Yohanes 1:14 - Perjanjian Baru Bahasa Melayu Maluku Utara

¹⁴ Tuhan Allah pe Firman itu so jadi manusia, kong Dia tinggal di antara torang. Torang so lia Dia pe kuasa yang hebat, kuasa yang Dia dapa dari Tuhan Allah, Dia pe Bapa, karna Dia itu Tuhan Allah pe Anak. Kong Tuhan Allah pe Anak itu cuma satu itu saja. Dia yang biking torang bole tau yang butul tentang Tuhan Allah deng tentang Tuhan Allah pe sayang pa torang.

Yohanes 1:14 ပူးပေါင်းရင်းမြစ်များ

Matius 1:16

kong Yakub pe ana Yusuf. Yusuf ini yang kawing deng Maria, kong Maria ini yang kase lahir pa Yesus. Yesus ini suda yang orang jaga pangge pa Dia Kristus, Raja yang Tuhan Allah janji mo kase slamat pa manusia.

Lukas 2:11

Kabar yang bae itu bagini: hari ini, Orang yang mo kase slamat pa manusia so lahir. Dia so lahir di Betlehem, raja Daud pe kota. Dia itu orang pangge Kristus, Raja yang Tuhan Allah janji mo kase slamat pa ngoni. Dia itu suda Tuhan.

Lukas 2:7

Maria melahirkan dia pe ana laki-laki, ana yang tua. Abis itu dia bungkus deng kaeng pa ana itu kong kase tidor di binatang pe tampa makanang, karna samua penginapan di situ so ponong.

Lukas 9:32

Waktu dorang tiga babicara itu, Petrus deng tamang dua ada tasono. Waktu dorang takage, dorang dapa lia Yesus bacahaya luar biasa deng nabi dua orang yang badiri dekat Dia.

Yohanes 1:1

Dulu skali, waktu dunia ini bolong ada, Tuhan Allah pe Firman itu so ada. Firman itu Yesus suda. Dia itu ada sama-sama deng Tuhan Allah, kong Dia itu suda Tuhan Allah.

Yohanes 11:40

Yesus bilang, “Kita so bilang pa ngana tadi to? Kalu ngana percaya pa Kita, ngana akan lia Tuhan Allah pe kuasa yang hebat.”

Yohanes 14:6

Kong Yesus bilang pa dia, “Kita ini jalang yang mo pigi pa Tuhan Allah, deng Kita ini yang kase tau yang butul tentang Tuhan Allah, deng Kita lagi yang kase hidup deng Tuhan Allah slama-lamanya. Jadi, tara ada satu orang yang bole pigi pa Tuhan Allah kalu tara iko pa Kita.

Yohanes 14:9

Yesus bilang pa dia, “Filipus, so lama skali Kita sama-sama deng ngoni, masa ngana tara kanal pa Kita? Sapa yang so lia pa Kita, dia itu so lia pa Kita pe Bapa. Jadi, bikiapa lagi ngana minta Kita kase tunju Kita pe Bapa pa ngoni?

Yohanes 17:22

Bapa so kase Bapa pe kuasa yang luar biasa pa Kita, bagitu lagi Kita so kase Bapa pe kuasa yang luar biasa pa dorang, supaya dorang bole jadi satu hati satu deng yang laeng sama deng Bapa deng Kita yang so satu.

Yohanes 17:24

Bapa, Kita ingin dorang yang Bapa so kase pa Kita itu salalu ada sama-sama deng Kita di Kita pe tampa tinggal nanti, supaya dorang bisa lia Kita pe kuasa yang luar biasa. Kuasa yang luar biasa itu Bapa so kase pa Kita karna Bapa sayang pa Kita dari waktu dunia bolong ada.

Yohanes 18:37

Turus gubernur Pilatus batanya lagi pa Yesus, “Jadi Bapa ini Raja?” Yesus jawab pa dia, “Bapa yang bilang Kita ini Raja, deng memang itu butul suda dia pe tujuan Kita lahir deng Kita datang di dunia ini, supaya Kita bole kase tau yang butul. Kong sapa yang suka yang butul, dia pasti dengar pa Kita.”

Yohanes 2:11

Mujizat yang Yesus biking di Kana di daera Galilea, itu jadi Yesus pe mujizat yang pertama. Deng mujizat itu, Yesus so kase tunju Dia pe kuasa yang hebat sampe Dia pe murit-murit jadi percaya pa Dia.

Yohanes 3:16

Memang Tuhan Allah paling sayang skali pa samua orang di dunia ini, sampe Dia kase Dia pe Anak yang cuma satu untuk tebus manusia pe dosa-dosa, supaya sapa saja yang percaya pa Dia pe Anak tara mo dapa hukuman tapisa deng Tuhan Allah, tapi mo dapa hidup deng Dia slama-lamanya.

Yohanes 3:18

Sapa saja yang percaya pa Anak Allah, orang itu tara mo dapa hukum. Tapi sapa saja yang tara percaya pa Anak Allah, Tuhan Allah so kase sadia dia pe hukuman, karna dia tara percaya pa Anak Allah yang cuma satu ini.

Yohanes 6:51

Kita ini suda makanang yang so turung dari sorga, yang bole kase hidup pa manusia. Sapa saja yang makang makanang ini, dia akan dapa hidup deng Tuhan Allah slama-lamanya. Kong makanang yang Kita mo kase itu, Kita pe badan suda, yang Kita mo kase pa samua orang di dunia ini supaya dorang bole hidup.”

Yohanes 8:32

Deng ngoni akan tau yang butul dari Tuhan Allah, kong itu mo biking ngoni jadi bebas, tara sama deng orang karja yang taika deng dia pe tuang.”

Kisah Para Rasul 13:33

Janji itu Tuhan Allah so biking pa torang, dorang pe ana cucu, deng cara so kase hidup ulang pa Yesus. Itu sama deng yang tatulis di kitab Mazmur, di situ Tuhan Allah bilang bagini tentang Yesus, ‘Ngana Kita pe Ana, hari ini Kita so jadi Ngana pe Papa.’

Roma 8:3

Kalu torang iko aturan-aturan di lima kitab Musa, tara mungkin torang dapa slamat, karna torang ini manusia yang tara mampo biking samua aturan itu. Tapi torang bole dapa slamat karna Tuhan Allah. Tuhan Allah kase slamat pa torang deng cara Dia utus Dia pe Anak sandiri datang di dunia ini. Dia pe Anak pe badan itu, sama deng torang manusia berdosa pe badan. Kong Dia pe Anak itu mati supaya hapus torang pe dosa. Deng Dia kase Dia pe Anak mati bagitu, itu pe arti, Dia pe Anak so kase kala dosa pe kuasa.

Roma 9:5

Dorang itu me turunan dari Abraham, Ishak deng Yakub, kong dari turunan ini Yesus Kristus lahir sebagai manusia untuk mo kase slamat pa manusia. Yesus Kristus itu suda Tuhan Allah, Dia pe kuasa lebe basar dari samua yang ada. Jadi Dia yang pantas dapa puji sampe slama-lamanya. Amin.

1 Korintus 15:47

Manusia pertama Tuhan Allah biking dari tana, dia pe asal dari dunia ini. Tapi manusia yang kedua, yang torang bilang Yesus Kristus itu, Dia pe asal dari sorga.

2 Korintus 12:9

Tapi Dia bilang pa kita bagini, “Kita tara kase sembu pa ngana, tapi Kita akan tetap kase tunju Kita pe bae pa ngana. Itu so cukup. Karna waktu ngana rasa tara kuat, di situ Kita pe kuasa akan bakarja sempurna pa ngana pe hidup.” Jadi karna itu, kita lebe suka puji diri untuk bilang apa-apa yang kita tara mampo biking, karna waktu kita tara kuat, Yesus Kristus pe kuasa ada sama-sama deng kita.

Galatia 4:4

Tapi, bagitu waktu yang Tuhan Allah tentukan so sampe, Tuhan Allah utus Dia pe Anak datang di dunia. Anak itu yang lahir dari parampuang satu, kong Anak itu, hidup iko agama Yahudi pe aturan-aturan yang ada di lima kitab Musa.

Efesus 3:8

Dari samua yang so jadi Tuhan Allah pe umat, kita ini suda yang paling tarada arti apa-apa. Tapi biar bagitu, Tuhan Allah kase Dia pe bae pa kita untuk kita kase tau Kabar Bae tentang Yesus Kristus pa orang-orang bukang Yahudi. Kita kase tau pa dorang tentang sagala hal yang talebe-lebe, yang Dia so rencana mo kase pa orang yang percaya pa Dia.

Kolose 1:19

Barang, Tuhan Allah mau supaya samua Dia pe sifat deng kuasa ada pa Yesus Kristus pe diri.

Kolose 2:3

Barang, cuma deng percaya pa Yesus Kristus saja, torang bole dapa dua hal yang penting ini: torang bole tau banya hal, deng torang bole tau mana yang bae yang torang musti biking.

Kolose 2:9

Inga, jang ngoni tapengaru deng dong pe ajaran yang sala itu, karna samua Tuhan Allah pe sifat deng kuasa ada pa Yesus Kristus pe diri.

1 Timotius 3:16

Ajaran yang Tuhan Allah kase pa torang itu butul, kong pe bagus skali, tarada yang bisa lawan! Biar dulu orang bolong tau ajaran itu, skarang Tuhan Allah so kase tau pa torang bagini: Yesus so datang jadi manusia. Roh Kudus yang kase tunju pa torang Dia itu Orang yang butul, deng malaekat-malaekat lia pa Dia. Dia pe Kabar so tasiar sampe di bangsa-bangsa laeng, kong orang-orang di dunia ini percaya pa Dia. Tuhan Allah so angka pa Dia di sorga deng cara yang luar biasa.

Ibrani 1:3

Kong deng torang lia pa Anak Allah itu, torang bole dapa lia Tuhan Allah pe kuasa yang luar biasa. Karna kalu torang so dapa lia pa Dia, itu sama saja deng torang so lia pa Tuhan Allah. Anak Allah itu lagi yang ator samua-samua yang ada di dunia ini pake Dia pe bicara yang ada kuasa. Dia me yang kase Dia pe diri mati, supaya kase ampun manusia pe dosa. Abis itu, Dia nae di sorga, dudu di tampa yang terhormat, pa Tuhan Allah Yang Paling Berkuasa pe sabla kanan.

Ibrani 1:5

Barang, tara perna Tuhan Allah bilang pa malaekat mana saja, sama deng Dia bilang pa Yesus bagini, “Ngana Kita pe Anak. Hari ini Kita kase tau pa samua orang, Ngana Kita pe Anak.” Kong, tara perna lagi Tuhan Allah bilang tentang malaekat mana saja bagini, “Kita akan jadi Dia pe Papa, kong Dia itu akan jadi Kita pe Anak.”

Ibrani 10:5

Kong karna binatang korban persembahan pe dara itu tara cukup untuk hapus manusia pe dosa, itu yang biking sampe Yesus Kristus bilang bagini waktu Dia datang di dunia, “Tuhan Allah, Tuhan tara mau binatang korban persembahan deng persembahan-persembahan laeng, tapi Tuhan Allah so sadia Kita pe badan untuk jadi persembahan pa Tuhan Allah.

Ibrani 2:11

Yesus yang tebus torang manusia pe dosa supaya torang jadi bersi pa Tuhan Allah pe muka. Dia deng torang pe Bapa cuma satu. Karna itu, Dia tara malu bilang, torang ini Dia pe sudara-sudara.

Ibrani 5:5

Bagitu lagi deng Yesus Kristus. Dia tara angka Dia pe diri sandiri jadi Imam Basar, tapi Tuhan Allah yang angka pa Dia supaya dapa puji deng hormat. Tuhan Allah bilang pa Yesus Kristus bagini, “Ngana Kita pe Anak. Hari ini Kita jadi Ngana pe Papa.”

1 Yohanes 4:14

Torang ini so lia pa Anak Allah deng torang pe mata kapala sandiri kong so kase tau pa ngoni, butul Tuhan Allah torang pe Bapa so utus Dia pe Anak untuk kase slamat pa manusia yang ada di dunia ini.

1 Yohanes 4:9

Tuhan Allah kase tunju Dia pe sayang pa torang deng cara Dia utus Dia pe Anak dapa yang cuma satu itu di dunia ini, supaya Dia pe Anak dapa itu biking torang bole dapa hidup deng Tuhan Allah slama-lamanya.

2 Yohanes 1:7

Kita tulis surat ini pa ngoni karna ada banya orang skarang pigi bakuliling di seluru dunia untuk kase sesat orang. Dorang itu tara percaya, Yesus Kristus itu datang di dunia sebagai manusia. Dorang itu pangbafoya deng dong musu pa Yesus Kristus.

Wahyu 19:13

Dia pake juba yang so colo di dara. Deng Dia pe nama ‘Firman Allah’.

Wahyu 21:3

Kong kita dengar suara yang kuat skali dari sekitar Tuhan Allah pe kursi raja itu bilang bagini, “Perhatikan bae-bae! Tuhan Allah pe tampa tinggal so ada di tenga-tenga manusia, deng Dia akan tinggal sama-sama deng manusia. Dorang akan jadi Dia pe umat, deng Dia sandiri akan ada sama-sama deng dorang jadi dorang pe Tuhan Allah.