Wahyu 6:9 - Perjanjian Baru Bahasa Melayu Maluku Utara

⁹ Turus Anak Domba itu buka segel yang kelima. Waktu itu, kita lia di bawa tampa bakar korban persembahan, ada banya skali jiwa. Jiwa-jiwa itu dari orang yang dapa bunu karna kase tau Tuhan Allah pe firman deng karna bacarita Tuhan Yesus pe bae di mana-mana.

Wahyu 6:9 ပူးပေါင်းရင်းမြစ်များ

Yohanes 16:2

Barang, deng ngoni iko pa Kita, nanti ada dia pe waktu, pemimpin-pemimpin agama Yahudi so tara kase bae pa ngoni mo baibada lagi di ruma-ruma ibada. Mala mo ada dia pe waktu lagi, orang-orang mo bunu pa ngoni, barang dorang pikir, itu Tuhan Allah pe mau.

2 Korintus 5:8

Jadi torang pe hati tetap kuat, kong torang lebe suka kase tinggal tong pe badan di dunia ini, la tinggal deng Tuhan di sorga.

Filipi 1:23

Kita ini sama deng ada mangada dua pilihan. Kita suka mo kase tinggal dunia ini supaya bisa tinggal sama-sama deng Yesus Kristus di sorga, karna itu memang yang paling bae.

Filipi 2:17

Dulu waktu pertama kita kase tau Kabar Bae tentang Yesus Kristus pa ngoni, ngoni jadi percaya deng ngoni kase ngoni pe diri untuk biking Dia pe mau. Jadi biar lagi orang mo bunu pa kita nanti gara-gara kita so kase tau Kabar Bae, itu tara apa-apa. Barang, itu sama deng kita pe dara so tatumpa untuk jadi korban persembahan pa Tuhan Allah. Jadi biar kita pe dara tatumpa sampe mati, kita pe hati tetap sanang deng kita rasa sanang sama-sama deng ngoni samua.

2 Timotius 1:8

Jadi jang ngana malu kase tau tentang torang pe Tuhan. Ngana me jang malu mangaku kita ini ngana pe tamang, biar skarang kita di penjara. Kita ada di penjara karna kita iko pa Tuhan. Ngana me musti siap-siap tarima siksa, karna ngana salalu kase tau Kabar Bae tentang Yesus Kristus pa orang-orang, sama deng kita. Kalu ngana dapa siksa, Tuhan Allah pasti kase kuat ngana pe hati.

2 Timotius 4:6

Tapi tentang kita, kita rasa kita pe waktu di dunia so tara lama lagi. Tara lama lagi kita akan mati kong kita pe hidup akan sama deng anggur yang ada kase cura untuk jadi persembahan pa Tuhan Allah.

Ibrani 12:23

Di sana ngoni me baku dapa deng orang-orang yang percaya pa Tuhan Allah yang ada bakumpul, dorang itu Dia sebut Dia pe ana-ana yang tua, dorang itu pe nama-nama so tatulis di sorga. Di sana ngoni me baku dapa deng Tuhan Allah, Dia yang mo adili pa samua orang. Ngoni me baku dapa deng orang-orang yang so mati kamuka, yang waktu dong masi hidup, dong jaga biking yang butul pa Tuhan Allah pe muka, kong dorang itu Tuhan Allah so biking dorang jadi sempurna.

Wahyu 1:2

Kita so lia samua yang Yesus Kristus kase tunju itu kong kita tulis di sini. Kita kase tau pa ngoni tentang Tuhan Allah pe firman deng tentang samua hal yang Yesus Kristus so kase tunju pa kita.

Wahyu 1:9

Kita Yohanes, ngoni pe sudara yang sama-sama dapa siksa karna percaya pa Yesus. Torang sama-sama percaya pa Yesus yang Berkuasa sebagai Raja pa torang pe hidup, deng biar dapa siksa, torang tahang mangada siksa itu. Kong kita ini dapa buang di pulo yang pe nama Patmos, karna kita kase tau Tuhan Allah pe firman deng kase tau Yesus pe pasáng pa orang-orang.

Wahyu 14:18

Turus, malaekat satu lagi kaluar dari dekat tampa bakar korban persembahan. Dia itu yang dapa tugas untuk jaga api di situ. Kong dia bicara kuat-kuat pa malaekat yang pegang parang sabit yang tajam itu bagini, “Angka ngana pe parang sabit itu la ka sana panen bua-bua anggur yang ada di bumi, karna bua-bua itu so masa.”

Wahyu 16:7

Kong kita dengar suara dari tampa bakar korban persembahan, bilang bagini, “Ya Tuhan, Tuhan Allah Yang Paling Berkuasa. Hukuman yang Tuhan kase itu samua adil deng butul!”

Wahyu 19:10

Kong kita berlutut di malaekat itu pe muka la mo semba pa dia. Tapi dia togor pa kita bagini, “Jangan! Jang ngana semba pa kita! Semba saja pa Tuhan Allah. Karna kita ini cuma sama deng ngana deng sudara-sudara laeng yang jaga biking apa yang Tuhan suru. Torang samua ini yang jaga kase tau tentang Yesus pa orang-orang. Sapa yang kase tau itu, dia itu butul-butul yang Roh Kudus pake untuk kase tau Tuhan Allah pe pasáng.”

Wahyu 2:13

Kita tau ngoni pe tampa tinggal. Ngoni tinggal di kota Pergamus, memang kota yang Iblis, setang-setang pe raja pe tampa berkuasa. Tapi biar bagitu, ngoni percaya turus pa Kita. Tempo hari, ada orang yang dia pe nama Antipas, Kita pe saksi yang setia, dia kase tau Tuhan Allah pe pasáng, kong dong bunu pa dia. Tapi biar dorang bunu pa dia di ngoni pe tenga-tenga, ngoni percaya turus pa Kita, ngoni tara manyangkal pa Kita.

Wahyu 20:4

Turus kita lia ada kursi-kursi raja. Orang-orang yang dudu di kursi raja itu, orang-orang yang dapa kuasa untuk adili pa manusia. Kita me lia roh-roh dari orang-orang yang dulu dapa potong kapala kong mati karna dorang kase tau tentang Yesus deng Tuhan Allah pe firman. Orang-orang itu tara perna semba pa binatang jahat deng dia pe patong, jadi dorang me tara perna dapa binatang itu pe cap di dong pe testa deng di dong pe tangan. Tuhan Allah kase hidup ulang pa dorang, turus dong berkuasa sebagai raja sama-sama deng Yesus Kristus selama saribu taong.

Wahyu 8:3

Kong ada malaekat satu yang laeng datang, dia badiri di pinggir tampa bakar korban persembahan. Dia bawa loyang mas kong dia dapa kase banya kemenyan la mo bakar jadi persembahan yang bobou sadap pa Tuhan Allah. Dia me tarima doa-doa dari samua orang yang so jadi Tuhan Allah pe umat. Kong dia bakar kemenyan itu deng serakan doa-doa itu sama-sama di tampa bakar korban persembahan yang ada biking dari mas, di muka Tuhan Allah pe kursi raja.

Wahyu 9:13

Abis itu, malaekat yang keanam tiop dia pe trompet. Turus, kita dengar suara kaluar dari ampa huk yang pe model tandu di tampa bakar korban persembahan. Tampa bakar korban itu ada biking dari mas kong ada pa Tuhan Allah pe muka.