Wahyu 8:3 - Perjanjian Baru Bahasa Melayu Maluku Utara

³ Kong ada malaekat satu yang laeng datang, dia badiri di pinggir tampa bakar korban persembahan. Dia bawa loyang mas kong dia dapa kase banya kemenyan la mo bakar jadi persembahan yang bobou sadap pa Tuhan Allah. Dia me tarima doa-doa dari samua orang yang so jadi Tuhan Allah pe umat. Kong dia bakar kemenyan itu deng serakan doa-doa itu sama-sama di tampa bakar korban persembahan yang ada biking dari mas, di muka Tuhan Allah pe kursi raja.

Wahyu 8:3 ပူးပေါင်းရင်းမြစ်များ

Lukas 1:10

Jadi, Zakharia maso di Ruang Suci itu, kong biking dia pe tugas bakar kemenyan, sedangkan di luar ada orang banya yang berdoa.

Roma 8:34

Tarada yang bisa kase hukuman pa torang yang percaya, karna Kristus Yesus yang ada bela pa torang pa Tuhan Allah pe muka. Kristus Yesus mati supaya tebus torang pe dosa. Kong lebe dari itu lagi, skarang Dia so hidup ulang kong dudu di tampa yang terhormat, pa Tuhan Allah pe sabla kanan.

Ibrani 7:25

Kong karna Dia Imam slama-lamanya, Dia ada kuasa kase slamat pa orang-orang yang mau datang pa Tuhan Allah, dari skarang sampe slama-lamanya. Dia kase slamat pa torang, barang Dia hidup slama-lamanya untuk kase berdoa pa torang pa Tuhan Allah.

Ibrani 9:4

Di Ruang Paling Suci itu, ada meja persembahan dari mas yang dong pake untuk bakar kemenyan. Di ruang itu me ada taru Kotak Perjanjian. Kotak itu dong lapis deng mas luar dalam. Di dalam Kotak Perjanjian itu ada tampayang mas yang ada isi makanang yang pe nama manna, ada Harun pe tongkat yang so perna batunas, deng ada batu dua lempeng yang ada tatulis Tuhan Allah pe parenta spulu itu.

Wahyu 10:1

Abis itu, kita lia malaekat satu lagi yang kuat turung dari sorga. Dia pe badan tabungkus deng awan. Dia pe kapala takuliling deng pelangi. Dia pe muka basinar sama deng matahari, kong dia pe kaki mamanyala sama deng tiang api.

Wahyu 14:18

Turus, malaekat satu lagi kaluar dari dekat tampa bakar korban persembahan. Dia itu yang dapa tugas untuk jaga api di situ. Kong dia bicara kuat-kuat pa malaekat yang pegang parang sabit yang tajam itu bagini, “Angka ngana pe parang sabit itu la ka sana panen bua-bua anggur yang ada di bumi, karna bua-bua itu so masa.”

Wahyu 5:8

Waktu Anak Domba ambe kitab yang tagulung itu, ampa binatang yang luar biasa itu deng dua pulu ampa pemimpin itu berlutut semba pa Dia sampe dong pe muka kanal di tana. Dorang masing-masing ada pegang kecapi satu deng mangko mas satu. Mangko mas itu ada isi kemenyan yang kalu bakar dia pe bobou sadap. Bobou sadap itu pe arti, doa-doa dari orang-orang yang so jadi Tuhan Allah pe umat.

Wahyu 6:9

Turus Anak Domba itu buka segel yang kelima. Waktu itu, kita lia di bawa tampa bakar korban persembahan, ada banya skali jiwa. Jiwa-jiwa itu dari orang yang dapa bunu karna kase tau Tuhan Allah pe firman deng karna bacarita Tuhan Yesus pe bae di mana-mana.

Wahyu 7:2

Malaekat ampa itu so dapa kuasa untuk kase rusak tana deng laut. Tapi kita lia lagi ada malaekat laeng muncul dari timur, tampa matahari nae. Malaekat itu ada bawa Tuhan Allah yang hidup pe cap, kong cap itu untuk orang yang jadi Tuhan Allah pe umat. Malaekat itu bicara kuat-kuat pa malaekat ampa yang laeng itu bagini,

Wahyu 8:4

Kong kemenyan pe asap deng doa-doa dari samua orang yang so jadi Tuhan Allah pe umat, itu samua nae sama-sama dari malaekat itu pe tangan sampe pa Tuhan Allah.

Wahyu 8:5

Abis itu, malaekat ambe loyang itu, dia isi deng api yang ada ambe dari tampa bakar korban persembahan. Turus dia kase lempar loyang itu di bumi. Kong dapa dengar guntur babunyi deng kilat baku sambung-sambung, deng ada lagi tana goyang.

Wahyu 9:13

Abis itu, malaekat yang keanam tiop dia pe trompet. Turus, kita dengar suara kaluar dari ampa huk yang pe model tandu di tampa bakar korban persembahan. Tampa bakar korban itu ada biking dari mas kong ada pa Tuhan Allah pe muka.