Yakobus 2:14 - Perjanjian Baru Bahasa Melayu Maluku Utara

¹⁴ Sudara-sudara, kalu satu orang bilang dia percaya pa Tuhan, tapi dia tara biking apa yang Tuhan mau dalam dia pe hidup, dia pe percaya itu tarada guna. Jadi, Tuhan tara kase slamat pa orang-orang yang percaya macam bagitu.

Yakobus 2:14 ပူးပေါင်းရင်းမြစ်များ

Matius 5:20

Jadi, dengar bae-bae yang Kita bilang ini. Guru-guru agama Yahudi yang ahli lima kitab Musa deng orang Yahudi dari aliran Farisi, dorang jaga iko Tuhan Allah pe aturan-aturan, cuma dorang tara biking yang butul pa Tuhan Allah pe muka. Tapi ngoni ini musti biking yang butul pa Tuhan Allah pe muka kalu ngoni mau jadi Tuhan Allah pe umat yang Dia Berkuasa sebagai Raja pa ngoni pe hidup.”

Lukas 3:11

Yohanes bilang, “Sapa yang ada baju dua, satu musti kase pa orang yang tarada baju, deng sapa yang ada makanang, musti kase lagi pa orang yang tarada makanang.”

Lukas 6:49

Tapi orang yang dengar apa yang Kita bilang kong dia tara biking, dia sama deng satu orang yang kase badiri ruma cuma di atas tana, tara di atas fandasi. Jadi waktu banjir datang, ruma itu langsung rubu kong rusak barát.”

Kisah Para Rasul 15:9

Tuhan Allah me tara pili-pili antara torang deng dorang, jadi Dia biking bersi dorang pe hati, karna dorang so percaya pa Yesus.

Kisah Para Rasul 8:13

Simon me jadi percaya kong dapa baptis. Abis itu, Simon salalu iko pa Filipus di mana saja Filipus pigi. Dia lia Filipus biking mujizat-mujizat deng tanda-tanda yang kase tunju Tuhan Allah pe kuasa, kong dia taherang-herang.

Kisah Para Rasul 8:21

Ngana pe hati tara butul pa Tuhan Allah pe muka, jadi ngana tara bole iko sama-sama deng torang untuk kase tau Kabar Bae pa orang-orang.

Roma 2:25

Torang orang Yahudi, torang dapa sunat supaya jadi tanda, Tuhan Allah pili pa torang jadi Dia pe umat. Kalu torang biking aturan di lima kitab Musa, sunat itu ada arti torang itu butul-butul Tuhan Allah punya. Tapi kalu torang tara iko aturan di lima kitab Musa, sunat itu jadi tarada arti.

1 Korintus 15:2

Kalu ngoni tetap percaya Kabar Bae yang kita so kase tau pa ngoni itu, ngoni mo dapa slamat. Tapi kalu tarada, ngoni pe percaya itu jadi parcuma.

1 Korintus 16:22

Orang yang tara sayang pa Tuhan, biar suda dia dapa kutuk. Maranata, Tuhan datang suda!

Galatia 5:13

Sudara-sudara, Tuhan Allah so pangge pa ngoni iko pa Dia, deng bagitu ngoni bisa bebas dari aturan-aturan di lima kitab Musa untuk dapa slamat. Cuma jang ngoni pikir ngoni so bebas, turus ngoni bole biking kalakuang yang tara bagus iko apa saja yang ngoni suka. Bukang bagitu. Tapi yang butul yang musti biking itu, ngoni musti baku-baku layani karna ngoni baku sayang.

Galatia 5:6

Karna untuk torang yang so sama-sama percaya pa Kristus Yesus, torang mo iko aturan sunat itu ka, tarada ka, itu tara penting, tapi yang paling penting torang pe percaya pa Yesus Kristus yang dapa lia dari torang pe sayang pa orang laeng.

1 Tesalonika 1:3

Tiap kali torang berdoa pa Tuhan Allah torang pe Bapa, torang inga pa ngoni jemaat di kota Tesalonika. Torang inga samua yang ngoni biking karna ngoni pe percaya. Torang inga ngoni pe bae pa orang-orang karna ngoni sayang pa dorang. Torang inga lagi bagimana ngoni tetap biking barang yang bae biar ngoni dapa susa, karna ngoni salalu batahang percaya deng yakin pa Yesus Kristus, torang pe Tuhan.

1 Timotius 1:5

Kita kase nasehat ini pa ngana, dia pe tujuan supaya orang-orang percaya baku sayang. Torang bisa baku sayang kalu torang pe hati so bersi, torang pe hati tau apa yang butul, deng tong so butul-butul percaya pa Tuhan.

1 Timotius 4:8

Ambe conto, kalu torang lati torang pe badan supaya kuat, itu bagus, tapi dia pe guna cuma sadiki. Tapi kalu torang lati torang pe diri untuk biking Tuhan Allah pe mau, dia pe guna banya skali. Kalu lati torang pe diri bagitu, pasti ada berkat untuk torang pe hidup skarang di dunia ini deng nanti waktu torang hidup ulang.

Titus 1:16

Dorang bilang kata, dorang kanal pa Tuhan Allah, padahal dong pe kalakuang itu kase tunju dorang itu tara kanal pa Dia. Orang-orang yang jahat bagitu, dorang tara iko Tuhan Allah pe mau, deng tara mampo biking barang yang bae.

Titus 3:8

Samua yang kita so kase ajar ini butul, kong itu bagus deng ada guna untuk samua orang. Kita mau ngana bilang deng tegas ajaran ini pa samua orang yang percaya pa Tuhan Allah, supaya dorang berusaha butul-butul biking barang yang bae.

Ibrani 11:17

Karna Abraham percaya pa Tuhan Allah, Abraham kase dia pe ana Ishak jadi korban persembahan waktu Tuhan Allah tes pa dia. Ishak itu, Abraham pe ana cuma satu itu saja, deng yang Tuhan Allah so janji mo ada banya turunan dari ana itu.

Ibrani 13:9

Jang ngoni iko ajaran-ajaran yang tara butul yang bole biking ngoni jadi sesat. Barang, kalu iko aturan tentang makanang yang halal deng haram, tarada dia pe guna untuk biking ngoni jadi sempurna pa Tuhan Allah pe muka. Cuma Tuhan Allah pe sayang deng pe bae yang bisa biking ngoni pe percaya pa Tuhan jadi kuat.

Yakobus 1:16

Sudara-sudara yang kita sayang, jang sampe ngoni dapa tipu. Tuhan Allah tara perna kase cobaan pa ngoni la ngoni tagoda biking yang jahat.

Yakobus 2:16

Kong ada dari ngoni yang cuma bilang pa dia, “Bae-bae di jalang, e! Tuhan berkati pa ngana la jang ngana dingin deng jang ngana lapar.” Yang ngoni bilang itu tarada dia pe guna, karna ngoni tara bantu apa yang dia perlu.

Yakobus 2:18

Mangkali ada yang tara setuju kong mo bilang bagini, “Ada orang yang cuma percaya saja pa Tuhan, deng ada orang yang cuma biking saja barang yang bae.” Kita mo bilang pa orang yang bilang bagitu, “Ngana tara bisa kase bukti ngana percaya pa Tuhan, karna ngana cuma biking hal yang bae. Tapi kita, kita mo kase tunju kita pe percaya pa Tuhan deng cara biking hal yang bae.”

Yakobus 2:26

Jadi orang yang bilang dia percaya pa Tuhan Allah, tapi dia tara biking apa yang Tuhan Allah mau dalam dia pe hidup, dia pe percaya itu tarada guna. Dia itu sama deng orang yang so mati, ada badan tapi tarada nyawa.

2 Petrus 1:5

Jadi karna Tuhan Allah so kase samua itu untuk ngoni, ngoni musti berusaha karas supaya ngoni pe percaya itu jadi lengkap deng ngoni hidup yang butul pa Dia pe muka. Kong bukang cuma itu saja, tapi ngoni musti berusaha la ngoni bisa tau apa yang Tuhan Allah suka.