Yohanes 1:19 - Perjanjian Baru Bahasa Melayu Maluku Utara

¹⁹ Satu kali bagini, Yohanes Pembaptis sementara kase tau pa orang-orang sapa itu yang Tuhan Allah ada utus untuk datang kase slamat pa dorang, kong ada babarapa imam deng orang-orang dari suku Lewi yang jaga layani di Ruma Ibada Pusat, dorang datang pa dia. Dorang dapa utus dari pemimpin-pemimpin agama Yahudi untuk batanya pa Yohanes bagini, “Ngana ini sebenarnya sapa?”

Yohanes 1:19 ပူးပေါင်းရင်းမြစ်များ

Yohanes 1:7

Dia datang untuk jadi saksi la kase tau tentang tarang itu, supaya samua orang yang dengar apa yang dia kase tau itu, dorang bole percaya.

Yohanes 10:24

Turus, pemimpin-pemimpin agama Yahudi, dong bakumpul pa Yesus, turus bilang, “Guru, so lama skali torang tunggu Guru mo kase tau pa torang, Guru ini sapa sebenarnya. Kalu memang Guru ini Mesias, Raja yang Tuhan Allah janji mo kase slamat pa manusia, bilang suda turus tarang pa torang.”

Yohanes 10:31

Pe dengar Yesus bilang bagitu, orang-orang Yahudi ambe batu lagi mo lempar kase mati pa Dia.

Yohanes 11:19

Jadi banya orang agama Yahudi dari Yerusalem so datang pa Marta deng Maria untuk hibur pa dorang, barang dong dua pe sudara Lazarus so mati.

Yohanes 2:18

Pe lia Yesus user orang-orang di Ruma Ibada Pusat itu, pemimpin-pemimpin agama Yahudi datang kong bilang pa Yesus, “Kalu memang Bapa ada hak biking bagitu, coba Bapa biking mujizat satu la tong tau!”

Yohanes 2:20

Kong pemimpin-pemimpin agama Yahudi itu bilang lagi pa Yesus, “Apa? Orang ada kase badiri Ruma Ibada Pusat ini ampa pulu anam taong, kong Bapa bilang cuma dalam tiga hari mo kase badiri ini lagi?”

Yohanes 5:10

Jadi, pemimpin-pemimpin agama Yahudi bilang pa orang yang baru sembu itu bagini, “Hari ini, hari Sabat to? Kalu iko torang pe agama pe aturan, bapa tara bole bakarja angka tikar.”

Yohanes 5:15

Abis bicara deng Yesus, orang itu pi kase tau pa pemimpin-pemimpin agama Yahudi, Yesus itu suda yang so kase sembu pa dia.

Yohanes 5:16

Pe dengar itu, pemimpin-pemimpin agama Yahudi mulai berusaha biking susa pa Yesus, karna Dia so kase sembu orang pas di hari Sabat.

Yohanes 5:18

Yesus pe kata-kata itu biking pemimpin-pemimpin agama Yahudi lebe berusaha mo bunu pa Dia. Dorang mo bunu pa Dia bukang cuma karna Dia langgar aturan hari Sabat, tapi karna Dia bilang lagi, Tuhan Allah itu Dia pe Bapa sandiri. Itu pe arti, Dia so biking Dia pe diri sama deng Tuhan Allah.

Yohanes 6:41

Kong orang-orang agama Yahudi bafeto tentang Yesus, barang Dia bilang Dia itu suda makanang yang so turung dari sorga.

Yohanes 6:52

Pe dengar itu, pemimpin-pemimpin agama Yahudi baku malawang kong bilang, “Ii, Dia so bicara apa lagi ini? Bagimana kong Dia bisa kase Dia pe badan untuk torang makang?”

Yohanes 7:1

Abis bicara pa orang banya, Yesus pigi bajalang dari tampa satu ka tampa yang laeng di daera Galilea. Dia tara mau pigi di daera Yudea karna pemimpin-pemimpin agama Yahudi di sana ada cari pa Dia la mo bunu.

Yohanes 7:11

Pe pas waktu hari raya di Yerusalem itu, pemimpin-pemimpin agama Yahudi cari-cari pa Yesus di acara itu, dorang babatanya, “Orang itu di mana e?”

Yohanes 7:15

Pemimpin-pemimpin agama Yahudi herang skali, kong dorang baku bilang, “Orang ini tau skali tentang aturan-aturan di lima kitab Musa, padahal Dia itu tara perna balajar sama deng torang.”

Yohanes 8:22

Pe dengar itu, pemimpin-pemimpin agama Yahudi baku bilang, “Dia mo bunu diri kaapa? Barang Dia bilang, di tampa yang Dia mo pigi, torang tara mungkin pigi di situ.”

Yohanes 8:48

Pemimpin-pemimpin agama Yahudi langsung hina pa Yesus, “Ee Bapa, memang butul yang torang bilang, Bapa ini bukang orang Israel, tapi Bapa ini orang Samaria yang so kemasukan setang.”

Yohanes 8:52

Pemimpin-pemimpin agama Yahudi itu bilang pa Dia, “Skarang so jelas, Bapa memang kemasukan setang. Abraham deng nabi-nabi laeng so mati samua, tapi Bapa bilang kata, sapa yang iko Bapa pe ajaran, orang itu tara akan mati sampe slama-lamanya.

Yohanes 8:57

Pe dengar Yesus bilang bagitu, pemimpin-pemimpin agama Yahudi itu bilang pa Dia, “Bapa pe umur saja bolong lima pulu taong. Bagimana kong Bapa bilang Bapa so lia pa Abraham?”

Kisah Para Rasul 13:25

Waktu Yohanes pe tugas so mo abis, dia bilang pa orang-orang bagini, ‘Ngoni pikir kita ini sapa? Kita bukang Orang yang Tuhan Allah janji mo kase slamat pa torang orang Israel yang ngoni tunggu-tunggu. Tapi, abis kita, baru Dia mo datang. Mo maruku buka Dia pe sandal pe tali me, kita tara pantas.’

Kisah Para Rasul 19:4

Kong Paulus bilang pa dorang, “Waktu Yohanes baptis orang, itu tanda dorang so bertobat. Tapi Yohanes me kase tau lagi pa orang-orang, nanti abis dia, ada satu Orang lagi mo datang, kong dorang musti percaya pa Dia. Dia itu pe nama Yesus.”

1 Yohanes 1:5

Ini berita yang torang so dengar dari Yesus, kong torang kase tau pa ngoni bagini: Tuhan Allah itu tarang, jadi pa Dia sama skali tarada galap.