Yakobus 2:23 - Perjanjian Baru Bahasa Melayu Maluku Utara

²³ Jadi deng Abraham biking bagitu, apa yang tatulis di Kitab Suci so jadi. Dia pe babunyi bagini, “Abraham percaya pa Tuhan Allah, kong karna dia pe percaya itu, Tuhan Allah tarima pa dia jadi orang yang tara sala.” Karna itu, Abraham dapa sebut, “Tuhan Allah pe tamang.”

Yakobus 2:23 ပူးပေါင်းရင်းမြစ်များ

Markus 12:10

Ngoni pasti so baca di Kitab Suci tentang batu yang ada kase sama deng Kita pe diri, tapi ngoni tara mangarti itu. Bagini yang so tatulis, ‘Batu yang tukang-tukang bangunan so tara pake, Tuhan Allah so biking jadi batu fandasi yang paling penting.

Markus 15:27

Di situ me dorang ada kase salib lagi perampok dua orang sama-sama deng Yesus, yang satu pa Yesus pe sabla kanan deng yang satu lagi pa Yesus pe sabla kiri. [

Lukas 4:21

Kong Yesus bilang pa dorang, “Samua yang ngoni dengar yang kita so baca di Kitab Suci, hari ini samua so jadi.”

Kisah Para Rasul 1:16

“Sudara-sudara, dulu Roh Kudus so bilang pa raja Daud apa yang mo jadi pa Yudas. Itu so ada di Kitab Suci, kong memang musti jadi. Yudas itu yang so bawa orang-orang pigi tangka pa Yesus.

Roma 11:2

Tuhan Allah tara buang Dia pe umat yang Dia so pili dari dulu. Itu jelas kalu ngoni inga Tuhan Allah pe jawaban dulu pa nabi Elia, waktu dia mengelu pa Tuhan Allah tentang orang Israel. Carita itu ada tatulis di Kitab Suci.

Roma 9:17

Di Kitab Suci ada tulis tentang apa yang Tuhan Allah bilang pa raja Mesir bagini, “Kita angka pa ngana jadi raja, Kita pe maksut supaya waktu ngana malawang pa Kita, Kita bisa kase tunju Kita pe kuasa, sampe samua orang di dunia ini bole puji pa Kita.”

Galatia 3:22

Karna di Kitab Suci ada tatulis bagini, “Samua orang di dunia ini so sala pa Tuhan Allah pe muka karna dorang pe dosa.” Jadi karna samua manusia pe dosa itu, Tuhan Allah biking Dia pe janji deng Abraham, supaya sapa yang percaya pa Yesus Kristus, dia itu mo dapa Tuhan Allah pe janji untuk hidup deng Tuhan Allah slama-lamanya, itu yang Tuhan Allah mo kase.

Galatia 3:6

Ambe conto, torang pe orang tua dulu-dulu, Abraham. Di Kitab Suci ada tatulis bagini, “Abraham percaya pa Tuhan Allah, deng karna dia pe percaya itu, Tuhan Allah tarima pa dia jadi orang yang tara sala pa Tuhan Allah pe muka.”

2 Timotius 3:16

Samua yang tatulis di Kitab Suci, itu dari Tuhan Allah sandiri. Samua itu dia pe guna: untuk kase ajar pa orang apa yang butul, untuk togor orang yang ajar ajaran yang sala, untuk ruba orang pe cara hidup la dorang iko jalang yang butul, deng untuk lati orang pe diri iko Tuhan pe mau.

Yakobus 2:24

Jadi skarang ngoni so tau to? Tuhan Allah biking torang jadi orang yang tara sala pa Dia pe muka, bukang karna torang percaya saja, tapi karna apa yang torang biking.

1 Petrus 2:6

Karna di Kitab Suci ada tatulis bagini, “Perhatikan bae-bae, Kita so pili batu satu yang berharga. Batu itu Kita so taru jadi batu fandasi yang paling penting di Yerusalem, kota yang orang sebut Sion. Kong sapa yang percaya pa Dia, tara akan kecewa.”