Wahyu 7:15 - Perjanjian Baru Bahasa Melayu Maluku Utara

¹⁵ Karna itu, dorang itu ada di muka Tuhan Allah pe kursi raja kong semba pa Dia siang malam di Dia pe Ruang Paling Suci. Kong Tuhan Allah yang dudu di atas kursi raja itu akan ada di tenga-tenga pa dorang untuk jaga pa dorang, sama deng Dia kase badiri sabua la kase sombar pa dorang.

Wahyu 7:15 ပူးပေါင်းရင်းမြစ်များ

Yohanes 1:14

Tuhan Allah pe Firman itu so jadi manusia, kong Dia tinggal di antara torang. Torang so lia Dia pe kuasa yang hebat, kuasa yang Dia dapa dari Tuhan Allah, Dia pe Bapa, karna Dia itu Tuhan Allah pe Anak. Kong Tuhan Allah pe Anak itu cuma satu itu saja. Dia yang biking torang bole tau yang butul tentang Tuhan Allah deng tentang Tuhan Allah pe sayang pa torang.

1 Korintus 3:16

Ngoni tau ka tarada, ngoni itu sama deng Tuhan Allah pe Ruma, kong Tuhan Allah pe Roh tinggal pa ngoni.

2 Korintus 6:16

Apa ada hubungan antara Tuhan Allah pe Ruma deng manusia pe tampa semba puji-puji? Tara ada hubungan! Torang orang-orang percaya, tong ini sama deng Tuhan Allah pe Ruma, karna Tuhan Allah yang hidup tinggal di torang pe hati. Itu sama deng Tuhan Allah janji dulu, kong skarang so jadi, “Kita mo tinggal sama-sama deng dorang, deng hidup deng dorang, kong Kita mo jadi dorang pe Tuhan Allah, deng dorang mo jadi Kita pe umat.”

Ibrani 12:2

Mari suda torang biking turus sama deng orang yang iko lomba itu, jang lia kiri-kanan tapi lia pa Yesus turus. Barang, Dia yang pimpin pa torang, supaya torang bole percaya pa Tuhan Allah, deng Dia yang biking torang pe percaya jadi sempurna. Waktu dapa salib, Dia tetap batahang. Deng biar Dia dapa hina, Dia tara peduli, karna Dia tau, abis itu, Dia akan sanang. Skarang, Dia so ada di tampa yang terhormat, pa Tuhan Allah pe sabla kanan di sorga.

Ibrani 8:1

Yang paling penting dari samua yang kita so bilang itu, bagini: Yesus Kristus itu so jadi torang pe Imam Basar yang kase bae-bae torang pe hubungan deng Tuhan Allah. Dia so dudu di tampa yang terhormat, pa Tuhan Allah yang Paling Berkuasa pe sabla kanan di sorga.

Wahyu 11:19

Abis itu, kita dapa lia Tuhan Allah pe Ruma di sorga tabuka, kong di dalam itu kita dapa lia Tuhan Allah pe Kotak Perjanjian. Turus ada kilat deng guntur babunyi, tana goyang yang kuat, deng ujang es yang karas skali.

Wahyu 13:6

Binatang itu hina-hina pa Tuhan Allah, dia kase tara bae Tuhan Allah pe nama. Dia me pandang enteng sorga, tampa yang Tuhan Allah tinggal, deng samua yang ada di sorga.

Wahyu 20:10

Turus, Iblis yang kase sesat pa orang-orang itu dapa lempar di api belerang yang luas skali. Binatang jahat deng nabi palsu so dapa buang kamuka di situ. Kong dorang samua dapa siksa siang deng malam sampe slama-lamanya.

Wahyu 21:22

Tapi kita tara lia ruma ibada di dalam kota itu. Barang, ruma ibada itu, itu Tuhan Allah suda, Tuhan Allah Yang Paling Berkuasa, deng itu lagi Anak Domba.

Wahyu 22:3

Di kota itu, tarada orang yang dapa kutuk lagi. Tuhan Allah deng Anak Domba pe kursi raja ada di situ. Kong Tuhan Allah pe umat yang salalu biking apa yang Tuhan Allah suru, dorang mo semba pa Dia.

Wahyu 22:5

Di kota itu, tarada malam. Jadi Tuhan Allah pe umat, dong so tara perlu lagi cahaya lampu atau sinar matahari, karna Tuhan Allah pe diri sandiri yang jadi sinar untuk kase tarang pa dorang. Kong dorang mo berkuasa sebagai raja sampe slama-lamanya.

Wahyu 4:4

Ada lagi dua pulu ampa kursi raja laeng yang kuliling kursi raja itu. Di dua pulu ampa kursi raja itu, dua pulu ampa pemimpin ada dudu. Dorang pake baju puti kong di dorang pe kapala ada makota mas.

Wahyu 4:8

Ampa binatang itu masing-masing pe sayap ada anam. Di sayap-sayap itu, dia pe bagian luar deng dalam ponong deng mata. Siang deng malam binatang-binatang itu tara perna berenti babilang bagini, “Suci, suci, Tuhan Allah itu paling suci suda! Dia Yang Paling Berkuasa. Dia yang dari dulu ada, yang skarang ada, deng yang nanti akan datang untuk slama-lamanya.”

Wahyu 4:9

Ampa binatang itu kase dong pe puji-pujian deng hormat pa Tuhan Allah yang dudu di kursi raja. Dorang me bilang tarimakasi pa Dia, Dia itu yang hidup slama-lamanya. Kong tiap kali dorang biking bagitu,

Wahyu 7:9

Abis itu, kita lia ada orang pe banya skali, sampe tara mampo mo rekeng pa dorang. Dorang itu dari samua bangsa, suku bangsa, fam deng bahasa. Dorang samua badiri di muka Tuhan Allah pe kursi raja deng di muka Anak Domba itu. Dorang pake juba puti deng masing-masing orang ada pegang daong-daong palem.