Yakobus 2:5 - Perjanjian Baru Bahasa Melayu Maluku Utara

⁵ Sudara-sudara yang kita sayang, dengar yang kita mo bilang ini: orang miskin yang ada di dunia ini, Tuhan Allah so pili pa dorang la butul-butul percaya pa Dia. Dorang itu yang mo jadi Tuhan Allah pe umat yang Dia Berkuasa sebagai Raja pa dorang pe hidup, sama deng yang Dia so janji pa samua orang yang sayang pa Dia.

Yakobus 2:5 ပူးပေါင်းရင်းမြစ်များ

Matius 11:5

orang buta so bisa dapa lia, orang lumpu so bisa bajalang, orang lepra so sembu, orang pongo so bisa dengar, orang mati so hidup ulang, deng orang miskin so dengar Kabar Bae dari Tuhan Allah.”

Matius 25:34

Waktu itu, Anak Manusia yang so jadi Raja itu mo bilang pa orang-orang yang ada pa Dia pe sabla kanan, ‘Datang kamari suda ngoni yang Kita pe Bapa berkati! Datang suda di tampa yang Kita Berkuasa sebagai Raja, Kita so kase sadia tampa untuk ngoni di situ dari pertama waktu dunia ini jadi.

Matius 5:3

“Paling sanang suda orang-orang yang rasa dong pe diri tara pantas pa Tuhan Allah pe muka, karna dorang itu suda yang jadi Tuhan Allah pe umat yang Dia Berkuasa sebagai Raja.

Markus 7:14

Abis itu Yesus pangge ulang orang banya kong bilang pa dorang bagini, “Dengar bae-bae yang Kita bilang ini supaya ngoni mangarti.

Lukas 12:21

Bagitu yang akan mo jadi pa orang yang cuma tau kumpul harta untuk dia pe diri sandiri saja. Dia tara peduli deng Tuhan Allah pe mau, dia itu sama deng orang yang tarada arti apa-apa pa Tuhan Allah pe muka.”

Lukas 12:32

Yesus bilang lagi, “Ngoni yang iko pa Kita cuma sadiki, sama deng domba-domba satu kelompok kacil. Tapi biar bagitu me jang ngoni tako! Karna ngoni pe Bapa sanang skali ngoni mo sama-sama deng Dia Berkuasa sebagai Raja.

Lukas 16:22

Satu kali, orang miskin itu mati, kong malaekat-malaekat bawa pa dia di tampa yang terhormat, pa Abraham pe pinggir. Orang kaya itu me mati kong orang kubur pa dia.

Lukas 16:25

Tapi Abraham bilang bagini, ‘Ana e, inga dulu waktu ngana masi hidup di dunia, ngana so dapa samua yang bae. Tapi kasiang Lazarus, selama hidup, dia cuma dapa samua yang tara bae saja. Jadi skarang dia dapa sanang di sini, kong ngana dapa sengsara.

Lukas 22:29

Karna itu, Kita mo kase kuasa pa ngoni untuk berkuasa sama deng Kita pe Bapa ada kase kuasa pa Kita.

Lukas 6:20

Yesus haga pa Dia pe murit-murit kong bilang bagini, “Paling sanang suda ngoni yang tarada apa-apa, karna ngoni jadi Tuhan Allah pe umat yang Dia Berkuasa sebagai Raja.

Yohanes 7:48

Coba ngoni pikir, ada ka tarada dari torang orang aliran Farisi, atau dari pemimpin-pemimpin agama Yahudi yang laeng yang jadi percaya pa Dia? Tara ada to?

Kisah Para Rasul 7:2

Stefanus bilang, “Bapa-bapa deng sudara-sudara, coba ngoni dengar dulu. Ngoni masi inga, to? Dulu, torang pe orang tua dulu-dulu Abraham tinggal di daera Mesopotamia, sebelum dia tinggal di kota Haran. Di situ, Tuhan Allah yang luar biasa, kase tunju Dia pe diri pa Abraham,

Roma 8:17

Deng karna torang ini so jadi Tuhan Allah pe ana-ana, nanti tong mo dapa warisan dari Dia, itu berarti, torang ini me ada hak dari samua yang Dia so kase sadia untuk Dia pe ana-ana. Kong torang mo dapa samua itu sama-sama deng Yesus Kristus. Tapi kalu torang mau dapa itu, tong lagi musti menderita iko pa Tuhan Allah sama deng Yesus Kristus so menderita, supaya torang nanti dapa puji deng hormat sama-sama deng Dia.

1 Korintus 2:9

Rencana itu sama deng yang tatulis di Kitab Suci, bagini: “Tuhan Allah so kase sadia banya hal untuk orang-orang yang sayang pa Dia. Yang Dia so kase sadia itu, bolong perna manusia lia deng dia pe mata, bolong perna manusia dengar deng dia pe talinga, deng bolong perna ada pa manusia pe pikiran.”

2 Korintus 4:15

Torang dapa samua siksa itu waktu tong kase tau Kabar Bae tentang Yesus Kristus, tapi samua itu untuk ngoni pe bae. Karna kalu lebe banya orang yang dengar tentang Tuhan Allah pe bae pa manusia, nanti tamba banya orang yang bilang tarimakasi pa Tuhan Allah. Deng bagitu, Tuhan Allah lebe dapa puji deng hormat.

2 Korintus 6:10

Biar torang dapa banya susa, torang pe hati tetap saja rasa sanang. Biar torang tara ada doi, tapi torang so bantu banya orang la percaya pa Yesus Kristus, itu sama deng torang biking dorang jadi kaya. Deng biar torang tara ada apa-apa di dunia, tapi sebenarnya torang dapa samua-samua dari Tuhan.

2 Korintus 8:9

Sebenarnya kita tara perlu suru ngoni bantu pa dorang, barang ngoni so tau Yesus Kristus torang pe Tuhan pe bae yang Dia so kase pa ngoni. Biar Dia punya samua-samua yang ada, tapi karna Dia sayang pa torang, Dia kase tinggal samua itu supaya jadi manusia yang tara punya apa-apa. Dia biking bagitu la torang dapa banya yang bae dari Tuhan Allah.

Efesus 1:18

Kong kita minta lagi supaya Dia buka ngoni pe hati, la ngoni bisa mangarti butul samua hal yang ngoni bole harap pa Dia karna ngoni yang Dia so pili jadi Dia pe umat. Deng kita minta lagi supaya ngoni mangarti pe hebat skali samua janji yang Dia mo kase pa ngoni itu.

Efesus 3:8

Dari samua yang so jadi Tuhan Allah pe umat, kita ini suda yang paling tarada arti apa-apa. Tapi biar bagitu, Tuhan Allah kase Dia pe bae pa kita untuk kita kase tau Kabar Bae tentang Yesus Kristus pa orang-orang bukang Yahudi. Kita kase tau pa dorang tentang sagala hal yang talebe-lebe, yang Dia so rencana mo kase pa orang yang percaya pa Dia.

1 Tesalonika 2:12

Itu, torang kase smangat deng kase kuat ngoni pe hati supaya ngoni pe hidup pantas untuk orang yang iko pa Tuhan Allah. Tuhan Allah pangge pa ngoni la jadi Dia pe umat yang Dia berkuasa sebagai Raja, kong ngoni nanti dapa puji deng hormat sama-sama deng Dia.

2 Tesalonika 1:5

Waktu torang dengar ngoni pe kabar bagitu, torang tau, samua yang Tuhan Allah biking itu adil. Ngoni skarang dapa siksa karna percaya pa Tuhan, tapi ngoni tetap percaya pa Dia. Jadi ngoni pantas jadi Tuhan Allah pe umat yang Dia Berkuasa sebagai Raja pa ngoni pe hidup.

1 Timotius 6:18

Kase inga pa orang-orang kaya itu supaya dorang biking banya barang yang bae. Dorang musti suka kase pa orang-orang apa yang dorang perlu, deng apa yang ada pa dorang musti kase bage-bage pa orang-orang deng sanang hati.

2 Timotius 4:18

Tuhan Allah kase lapas pa kita dari samua orang pe rencana yang jahat, yang mo biking kita cilaka. Dia mo bawa pa kita di sorga, di situ Dia Berkuasa sebagai Raja. Dia itu suda yang torang puji deng hormat sampe slama-lamanya! Amin.

2 Timotius 4:8

Satu conto lagi, kalu orang iko lomba kong juara, dia dapa hadia. Bagitu lagi deng kita, Tuhan so kase sadia kita pe hadia karna Dia lia kita hidup butul pa Dia pe muka. Hadia itu Dia simpang kong nanti Dia mo kase pa kita di hari yang Dia mo adili pa samua orang deng adil. Hadia itu bukang cuma kita yang mo dapa, tapi samua orang yang percaya yang tunggu-tunggu Dia datang lagi, dorang me mo dapa.

Ibrani 11:26

Musa lebe suka batahang deng hina yang dia dapa karna dia iko Tuhan Allah pe mau, daripada tetap tinggal di Mesir untuk jadi orang kaya. Barang, Musa percaya Tuhan Allah pe janji untuk utus pa Mesias, Raja yang akan kase slamat pa manusia, kong dia tunggu-tunggu upah yang Tuhan Allah mo kase nanti di sorga.

Yakobus 1:12

Orang yang dapa cobaan kong batahang deng tetap percaya pa Tuhan, dia itu orang yang paling sanang. Karna kalu dia berhasil lolos dari samua cobaan itu, dia mo dapa hadia. Hadia itu, hidup deng Tuhan Allah slama-lamanya. Itu yang Tuhan Allah so janji mo kase pa orang-orang yang sayang pa Dia.

Yakobus 1:16

Sudara-sudara yang kita sayang, jang sampe ngoni dapa tipu. Tuhan Allah tara perna kase cobaan pa ngoni la ngoni tagoda biking yang jahat.

Yakobus 1:19

Sudara-sudara yang kita sayang, ngoni musti inga hal-hal ini: kalu ada orang sementara bicara, ngoni dengar bae-bae dulu pa dia, jang ngoni capat bicara deng jang ngoni capat mara.

Yakobus 1:9

Orang miskin yang percaya pa Yesus musti sanang, karna biar dia tara arti apa-apa di dunia, tapi Tuhan angka pa dia jadi orang penting pa Tuhan Allah pe muka.

1 Petrus 1:4

Torang yakin nanti Tuhan Allah kase pa torang berkat yang Dia so simpang di sorga. Berkat-berkat itu tara ancor, tara perna busu, deng tara beruba.

2 Petrus 1:11

Deng bagitu, nanti Tuhan Allah akan buka pintu sorga untuk ngoni, Dia akan tarima pa ngoni di Tuhan Yesus Kristus pe tampa berkuasa sebagai Raja. Tuhan Yesus Kristus itu yang kase slamat pa torang, deng Dia itu yang jadi Raja slama-lamanya.

Wahyu 2:9

Kita tau ngoni so dapa siksa, baru ngoni miskin lagi. Tapi Tuhan lia ngoni kaya karna ngoni percaya butul-butul pa Tuhan. Kita tau lagi tentang orang-orang Yahudi yang bilang kata, dorang Tuhan Allah pe umat yang Dia pili, padahal dorang pe kalakuang tara iko Tuhan Allah pe mau. Dorang bicara tara bae tentang ngoni. Dorang itu sama deng jemaat yang semba pa Iblis, setang-setang pe raja.

Wahyu 21:7

Sapa yang menang dari pengaru jahat, dia mo dapa samua yang Kita bilang tadi. Deng Kita mo jadi dia pe Tuhan Allah, kong dia mo jadi Kita pe ana.

Wahyu 3:18

Jadi Kita kase nasehat pa ngoni bagini: Kita so ada barang yang berharga sama deng mas yang dapa bakar di api supaya jadi murni, jadi ngoni musti bili suda supaya Kita lia ngoni butul-butul kaya pa Kita pe muka. Kita me ada baju puti bersi, ngoni musti bili kong pake la Kita lia ngoni tara talanjang lagi yang biking ngoni jadi malu. Kita me ada obat mata yang kase sembu mata. Jadi ngoni musti bili suda obat itu pa Kita la ngoni bisa lia butul-butul.