadi tara batahang lama. Kalu dorang dapa siksa deng menderita karna percaya firman itu, dorang langsung tara percaya lagi pa Tuhan.

Yohanes 12:24

Inga bae-bae yang Kita bilang ini. Apa yang mo jadi pa Kita nanti, Kita ambe conto bagini: kalu orang tanam gandum pe biji, biji itu tara batumbu kalu tara isi dalam tana. Itu sama deng biji itu mati dulu baru mo batumbu, abis itu baru dia mo babua banya.

Yohanes 15:16

Bukang ngoni yang pili pa Kita, tapi Kita yang pili pa ngoni jadi Kita pe murit. Kita so kase tugas pa ngoni, supaya ngoni pigi untuk biking hal-hal bae yang dia pe hasil mo ada turus. Deng bagitu, apa saja yang ngoni minta pa Kita pe Bapa pake Kita pe nama, Dia mo kase itu pa ngoni.

Yohanes 5:19

Yesus tau dorang mara pa Dia karna Dia bilang, Tuhan Allah itu Dia pe Bapa, jadi Yesus kase turus Dia pe bicara pa dorang bagini, “Inga bae-bae yang Kita mo bilang ini. Kita Anak Allah, Kita tara ada kuasa mo biking apa-apa iko Kita pe mau sandiri. Kita cuma biking apa yang Bapa biking, karna apa saja yang Bapa biking, itu lagi yang Kita biking.

Yohanes 9:33

Jadi kalu Orang yang kase sembu pa kita itu tara datang dari Tuhan Allah, Dia pasti tara bisa biking apa-apa!”

Kisah Para Rasul 4:12

Jadi, cuma Yesus saja yang bisa kase slamat pa manusia, karna di seluru dunia, cuma Dia saja yang Tuhan Allah pili untuk kase slamat pa manusia. Tara ada yang laeng.”

Roma 12:5

Bagitu lagi deng torang. Biar torang banya orang, tapi tong so jadi satu sama deng torang ini satu badan karna torang so percaya pa Yesus Kristus. Kong torang samua baku perlu satu deng laeng, sama deng kaki, tangan deng yang laeng-laeng baku perlu.

Roma 6:22

Tapi skarang Tuhan Allah so kase bebas pa ngoni dari dosa, jadi dosa so tara jadi ngoni pe tuang lagi. Deng ngoni so serakan ngoni pe diri jadi Tuhan Allah pe suru-suru. Dia pe untung, Tuhan Allah so biking ngoni jadi Dia pe umat yang hidup cuma biking Dia pe mau. Kong dia pe ahir kabawa, ngoni mo hidup deng Tuhan Allah slama-lamanya.

Roma 7:4

Sudara-sudara, bagitu lagi yang jadi pa torang deng aturan di lima kitab Musa. Dulu, torang musti iko aturan di lima kitab Musa itu supaya torang bole dapa slamat dari dosa-dosa. Tapi Yesus Kristus so mati, kong torang yang percaya pa Dia so kase tinggal torang pe hidup yang cuma iko torang pe mau sandiri, itu sama deng torang so mati sama-sama deng Dia. Jadi skarang torang so tara usa lagi iko aturan di lima kitab Musa itu supaya mo dapa slamat. Torang so jadi Yesus Kristus punya, Dia itu yang so hidup ulang. Kong karna torang so jadi Yesus Kristus punya, torang bole biking barang yang bae untuk Tuhan Allah.

1 Korintus 10:16

Waktu torang iko perjamuan, torang minum anggur dari cawan kong bilang tarimakasi pa Tuhan. Deng torang minum anggur itu, itu pe arti, Tuhan Allah so biking torang jadi satu deng Yesus Kristus pe dara yang tatumpa di kayu salib. Kong waktu torang pela-pela roti kong makang, itu pe arti, Tuhan Allah so biking torang jadi satu deng Yesus Kristus pe badan yang tapaku di kayu salib.

1 Korintus 12:12

Torang banya orang, tapi torang jadi satu, karna torang sama-sama percaya pa Yesus Kristus. Itu sama deng orang pe badan yang cuma satu, tapi ada dia pe kaki, tangan, mata, deng laeng-laeng.

1 Korintus 12:27

Bagitu lagi deng ngoni. Ngoni samua yang percaya jadi satu, sama deng Yesus Kristus pe kaki, tangan, mata deng bagian-bagian laeng lagi. Itu sama saja deng ngoni itu jadi Yesus Kristus pe satu badan anteru.

2 Korintus 13:8

Karna kalu ngoni ada biking barang yang butul, torang tara bole lawan pa ngoni. Torang cuma mo tolong pa ngoni supaya ngoni iko ajaran yang butul.

2 Korintus 9:10

Tuhan Allah yang kase sadia bibit untuk orang yang baambur bibit di kobong. Deng Dia yang kase makanang pa torang manusia la torang bisa makang. Jadi bagitu lagi, Tuhan Allah mo tamba apa yang ada pa ngoni la ngoni bisa biking banya skali barang yang bae pa orang laeng. Itu sama deng orang bapanen, kong dia pe hasil banya.

Galatia 5:22

Tapi orang yang Roh Kudus kuasai itu dapa lia dari dorang pe hidup macam bagini: pangsayang, hati sanang, hati tenang, pangsabar, pangbae, biking barang yang bae, setia,

Efesus 5:9

Karna orang yang hidup dalam tarang, dorang itu biking barang yang bae, yang butul, deng yang adil.

Filipi 1:11

Kita minta lagi supaya Yesus Kristus bakarja di ngoni pe hati la ngoni bole biking barang yang butul pa Tuhan Allah pe muka. Turus orang-orang mo puji deng hormat pa Tuhan Allah karna dorang lia yang ngoni so biking itu.

Filipi 4:13

Kita bole batahang deng sagala macam keadaan, itu karna Yesus Kristus yang biking kita kuat mangada samua itu.

Filipi 4:17

Kita bicara tentang doi ini, bukang karna kita ingin ngoni kase lagi pa kita, tapi kita mau, biar suda Tuhan Allah yang balas ngoni pe bae karna ngoni so bantu pa kita.

Kolose 1:10

Barang, kalu ngoni so tau Tuhan Allah pe mau, ngoni akan hidup deng kalakuang yang pantas dapa sebut orang yang percaya pa Tuhan, kong ngoni akan biking Dia pe hati sanang. Ngoni me akan biking hal-hal yang bae turus-turus, deng ngoni me akan lebe tamba kanal pa Tuhan Allah.

Kolose 1:6

Kong Kabar Bae yang datang pa ngoni itu so tasiar di seluru dunia, sampe banya orang so percaya pa Tuhan kong dong pe hidup beruba. Bagitu lagi yang jadi pa ngoni waktu ngoni mulai dengar Kabar Bae itu kong mangarti butul Tuhan Allah pe bae pa manusia.

Yakobus 1:17

Barang, samua yang bae deng sempurna yang torang dapa, itu datang dari Tuhan Allah yang di sorga. Dia itu torang pe Bapa yang biking matahari, bulan, deng bintang untuk kase tarang langit. Matahari, bulan, deng bintang itu basinar iko dia pe waktu untuk kase tarang dunia ini. Tapi Tuhan Allah tara bagitu, Dia tara beruba, Dia salalu bae.

1 Petrus 2:4

Datang suda pa Tuhan Yesus. Dia itu sama deng batu yang hidup, barang Dia yang biking manusia bole hidup. Dia itu sama deng batu yang manusia so buang, tapi Tuhan Allah pili Dia itu jadi sama deng batu fandasi yang paling penting.

2 Petrus 3:18

Lebe bae tiap hari ngoni tamba sadar Yesus Kristus pe bae deng lebe tamba kanal pa Dia. Dia itu torang pe Tuhan Yesus Kristus yang kase slamat pa torang dari dosa-dosa. Kong untuk Dia suda puji deng hormat dari skarang sampe slama-lamanya. Amin.